ޖެނީވާ، ސްވިޓްޒަލޭންޑް - ސައިބީރިއާގައި 2020 ވަނަ އަހަރު ރިކޯޑް ކުރި 38 ޑިގްރީ ސެލްސިއަސްގެ ފިނިހޫނުމިނަކީ އާކްޓިކް ސަރަހައްދަކަށް ރިކޯޑް މިންވަރަށް ހޫނުވުން ކަމަށް އދ. އިން ކަނޑައަޅައިފި އެވެ.
ރަޝިއާގެ ވޭރްހޮޔޭންސްކް އަވަށަށް 38 ޑިގްރީ ސެލްސިއަސް އަށް ހޫނުވި ކަމަށް ރިކޯޑް ކުރީ ޖޫން، 20، 2020 ވަނަ އަހަރު އެވެ. ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) އިން ބުނީ އެއީ އާކްޓިކް ސާކަލްގައި ހިމެނޭ ތަނަކަށް އެހާ ހޫނުވި ފުރަތަމަ ފަހަރު ކަމަށެވެ.
އާދަޔާ ހިލާފަށް ހޫނުވާ ތަންތަނުގެ ރިޕޯޓުތަކުގެ ތެރޭގައި އާކްޓިކްގެ ފިނިހޫނުމިނެއް ހިމެނި މިއީ ފުރަތަމަ ފަހަރަށެވެ. ޑަބްލިއުއެމްއޯގެ ވެރިޔާ ޕެޓެރީ ޓާލަސް ވަނީ މޫސުމީ ބަދަލާ ހެދި ފެންނަމުންދާ އަސަރުތަކާ މެދު ކަންބޮޑުވުން ފާޅުކުރައްވާފަ އެވެ.
ވޭރްހޮޔޭންސްކް އަކީ އާކްޓިކް ސާކަލްގެ 115 ކިލޯމީޓަރު އުތުރުން އޮންނަ ރަޝިއާގެ އަވަށެކެވެ. އެ ތަނުގެ ފިނިހޫނުމިން ރިކޯޑް ކުރަން ފެށީ 1885 ވަނަ އަހަރު އެވެ.
އެ ތަނަށް ރިކޯޑް މިންވަރަށް ހޫނުވީ 2020 ވަނަ އަހަރުގެ ހޫނު މޫސުމުގައި ދިގުދެމިގެންދާ "ހީޓްވޭވް" ކުރިމަތިވެގެން އުޅެނިކޮށެވެ. ޑަބްލިއުއެމްއޯ އިން ބުނީ 38 ޑިގްރީ ސެލްސިއަސް އަކީ "މެޑިޓެރޭނިއަން ހިސާބެއްގެ" ފިނިހޫނުމިން ކަމަށެވެ.
އެ އަހަރުގެ "ހީޓްވޭވް" ގެ ތެރޭގައި ސައިބީރިއާގެ އެވްރެޖް ފިނިހޫނުމިން ހުރީ އެ ތަނުގެ "ނޯމަލް" ފިނިހޫނުމިނަށް ވުރެ 10 ޑިގްރީ ސެލްސިއަސް މަތީގަ އެވެ. އޭގެ ސަބަބުން ގިނަ އަދަދަކަށް ގަނޑުފެން ވިރި، އަލިފާންގަނޑުތައް ވެސް ރޯވި އެވެ.
ސައިބީރިއާ އަށް ދިމާވި "ހީޓްވޭވް" ގެ ސަބަބުން 2020 ވަނަ އަހަރަކީ މިހާތަނަށް ރިކޯޑް ކުރި އެންމެ ހޫނު އެއް އަހަރަށް ވެސް ވަނީ ވެފަ އެވެ.
އާކްޓިކްގެ އިތުރުން އެންޓާކްޓިކް ބައްރަށް ވެސް 2020 ވަނަ އަހަރު ރިކޯޑް މިންވަރަށް ހޫނުވި އެވެ. ޑަބްލިއުއެމްއޯ އިން ބުނީ 2020 ވަނަ އަހަރު އެންޓާކްޓިކްގެ ފިނިހޫނުމިން 18.3 ޑިގްރީ ސެލްސިއަސް އަށް އެރި ކަމަށެވެ.
ވިހި ވިހި ވަނަ އަހަރާއި ވިހި އެކާވީސް ވަނަ އަހަރު އެންމެ ހޫނުވީ ކެލިފޯނިއާގެ ޑެތް ވެލީ އަށް ކަމަށް ވެ އެވެ. އެ ތަނުގެ ފިނިހޫނުމިން 54.4 ޑިގްރީ ސެލްސިއަސް އަށް އެރި އެވެ. ނަމަވެސް ޑަބްލިއުއެމްއޯ އިން ދަނީ އެ މައުލޫމާތު ކަށަވަރު ކުރުމުގެ މަސައްކަތް ކުރަމުންނެވެ.
