ޑެންމާކުގައި ދެކުނު ކޮރެއާގެ ސަމްޔަންގްއިން އުފައްދާ ރަމެން ނޫޑުލްސް މާ ކުޅި ކަމަށް ބުނެ ވިއްކުމާއި ބޭނުންކުރުން މަނާކޮށްފި އެވެ.
ޑެންމާކުން މަނާކުރި އިންސްޓޭންޓް ނޫޑްލްސްގެ ބާވަތްތަކުގެ ތެރޭގައި "ބުލްޑަކް ރަމެން" 3x ސްޕައިސީ އެންޑް ހޮޓް ޗިކަން އަދި 2x ސްޕައިސީ އެންޑް ހޮޓް ޗިކަންގެ އިތުރުން ހޮޓް ޗިކަން ސްޓޫ ހިމެނެ އެވެ.
ޑެންމާކުގެ ފުޑް އެޖެންސީން ވަނީ މި ބާވަތްތަކާމެދު ސަމާލުވެ، ބޭނުން ކުރުން ހުއްޓާލުމަށް ގޮވާލާފަ އެވެ.
"މި އުފެއްދުންތައް ހުރިނަމަ، ބޭނުން ނުކޮށް ލަސްނުކޮށް ގަތްތަނާ ހަވާލުކުރަން އެދެން،" ޑެންމާކުގެ ފުޑް އެޖެންސީން ބުންޏެވެ.
އުފެއްދުންތައް މަނާކުރީ ބޭނުންކުރާ ފަރާތްތައް ވިހަވެދާނެތީ ކަމަށް އެ އެޖެންސީން ބުނި ނަމަވެސް، އެފަދަ ހާދިސާއެއް ހިނގިކަމަށް ބުނެފައެއް ނުވެ އެވެ.
ނަމަވެސް އެ ނޫޑުލްސް އުފައްދާ ސަމްޔަންގްއިން ބުނީ ނޫޑުލްސްގެ ކޮލިޓީއާމެދު މައްސަލައެއް އޮތްކަން ފާހަގަ ނުވާ ކަމަށާއި، ޑެންމާކުން ފާހަގަކޮށްފައި ވަނީ ނޫޑުލްސް ކުޅިވުން އެކަނި ކަމަށެވެ.
"މި އުފެއްދުމަކީ މުޅި ދުނިޔޭގައި ވެސް ބޭނުން ކުރަމުން އަންނަ އުފެއްދުމެއް. މިހާތަނަށް އެއްވެސް ގައުމަކުން މިފަދަ މައްސަލައެއް ފާހަގަ ނުކުރޭ،" ސަމްޔަންގްއިން ބުންޏެވެ.
ސަމްޔަންގްއަކީ ދެކުނު ކޮރެއާގައި އެކި އުފެއްދުންތައް މުޅި ދުނިޔޭގައި ވިއްކަމުން އަންނަ މަޝްހޫރު ކުންފުންޏެކެވެ. އެ ކުންފުނިންޏަކީ ކޮރެއާގައި 1960 ގައި އެންމެ ފުރަތަމަ އިންސްޓެންޓް ނޫޑުލްސް ވިއްކަން ފެށި ކުންފުންޏެވެ.
