މެނީލާ، ފިލިޕީންސް (ޑިސެމްބަރު 19) - މި އަހަރު ފިލިޕީންސް އަށް އެރި އެންމެ ބާރުގަދަ ތޫފާނުގައި މަރުވި މީހުންގެ އަދަދު 75 އަށް އަރައިފި އެވެ.
ތޫފާން ރާއީ އެރުމުގެ ކުރިން 300،000 އަށް ވުރެ ގިނަ މީހުން ގެތަކާއި އައްސޭރިފަށުގެ ރިސޯޓުތައް ދޫކޮށް ރައްކާތެރި ހިސާބުތަކަށް ބަދަލުވި އެވެ. ބުރާސްފަތި ދުވަހު އެރި ތޫފާނުގައި ފިލިޕީންސްގެ ދެކުނާއި މެދުތެރޭގެ ހިސާބުތަކަށް ބޮޑެތި ގެއްލުންތައް ލިބުނެވެ.
ބައެއް ހިސާބުތަކުން ކަރަންޓާއި މުއާސަލާތީ ހިދުމަތްތައް ކެނޑި، އިމާރާތްތަކުގެ ފުރާޅު އެއްލާލައި، ބިޔަ ކަރަންޓު ދަގަނޑުތައް ވެއްޓިފައިވާ ކަމަށް ރިޕޯޓުތައް ބުނެ އެވެ.
ބައެއް ބޮޑެތި މަގުތަކުގައި ހުރި ކަރަންޓު ދަގަނޑުތައް ވަނީ ވެއްޓިފައި. -- ފޮޓޯ: އޭއެފްޕީ
ފަތުރުވެރިންގެ މެދުގައި މަގްބޫލް ބޮހޯލް ރަށުގެ ގަވަރުނަރު އާތާ ޔެޕް ފޭސްބުކްގައި ވިދާޅުވީ އެ ރަށުގެ އަވަށްތަކުން 49 މީހުން މަރުވެފައިވާ ކަމަށެވެ. އެއާއެކު މަރުވި މީހުންގެ ޖުމްލަ އަދަދު ވަނީ 75 އަށް އަރާފަ އެވެ.
ޔެޕް ވިދާޅުވީ 10 މީހުން ގެއްލިގެން ހޯދަމުންދާ ކަމަށާއި 13 މީހުންނަށް ފަރުވާދެމުންދާ ކަމަށެވެ. ބުރާސްފަތި ދުވަހު ތޫފާން ރާއީ އެރީ ގަޑިއަކު 195 ކިލޯމީޓަރުގެ ވަޔާ އެކު އެވެ.
"މުއާސަލާތީ ހިދުމަތްތައް އަދިވެސް އިއާދަނުކުރެވޭ. ރަށުގެ 48 މޭޔަރުންގެ ތެރެއިން މިހާތަނަށް ގުޅިފައި ވަނީ 21 މޭޔަރުންނަށް،" މަރުވި މީހުންގެ އަދަދު އިތުރުވާނެ ކަމަށް ލަފާކޮށް، ޔެޕް ވިދާޅުވި އެވެ.
ތޫފާނުގެ އަސަރު އެންމެ ބޮޑަށް ކުރި ހިސާބުތަކުގައި އެހީވުމަށް އެތައް ހާސް ސިފައިންނާއި، ފުލުހުން އަދި ކޯސްޓުގާޑާއި އަލިފާން ނިއްވާ ފުލުހުން ދަނީ ހަރަކާތްތެރިވަމުންނެވެ.
އެހީގެ ސާމާނު ހިފައިގެން ސިފައިންގެ ބޯޓެއް ހޯމަ ދުވަހު ބޮހޯލް ރަށަށް ފުރާނެ އެވެ. އެ ރަށުގެ އިތުރުން ސިއަރްގާއޯ، ޑިނަގަތް އަދި މިންޑަނާއޯ އަށް ވެސް ބޮޑެތި ގެއްލުންތައް ލިބިފައި ވެ އެވެ.
ސިއަރްގާއޯ ރަށަށް ލިބިފައިވާ ގެއްލުން. -- ފޮޓޯ: އޭއެފްޕީ
ފަތުރުވެރިންނާއި ރާޅާއެރުންތެރިންގެ މެދުގައި މަގްބޫލު ސިއަރްގާއީ ރަށުގެ މަތިން ނަގާފައިވާ ފޮޓޯތަކުން އިމާރާތްތަކުގެ ފުރާޅު ނެތް މަންޒަރާއި، ހަނޑޫ ބިންތައް ފެނު އަޑީގައިވާ މަންޒަރު ފެނެ އެވެ.
ޑިނަގަތްގެ ގަވަރުނަރު އާރްލީން ބަގައޯ ވިދާޅުވީ އެ ރަށަށް ލިބިފައިވާ ގެއްލުމަކީ 2013 ވަނަ އަހަރު އެރި ތޫފާން ހައްޔާންގައި ލިބުނު ފަދަ ބޮޑެތި ގެއްލުންތަކެއް ކަމަށެވެ.
ތޫފާން ހައްޔާން، ނުވަތަ ފިލިޕީންސްގައި ކިޔާ ނަމުން ނަމަ ތޫފާން ޔޮލާންޑާ، އަކީ އެ ގައުމުގެ ތާރީހުގައި އެރި އެންމެ ބާރުގަދަ ތޫފާނެވެ. އެ ފަހަރު 7،300 މީހުން މަރުވި އެވެ.
ތޫފާން ރާއީ ފިލިޕީންސްގެ ތެރެއިން ދަތުރު ކުރަމުން ދިޔައިރު، ވައިގެ ސްޕީޑް ވަނީ ގަޑިއަކު 150 ކިލޯމީޓަރަށް ދަށްވެފަ އެވެ. ދެކުނު ޗައިނާ ކަނޑަށް ފައިބައިގެން ތޫފާނުގެ މިސްރާބު މިހާރު ހުރީ ވިއެޓްނާމްއާ ދިމާލަށެވެ.
