ހަތްދިހަ ހަތް ކިލޯގެ ހެރޮއިންއާ އެކު އިންޑިއާ ކަނޑުން ޕާކިސްތާނުގެ ބޯޓެއް ހިފަހައްޓައިފި އެވެ.
ލަފާކުރެވޭ ގޮތުގައި އެއީ 52 މިލިއަން ޑޮލަރުގެ މަސްތުވާތަކެއްޗެވެ. އެ ބޯޓު ގުޖަރާތު ކައިރިން ހުއްޓުވީ އިންޑިއާ ކޯސްޓުގާޑާއި އެންޓި ޓެރަރިޒަމް ފުލުހުން ގުޅިގެންނެވެ.
އަލް ހުސެއިނީ ނަމަކަށް ކިޔާ އެ ބޯޓުގައި ތިބި ހަ ފަޅުވެރިން ވަނީ ހައްޔަރުކޮށްފަ އެވެ. ފުލުހުންގެ ތަހުގީގަށް ބޯޓު ވަނީ ގުޖަރާތު ސްޓޭޓުގެ ކުޗް ޑިސްޓްރިކްޓަށް ގެންގޮސްފަ އެވެ.
ފަހަކަށް އައިސް އިންޑިއާ އިން އަންނަނީ ގިނަ އަދަދެއްގެ މަސްތުވާތަކެތި އަތުލައިގަންނަމުންނެވެ. އެގޮތުން މީގެ ތިން މަސް ކުރިން ގުޖަރާތުގެ މުންދްރާ ބަނދަރުން ގާތްގަނޑަކަށް ތިން ޓަނުގެ ހެރޮއިން ހިފެހެއްޓި އެވެ.
އޭގެ ކުރިން އޭޕްރިލް މަހު ވެސް 30 ކިލޯގެ ހެރޮއިންއާ އެކު ގުޖަރާތު ކައިރިން ޕާކިސްތާނުގެ ބޯޓެއް ހިފެހެއްޓި އެވެ. ސެޕްޓެމްބަރު މަހު ވިހި މިލިއަން ޑޮލަރުގެ ހެރޮއިންއާ އެކު ސްރީ ލަންކާއަށް އެތެރެވާން އުޅުނު އީރާނުގެ ބޯޓެއް ވެސް އިންޑިއާ އިން ހިފެހެއްޓި އެވެ.
ހަމަ އެ މަހު މަގުމަތީގެ އަގުން 2.7 ބިލިއަން ޑޮލަރަށްވާ ތިން ޓަނުގެ ހެރޮއިން އަފްގާނިސްތާން މަގުން އިންޑިއާއަށް އެތެރެކުރަން އުޅަނިކޮށް ހިފެހެއްޓި އެވެ.
