ކުއަލަ ލަމްޕޫރް، މެލޭޝިއާ (ޑިސެމްބަރު 20) - މެލޭޝިއާ އަށް ބޯކޮށް ވާރޭވެހުމާ ގުޅިގެން ހަތް މީހުން މަރުވެ، 50،000 އަށް ވުރެ ގިނަ މީހުން ހާލުގައި ޖެހިއްޖެ އެވެ.
ފާއިތުވި ހަފުތާ ބަންދުގައި ހުއްޓުމެއް ނެތި ވާރޭ ވެހުމާ އެކު ފެންބޮޑުވެ ބައެއް އަވަށްތައް ވަނީ ފެނުއަޑީގަ އެވެ. އޭގެ އިތުރުން ބޮޑެތި މަގުތައް ބަންދުވެ، ގިނަ ބަޔަކު އެތައް ގަޑިއިރެއް ތިބީ އުޅަނދުތަކުގައި ތާށިވެފަ އެވެ.
ރަސްމީ ތަފާސްހިސާބު ދައްކާ ގޮތުން ހޯމަ ދުވަހުގެ ނިޔަލަށް 51،000 މީހުން ވަނީ ގެތަކުން ނެރި، ރައްކާތެރި ހިސާބުތަކަށް ބަދަލުކޮށްފަ އެވެ. އެންމެ ބޮޑަށް އަސަރުކޮށްފައިވާ އިރުމަތީގެ ޕަހާންގް ސްޓޭޓުން އެކަނިވެސް 32،000 މީހުން ގެތަކުން ނުކުންނަން ޖެހުނެވެ.
އޭގެ އިތުރުން އެންމެ މުއްސަނދި އަދި އެންމެ އާބާދީ ބޮޑު ސެލަންގޯ ސްޓޭޓަށް ވެސް ވަނީ ވަރަށް ބޮޑަށް އަސަރުކޮށްފަ އެވެ. ނަމަވެސް ވެރިރަށް ކުއަލަ ލަމްޕޫރް ވަށައިގެން އޮންނަ ސެލަންގޯ އަކީ އާއްމު ގޮތެއްގައި ފެންބޮޑުވުމުގެ މައްސަލަ ދިމާވާ ސްޓޭޓެއް ނޫނެވެ.
ސެލަންގޯގެ ޝާހް އަލަމްގައި ހާލުގައި ޖެހިފައި ތިބި މީހުން ސަލާމަތް ކުރަނީ. -- ފޮޓޯ: އޭއެފްޕީ
ދަ ސްޓާ ނޫހުން އޮފިޝަލުންނާ ހަވާލަދީ ބުނީ އެ ސްޓޭޓުން ހަތް މީހުން މަރުވެފައިވާ ކަމަށެވެ. ބައެއް މީހުން ހޯދުމުގެ މަސައްކަތް އަދިވެސް ދަނީ ކުރިއަށެވެ. ބެލެވޭ ގޮތުގައި މަރުވި މީހުންގެ އަދަދު ދާނީ އުފުލެމުންނެވެ.
ބޮޑު ވަޒީރު އިސްމާއިލް ސަބްރީ ޔައުގޫބް ވިދާޅުވީ ސެލަންގޯގައި އެއް ދުވަސް ތެރޭ އެއް މަހުގެ ވާރޭ ވެހުނު ކަމަށާއި އެހީވުމުގެ މަސައްކަތުގައި އެތައް ހާސް ސިފައިންނާއި ފުލުހުން އެބަ އުޅޭ ކަމަށެވެ.
ހޯމަ ދުވަހު ގިނަ ހިސާބުތަކަށް ވާރޭވެހުން ހުއްޓާލުމާ އެކު އާއްމުން ވަނީ ލިބިފައިވާ ގެއްލުންތައް ބަލަން ނުކުމެފަ އެވެ.
އަހަރުގެ ފަހުކޮޅު އާއްމުކޮށް މެލޭޝިއާ އަށް ބޯކޮށް ވާރޭވެހި ފެންބޮޑުވާން މެދުވެރިވެ އެވެ. ނަމަވެސް ފާއިތުވި ހަފުތާ ބަންދުގައި ފެންބޮޑުވެފައި ވަނީ ފަހުގެ ތާރީހެއްގައި ފެންބޮޑުނުވާހާ ބޮޑުކޮށެވެ.
ދުނިޔޭގެ އެކި ގައުމުތަކުގައި ކުރިއަށް ވުރެ ބޮޑަށް ފެންބޮޑުވުމުގެ މައްސަލަ ދިމާވަނީ މޫސުމީ ބަދަލާ ހެދި ކަމަށް ސައިންސްވެރިން ބުނެ އެވެ.
