ދޮށީ އުމުރުގެ މީހުން ދިރިއުޅުމަށް ހާއްސަ އިޖްތިމާއީ މަރުކަޒުތައް ބިނާ ކުރުމަށް ފައިސާ ލިބުނުތާ އެއް އަހަރު ފާއިތުވިއިރު ވެސް އިމާރާތްތައް އެޅުމުގެ މަސައްކަތް ފަށާފައިނުވާ ކަމަށް ޖެންޑާ މިނިސްޓްރީން ބުނެފި އެވެ.
ޖެންޑާ މިނިސްޓްރީގެ ކޮމިއިނުކޭޝަންސް ޑިރެކްޓަރު ރިޒްނާ ޒަރީރު ވިދާޅުވީ ރެޒިޑެންޝަލް ކެއާ ހޯމްސް އެޅުމަށް އޭޝިއަން ޑިވެލޮޕްމަންޓު ބޭންކުން ފައިސާ ހަމަޖެހުނުތާ އެއް އަހަރާއި އެއް މަހަށްވުރެ ގިނަ ދުވަސްވެފައިވާއިރު، އެ އޮފީހުން މިހާތަނަށް ކުރި މަސައްކަތަކީ އިމާރާތް އަޅާނެ ބިން ހަމަޖެއްސުން ކަމަށެވެ.
ރިޒްނާ ވިދާޅުވީ ރެޒިޑެންޝަލް ކެއާ ހޯމްސް އަޅާނީ މާލެ އާއި އައްޑޫގައި ކަމަށެވެ. އަދި އެތަންތަނުގެ ބިންގާ އަޅާނީ 2022 ވަނަ އަހަރުގެ މެދު ތެރޭގައި ކަމަށް އޭނާ ވިދާޅުވި އެވެ.
މިހާރު ކުރިއަށްދަނީ ޑިޒައިނިންގެ މަސައްކަތްތަކާ އެ ކަންތައްތައް. އަންނަ އަހަރުގެ މެދު ތެރޭ ހިސާބަށް ބިންގާ އަޅާނީ،" ރިޒްނާ ވިދާޅުވި އެވެ.
ރެޒިޑެންޝަލް ކެއާ ހޯމްސް އެޅުމަށް އޭޑީބީން ފައިސާ ހަމަޖެހިފައިވާ ކަމަށް ޖެންޑާ މިނިސްޓްރީގެ ޑެޕިއުޓީ ޑިރެކްޓާ ޖެނެރަލް އަކްރަމް ހުސެއިން އިއުލާން ކުރެއްވީ މީގެ އެއް އަހަރު ކުރިން އޮކްޓޯބަރު 27، 2020 ގަ އެވެ.
"2020 ވަނަ އަހަރު މިހާތަނަށް 49 މައްސަލަ އުމުރުން ދުވަސްވީ މީހުންނަށް އިހުމާލުވެގެން ރިޕޯޓުކޮށްފައިވޭ. މި މައްސަލަތަކުގައި ހާލަތަށް ރިއާޔަތް ކުރުމަށް ފަހު އާއިލީ ވެށިން ރައްކާތެރިކަން ފޯރުކޮށްނުދެވޭ ނަމަ މި ބައިތިއްބަން ޖެހެނީ ހާއްސަ އެހީއަށް ބޭނުންވާ މަރުކަޒުގައި،" ކެއާ ހޯމްސް ރާއްޖެއަށް ބޭނުންވާ މިންވަރު ބުނެދެމުން އަކްރަމް ވިދާޅުވެފައިވެ އެވެ.
ރެޒިޑެންޝަލް ކެއާ ހޯމްސް އެޅުމަށް ލޯނު ހަމަޖެހިފައިވާ ކަމަށް އަކްރަމް އިއުލާން ކުރެއްވި ފަހުން، އުމުރުން ދޮށީ މީހުންނަށް އަޅާލުން ނުލިބެގެން 57 މައްސަލައެއް ޖެންޑާ މިނިސްޓްރީއަށް ހުށަހަޅާފައިވެ އެވެ.
އެހީއަށް ބޭނުންވާ ދޮށީ އުމުރުގެ މީހުން ދައުލަތުގެ ފަރާތުން މިހާރު ބަހައްޓަނީ ހާއްސަ އެހީއަށް ބޭނުންވާ މީހުން ގެންގުޅޭ ކ. ގުރައިދޫ މަރުކަޒުގަ އެވެ. އެތަނުގައި މިވަގުތު ވެސް ދޮށީ އުމުރުގެ 25 މީހުން ތިބިއިރު އެމީހުން ބައިތިއްބަނީ ނަފްސާނީ އަދި ސިކުނޑީގެ މައްސަލަތަކާ ގުޅިގެން މަރުކަޒަށް ލާފައި ތިބި މީހުންނާއެކު އެވެ.
ނަމަވެސް ގުރައިދޫ މަރުކަޒަކީ ދޮށީ އުމުރުގެ މީހުން ބައިތިއްބަން އެކަށީގެންވާ ތަނެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެސް ވަނީ ވިދާޅުވެފަ އެވެ. މަންފާ ސެންޓަރަށް 15 އަހަރު ފުރުން ފާހަގަ ކުރުމަށް އޭޕްރީލް 20، 2019 ގައި ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ ދޮށީ އުމުރުގެ މީހުންނަށް ބޭނުންވަނީ "ވަސީލަތްތައް ތަނަވަސް" މަރުކަޒެއް ކަމަށެވެ.
"އަޅުގަނޑުމެން ގަބޫލުކުރަން، ގުރައިދޫގައި ހުންނަ މަރުކަޒަކީ، ދޮށީ އުމުރުގެ މީހުން ގެންގުޅެން އެންމެ އެކަށީގެންވާ ތަނެއް ނޫން. އެއަށްވުރެ ފެންވަރު ރަނގަޅު، އަދި ވަސީލަތްތައް ތަނަވަސް ތަނެއް އެކަމަށް ބޭނުންވޭ. އެފަދަ މަރުކަޒަކުން، އެ ޢުމުރުގެ މީހުންގެ ހެލްތު ސްކްރީން ހަދައި، ސިއްހީ ހާލަތު ވަޒަން ކުރެވޭނެ ގޮތްތައް ހުންނަންޖެހޭނެ،" ރައީސް ވިދާޅުވެފައިވެ އެވެ.
ދޮށީ އުމުރުގެ މީހުން ދިރިއުޅޭނެ ހާއްސަ ތަންތަން އެޅުމަކީ ރައީސް ސޯލިހުގެ ވަރަށް ހާއްސަ ރިޔާސީ ވައުދުފުޅެކެވެ. ރައީސް އޮފީހުގެ ވެބްސައިޓުގައިވާ ގޮތުން ރައީސް ސޯލިހުގެ ރިޔާސީ ދައުރު ނިމުމުގެ ކުރިން "ދޮށީ އުމުރުގެ މީހުންނަށް ހާއްސަ އިޖްތިމާއީ މަރުކަޒުތައް ގާއިމްކޮށްދިނުން" އެއީ އެމަނިކުފާނުގެ ވައުދުފުޅެކެވެ.
