ޑެންމާކްގެ ވެރިރަށް ކޯޕެންހޭގަންގެ ޝޮޕިން ސެންޓަރެއްގައި ބަޑި ޖަހައި ތިން މީހުން މަރާލައިފި އެވެ.
އެ ހާދިސާގައި އިތުރު ހަތަރު މީހުންނަށް އަނިޔާވި އެވެ. މަރުވީ އުމުރުން 17 އަހަރުގެ ޑެންމާކް ދެ ކުދިންނާއި އުމުރުން 47 އަހަރުގެ ރަޝިއާ މީހެކެވެ. އަނިޔާވީ ޑެންމާކް ދެ މީހުންނާއި ސްވިޑަންގެ ދެ މީހުންނަށެވެ. ހޮސްޕިޓަލުގައި ފަރުވާދެމުންދާ އިރު އެ މީހުންގެ ހާލު ސީރިއަސް އެވެ.
ހަމަލާ ދިންތާ ކުޑަ ވަގުތުކޮޅެއްގެ ތެރޭގައި ހައްޔަރު ކުރި އުމުރުން 22 އަހަރުގެ ފިރިހެން މީހާއަކީ ޑެންމާކްގެ ރައްޔިތެކެވެ.
ފުލުހުންގެ ޗީފް ސޮއެރެން ތޯމަސެން ވިދާޅުވީ އޭނާއަކީ ނަފްސާނީ މައްސަލަތަކެއް ހުރި މީހެއް ކަމަށާއި ހަމަލާއާ ޓެރަރިޒަަމާ ގުޅުން އޮތް ކަމުގެ ނިޝާނެއް ނެތް ކަމަށެވެ.
ތުހުމަތު ކުރެވޭ މީހާގެ ވަނަވަރު ހާމަކޮށްފައި ނުވާ އިރު، ހޯމަ ދުވަހު އޭނާ ކޯޓަށް ހާޒިރު ކުރާނެ އެވެ.
ބޮޑު ވަޒީރު މެޓެ ފްރެޑެރިކްސަން ވިދާޅުވީ ޑެންމާކަށް އަނިޔާވެރި ހަމަލާއެއް ދީފައިވާ ކަމަށާއި މި ދަނޑިވަޅުގައި ހުރިހާ އެންމެން އެއްބައިވަންތަވުން މުހިއްމު ކަމަށެވެ.
"އަޅުގަނޑުމެންގެ ރީތި، ރައްކާތެރި ވެރިރަށް ބަދަލުވެގެން ދިޔައީ ފަޅި ސިކުންތެއްގެ ތެރޭގައި،" އެކަމަނާ ވިދާޅުވި އެވެ.
ފުލުހުން ބުނީ ތުހުމަތު ކުރެވޭ މީހާ ހަައްޔަރު ކުރި އިރު ރައިފަލް ބަޑިއަކާއި ވަޒަން އޭނާގެ އަަތުގައި ހުރި ކަމަށެވެ. ފީލްޑްސް ޝޮޕިން ސެންޓަރުގައި 140 އަށް ވުރެ ގިނަ ފިހާރަ އާއި ރެސްޓޯރެންޓް ހުރެ އެވެ.
ޑެންމާކްގައި އެންމެ ފަހުން މިފަދަ ހާދިސާއެއް ހިނގީ 2015 ވަނަ އަހަރު އެވެ. އެ ފަހަރު ކޯޕެންހޭގަންގެ ސަގާފީ ސެންޓަރަކާއި ޔަހޫދީންގެ ފައްޅިއަކަށް ދިން ހަމަލާގައި ދެ މީހުން މަރުވެ، ހަ ފުލުހުންނަށް އަނިޔާވި އެވެ.
