ސުރިގާއޯ ސިޓީ، ފިލިޕީންސް (ޑިސެމްބަރު 20) - މި އަހަރު ފިލިޕީންސް އަށް އެރި އެންމެ ބާރުގަދަ ތޫފާނުގައި މަރުވި މީހުންގެ އަދަދު 200 އިން މައްޗަށް އަރައިފި އެވެ.
ފިލިޕީންސް ރެޑް ކްރޮސް އިން ބުނީ އައްސޭރިފަށުގެ ހިސާބުތައް އެއްކޮށް ސުންނާފަތިވެފައިވާ ކަމަށެވެ. ބައެއް ހިސާބުތަކުން ކަރަންޓާއި މުއާސަލާތީ ހިދުމަތްތައް ކެނޑި، އިމާރާތްތަކުގެ ފުރާޅު އެއްލާލައި، ބިޔަ ކަރަންޓު ދަގަނޑުތައް ވެއްޓިފައި ވެ އެވެ.
ބައެއް ހިސާބުތަކަށް ލިބިފައިވާ ގެއްލުމަކީ 2013 ވަނަ އަހަރު އެރި ތޫފާން ހައްޔާންގައި ލިބުނު ފަދަ ބޮޑެތި ގެއްލުންތަކެއް ކަމަށް ދަނީ ސިފަކުރަމުންނެވެ. ތޫފާން ހައްޔާން، ނުވަތަ ފިލިޕީންސްގައި ކިޔާ ނަމުން ނަމަ ތޫފާން ޔޮލާންޑާ، އަކީ އެ ގައުމުގެ ތާރީހުގައި އެރި އެންމެ ބާރުގަދަ ތޫފާނެވެ.
ފުލުހުން ބުނީ މިހާތަނަށް 208 މީހުން މަރުވެފައި ވާއިރު 52 މީހުން ހޯދުމުގެ މަސައްކަތް ކުރިއަށްދާ ކަމަށެވެ. އޭގެ އިތުރުން އެތައް ސަތޭކަ ބަޔަކަށް ވަނީ އަނިޔާވެފަ އެވެ.
ތޫފާން ރާއީ އެރުމުގެ ކުރިން 300،000 އަށް ވުރެ ގިނަ މީހުން ގެތަކާއި އައްސޭރިފަށުގެ ރިސޯޓުތައް ދޫކޮށް ރައްކާތެރި ހިސާބުތަކަށް ބަދަލުވި އެވެ. ބުރާސްފަތި ދުވަހު އެރި ތޫފާނުގައި ފިލިޕީންސްގެ ދެކުނާއި މެދުތެރޭގެ ހިސާބުތަކަށް ބޮޑެތި ގެއްލުންތައް ލިބުނެވެ.
ސުރިގާއޯ ސިޓީގެ އައްސޭރިފަށުގައި އުޅޭ ރައްޔިތުން ބުނީ އެ މީހުން ތިބީ ހާލުގައި ޖެހިފައި ކަމަށާއި ބޯފެނާއި ކާބޯތަކެތި ވެސް ނެތް ކަމަށެވެ. އެ ސިޓީގެ އިތުރުން ދެން އެންމެ ބޮޑަށް އަސަރު ކުރީ ފަތުރުވެރިންގެ މެދުގައި މަގްބޫލް ބޮހޯލް ރަށަށެވެ.
ހާލުގައި ޖެހިފައިވާ މީހުން ފެން ހޯދަން ކިޔުގައި މަޑުކޮށްގެން. -- ފޮޓޯ: އޭއެފްޕީ
ބޮހޯލް ރަށުގެ ގަވަރުނަރު އާތާ ޔެޕް ފޭސްބުކްގައި ވިދާޅުވީ އެ ރަށުގެ އަވަށްތަކުން 80 މީހުން މަރުވެފައިވާ ކަމަށެވެ. އެ ރަށުގެ ޔުބޭ އަވަށް އެއްކޮށް ސުންނާފަތިވެފައި ވާއިރު، އެ ތަނުގައި ވަނީ ކުއްލި ނުރައްކާ އިއުލާނުކޮށްފަ އެވެ.
ގަޑިއަކުން 195 ކިލޯމީޓަރުގެ ވަޔާ އެކު އެރި ތޫފާނުގެ އަސަރު އެންމެ ބޮޑަށް ކުރީ ސިއަރްގާއީ، ޑިނަގަތް އަދި މިންޑަނާއޯ ރަށްތަކަށެވެ. އާއްމުންނަށް އެހީވާން ކުރާ މަސައްކަތަށް ހުރަސް އެޅިފައި ވަނީ އަދިވެސް ގިނަ ހިސާބުތަކަށް މުއާސަލާތީ ހިދުމަތްތައް ނުލިބޭތީ އެވެ.
ބައެއް އާއްމުން ވަނީ ސަރުކާރުން އަޅަމުންދާ ފިޔަވަޅުތަކާ މެދު ހިތްހަމަނުޖެހުން ފާޅުކޮށްފަ އެވެ. ރައީސް ރޮޑްރިގޯ ޑުޓާޓޭ ތޫފާނުގެ އަސަރު ކުރި ބައެއް ހިސާބުތަކަށް އާދީއްތަ ދުވަހު ވަޑައިގެން ވިދާޅުވީ އެހީގެ މަސައްކަތަށް 40 މިލިއަން ޑޮލަރު ހާއްސަ ކުރައްވާނެ ކަމަށެވެ.
ތޫފާނުގެ އަސަރު އެންމެ ބޮޑަށް ކުރި ހިސާބުތަކުގައި އެހީވުމަށް އެތައް ހާސް ސިފައިންނާއި، ފުލުހުން އަދި ކޯސްޓުގާޑާއި އަލިފާން ނިއްވާ ފުލުހުން ދަނީ ހަރަކާތްތެރިވަމުންނެވެ. ކާބޯތަކެއްޗާއި، ފެން އަދި ބޭސް ހިފައިގެން ބޯޓުތަކާއި ވައިގެ އުޅަނދުތައް ވަނީ އެކި ސަރަހައްދުތަކަށް ގޮސްފަ އެވެ.
ތޫފާން ރާއީ އަށް ފިލިޕީންސްގައި ދީފައިވާ ނަމަކީ "އޮޑެޓް" އެވެ. އަހަރުގެ ފަހުކޮޅު އާއްމުކޮށް ފިލިޕީންސް އަށް ތޫފާން ނާރަ އެވެ. ތޫފާން އަރާ މޫސުމުގެ ގޮތުގައި ފާހަގަވެފައި އޮންނަނީ ޖުލައި މަހުން އޮކްޓޯބަރު މަހަށެވެ.
