ޗޭބޫ، ފިލިޕީންސް (ޑިސެމްބަރު 17) - މި އަހަރު ފިލިޕީންސް އަށް އެރި އެންމެ ބާރުގަދަ ތޫފާނުގައި 12 މީހުން މަރުވެ، ބޮޑެތި ގެއްލުންތަކެއް ލިބިފައިވާ ކަމަށް ޑިޒާސްޓާ އެޖެންސީން ބުނެފި އެވެ.
ތޫފާން ރާއީ އެރުމުގެ ކުރިން 300،000 އަށް ވުރެ ގިނަ މީހުން ގެތަކާއި އައްސޭރިފަށުގެ ރިސޯޓުތައް ދޫކޮށް ރައްކާތެރި ހިސާބުތަކަށް ބަދަލުވި އެވެ. ބުރާސްފަތި ދުވަހު އެރި ތޫފާނުގައި ފިލިޕީންސްގެ ދެކުނާއި މެދުތެރޭގެ ހިސާބުތަކަށް ބޮޑެތި ގެއްލުންތައް ލިބުނެވެ.
ގަޑިއަކު 195 ކިލޯމީޓަރުގެ ގަދަވަޔާ އެކު ބުރާސްފަތި ދުވަހު ސިއާރްގާއޯ ރަށަށް އެރި ރާއީ އަކީ "ސުޕާ" ތޫފާނެކެވެ. މޫސުމީ އިދާރާ އިން ބުނީ ހުކުރު ދުވަހު ވައިގެ ސްޕީޑް ގަޑިއަކު 150 ކިލޯމީޓަރަށް ދަށްވި ކަމަށެވެ.
ފެންބޮޑުވެފައިވާ ހިސާބަކުން ކުއްޖަކު ސަލާމަތް ކުރަނީ. -- ފޮޓޯ: އޭއެފްޕީ
"ސިއަރްގާއޯ ރަށަށް ވަނީ ވަރަށް ބޮޑެތި ގެއްލުންތަކެއް ލިބިފައި،" ނޭޝަނަލް ޑިޒާސްޓާ އެޖެންސީގެ އެގްޒެކްޓިވް ޑިރެކްޓަރު ރިކާޑޯ ޖަލަޑް ނޫސްވެރިންނަށް ވިދާޅުވި އެވެ.
ޖަލަޑް ވިދާޅުވީ ތޫފާނުގައި 12 މީހުން މަރުވިކަމުގެ ރިޕޯޓު ލިބިފައިވާ ކަމަށާއި ވިސަޔާސް އާއި ދެކުނުގައި މިންޑަނާއޯ އަށް ފަހު ތޫފާން އެރީ ފަތުރުވެރިންގެ މެދުގައި މަގްބޫލު ޕަލަވަން ރަށަށް ކަމަށެވެ.
ތޫފާނާ ގުޅިގެން ހިނގި ބިންގަނޑު ކަނޑައިގެން ދިޔުމުގެ ހާދިސާތަކުގައި މަގުތައް ބަންދުވެފައި ވާއިރު، ގަސްތައް މުލުން ލުހި، ކަރަންޓު ދަގަނޑުތައް ވެސް ވަނީ ވެއްޓިފަ އެވެ.
ވަގުތީ ހިޔާތަކަށް ބަދަލުވި ގިނަ މީހުން އަނބުރާ ގެތަކަށް މިހާރު ބަދަލުވެފައި ވާއިރު، 18،000 މީހުން އަދިވެސް ތިބީ ވަގުތީ ހިޔާގައި ކަމަށް ޑިޒާސްޓާ އެޖެންސީން ބުންޏެވެ.
"މުޅި މަންޒަރު އަދިވެސް ރަނގަޅަކަށް ނުފެނޭ. އެކަމަކު ސާފުވާ ކަމަކީ ބޮޑެތި ގެއްލުންތައް ލިބިފައިވާކަން،" ފިލިޕީންސްގެ ރެޑް ކްރޮސްގެ ވެރިޔާ އަލްބޭޓޯ ބޮކަނެގްރާ ވިދާޅުވި އެވެ.
ބޮކަނެގްރާ ވިދާޅުވީ ސިއަރްގާއޯ ރަށުގެ މުއާސަލާތީ ހިދުމަތްތައް އަދިވެސް މެދުކެނޑިފައި ވާތީ އެ ތަނުގެ ހާލަތާ މެދު ކަންބޮޑުވާ ކަމަށެވެ. ކޯސްޓުގާޑުން އާއްމު ކުރި އެ ރަށުގެ ފޮޓޯތަކުން ފެންނަނީ ބޮޑެތި ގެއްލުން ވެފައި ވަނިކޮށެވެ.
ފަތުރުވެރިންނާއި ރާޅާއެރުންތެރިންގެ މެދުގައި މަގްބޫލު އެ ރަށުގެ މަތިން ނަގާފައިވާ ފޮޓޯތަކުން އިމާރާތްތަކުގެ ފުރާޅު ނެތް މަންޒަރާއި، ހަނޑޫ ބިންތައް ފެނު އަޑީގައިވާ މަންޒަރު ފެނެ އެވެ.
ސިއަރްގާއޯ ރަށަށް ލިބިފައިވާ ގެއްލުން. -- ފޮޓޯ: އޭއެފްޕީ
ސުރިގާއޯ ސިޓީގެ މޭޔަރު ވިދާޅުވީ 170،000 މީހުން ދިރިއުޅޭ އެ ސިޓީ ގިނަ އިރުތަކެއް ވަންދެން އޮތީ ފެނު އަޑީގައި ކަމަށާއި "އާދަޔާ ހިލާފަށް ބާރަށް" ވައި ޖެހުމުން ދިޔަ ކަމަށެވެ.
ތޫފާނާ ހެދި ގިނަ ފްލައިޓްތަކެއް ކެންސަލްކޮށް ބައެއް ބަނދަރުތައް ވެސް ވަނީ ވަގުތީ ގޮތުން ބަންދުކޮށްފަ އެވެ. މޫސުމާ ބެހޭ އިދާރާ އިން އިންޒާރުދިން ގޮތުގައި މީޓަރަކަށް ވުރެ އުސް ރާޅާ އެކު އުދަ އަރައި، އައްސޭރި ފަށުގެ ހިސާބުތަކުގައި "ފުރާނަ އަށް ނުރައްކާ މިންވަރަށް" ފެންބޮޑުވާނެ އެވެ.
ތޫފާން ރާއީ އަށް ފިލިޕީންސްގައި ދީފައިވާ ނަމަކީ "އޮޑެޓް" އެވެ. އަހަރުގެ ފަހުކޮޅު އާއްމުކޮށް ފިލިޕީންސް އަށް ތޫފާން ނާރަ އެވެ. ތޫފާން އަރާ މޫސުމުގެ ގޮތުގައި ފާހަގަވެފައި އޮންނަނީ ޖުލައި މަހުން އޮކްޓޯބަރު މަހަށެވެ.
ފިލިޕީންސްގެ ވިސާޔާސް ސަރަހައްދުން ޕަލަވަން އާ ހަމައަށް ތޫފާން ހުކުރު ދުވަހު ދަތުރު ކުރި އިރު ބާރު ވަނީ ދަށްވެފަ އެވެ. ހޮނިހިރު ދުވަހު ދެކުނު ޗައިނާ ކަނޑުން ފައިބައިގެން ވިއެޓްނާމާ ދިމާލަށް މިސްރާބު ޖަހާނެ ކަމަށް ވަނީ ލަފާކޮށްފަ އެވެ.
