ކުއަލަ ލަމްޕޫރް، މެލޭޝިއާ (ޑިސެމްބަރު 19) - ދެ ދުވަސް ވަންދެން ބޯކޮށް ވާރޭވެހުމުގެ ސަބަބުން މެލޭޝިއާގައި ފެންބޮޑުވެ، އެތައް ހާސް ބަޔަކު ހާލުގައި ޖެހިއްޖެ އެވެ.
ހުކުރު ދުވަހު ވެހެން ފެށި ވާރޭގައި މުޅި މެލޭޝިއާގެ އެކި ހިސާބުތަކުގައި ވަރަށް ބޮޑަށް ފެންބޮޑުވި އެވެ. އޭގެ ސަބަބުން މަގުތަކާއި ހައިވޭތައް ވެސް ބަންދުވި އެވެ.
އަހަރުގެ ފަހުކޮޅު އާއްމުކޮށް މެލޭޝިއާ އަށް ބޯކޮށް ވާރޭވެހި ފެންބޮޑުވާން މެދުވެރިވެ އެވެ. އެހެންވެ، މި ދުވަސްވަރާ ދިމާކޮށް ގިނަ ބަޔަކު ރައްކާތެރި ހިސާބުތަކަށް ވެސް ބަދަލުވާން ޖެހެ އެވެ.
ސެންގޯ ސްޓޭޓުގެ ޗީފް މިނިސްޓަރު އަމީރުއްދީން ޝާރީ ވިދާޅުވީ އެ ސްޓޭޓުން 3،500 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކުރި ކަމަށެވެ. އެ ސްޓޭޓަށް ކުރި ވިއްސާރަ އަކީ "އާދަޔާ ހިލާފު މޫސުމެއް"ގެ ގޮތުގައި އޭނާ ސިފަކުރެއްވި އެވެ.
މީޓިއޮރޮލޮޖިކަލް ޑިޕާޓްމަންޓުން އިންޒާރު ދިން ގޮތުގައި އާދީއްތަ ދުވަހު ވެސް މެލޭޝިއާގެ 16 ސްޓޭޓުގެ ތެރެއިން 12 ސްޓޭޓަށް ބޯކޮށް ވާރޭވެހޭނެ ކަމަށް ބެލެވެ އެވެ.
އާއްމުން ރައްކާތެރި ހިސާބުތަކަށް ބަދަލުކޮށް، އެހީތެރިކަން ފޯރުކޮށްދިނުމަށް ސިފައިންނާއި ފުލުހުން އަދި އެހެނިހެން ސެކިއުރިޓީ އެޖެންސީތައް ނުކުތުމަށް ބޮޑު ވަޒީރު އިސްލާމިލް ސަބްރީ ޔައުގޫބް ވަނީ އަމުރުކުރައްވާފަ އެވެ.
ފަހުގެ ތާރީހެއްގައި މެލޭޝިއާގައި އެންމެ ބޮޑަށް ފެންބޮޑުވީ 2014 ވަނަ އަހަރު އެވެ. އެ ފަހަރު 118،000 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުވާން ޖެހުނެވެ.
