ހިޔާލުފާޅު ކުރުމުގެ ނަމުގައި އާންމު ތަންތަނުގައި ގުރުއާން އެންދުން މަނާ ކުރާ ބިލެއް ޑެންމާކުގެ ގާނޫނު ހަދާ މަޖިލީހުން ފާސްކޮށްފި އެވެ.
އެފަދަ ބިލެއް ޑެންމާކުގައި ފާސްކޮށްފައި މިވަނީ ހިޔާލު ފާޅުކުރުމުގެ ނަމުގައި ހާމަކަން ބޮޑުކޮށް ގުރުއާން އެންދުމުގެ ހަރަކާތްތައް ހިންގަމުންދިޔުން ކުށްވެރިކޮށް މުޅި ދުނިޔޭގައި މުސްލިމުން އަޑު އުފުލާފައި ވަނިކޮށެވެ.
ވަކި ދީނެއްގެ ބަޔަކަށް ހާއްސަ ލިޔުމެއް ނުވަތަ ފޮތަކަށް އިހާނެތިކޮށް ހިތުން މަނާކުރާ އެ ގާނޫނު ފާސްކޮށްފައި ވަނީ 179 މެންބަރުން ހިމެނޭ މަޖިލީހުގެ 94 މެންބަރުންގެ ތާއީދާ އެކު އެވެ. އެ ބިލާ ދެކޮޅަށް ޑެންމާކު މަޖިލީހުގެ 77 މެންބަރަކު ވޯޓު ދިނެވެ. އެ ގާނޫނަށް އަމަލު ކުރަން ފަށާނީ ޑެންމާކުގެ ރާނީ، މާގްރީތާ ތަސްދީގު ކުރެއްވުމުންނެވެ.
އެ ގާނޫނަށް އަމަލު ކުރަން ފެށުމާއެކު އެއްވެސް ދީނެއްގެ ބަޔަކު ހުރުމަތްތެރިކޮށް ހިތާ އެއްވެސް ފޮތެއް ޑެންމާކުގައި އަންދައި، ވީދާ ހަދައިފި ނަމަ ދެ އަހަރުގެ ޖަލު ހުކުމެއް ނުވަތަ ޖޫރިމަނާއެއް އެމީހަކަށް އަންނާނެ އެވެ.
މިއަހަރުގެ ތެރޭގައި ޑެންމާކްއާއި ސްވިޑެންގައި ވަނީ ހިޔާލުފާޅު ކުރުމުގެ ނަމުގައި ފާޅުގައި ގުރުއާން މުސްހަފު އަންދައި އިސްލާމް ދީނަށް ފުރައްސާރަ ކޮށްފަ އެވެ. އެ ހަރަކާތްތަކާ ގުޅިގެން ދުނިޔޭގެ އެކި ކަންކޮޅުގައި ދިރިއުޅޭ މުސްލިމުން ވަނީ އެކަން ކުށްވެރިކޮށް މަގުތައް މައްޗަށް ނުކުމެ އަޑުވެސް އުފުލައިފަ އެވެ.
ޑެންމާކަކީ މީގެ ކުރިން ވެސް އިސްލާމްދީނަށް ފުރައްސާރަކޮށް ހަޖޫޖެހުމުގެ މާޒީއެއް އޮތް ގައުމެކެވެ. އެގޮތުން 2006 ވަނަ އަހަރު އެގައުމުގެ ނޫހެއްގައި ވަނީ ކީރިތި ރަސޫލާއަށް ވެސް ފުރައްސާރަކޮށް ކާޓޫނުތަކެއް ޝާއިއު ކޮށްފަ އެވެ. އެފަހަރު ވެސް ޑެންމާކާ ދެކޮޅަށް މުޅި ދުނިޔޭގައި މުސްލިމުން އަޑު އުފުލި އެވެ.
