ޕެރިސް، ފްރާންސް (ޑިސެމްބަރު 16) - މި ވަގުތު ދުނިޔޭގެ އެކި ގައުމުތަކުގެ ޖަލުތަކުގައި 488 ނޫސްވެރިން ބަންދުކޮށްފައި އެބަ ތިބި ކަމަށާއި އެއީ ރިކޯޑް އަދަދެއް ކަމަށް ރިޕޯޓާޒް ވިތައުޓް ބޯޑާޒް ޖަމިއްޔާ އިން ބުނެފި އެވެ.
ރިޕޯޓާޒް ވިތައުޓް ބޯޑާޒް އިން ނޫސްވެރިންނާ ގުޅޭ ތަފާސްހިސާބް ބަލަހައްޓަން ފެށީ މީގެ 25 އަހަރު ކުރިންނެވެ. އެ މުއްދަތުގައި އެންމެ ގިނަ އަދަދެއްގެ ނޫސްވެރިން ޖަލަށްލާފައި ވަނީ މި އަހަރު އެވެ.
އަނެއްކޮޅުން މި އަހަރު މަރާލާފައިވާ ނޫސްވެރިންގެ އަދަދަކީ މިހާތަނަށް ރިކޯޑު ކުރި އެންމެ ދަށް އަދަދެވެ. އެގޮތުން މި އަހަރުގެ މިހާތަނަށް 46 ނޫސްވެރިން މަރާލާފައި ވެ އެވެ. އެ ޖަމިއްޔާ އިން ބުނީ މަރުތައް މަދުވީ މެދުއިރުމަތީގައި ހަމަނުޖެހުންތައް ކުޑަވުމުން ކަމަށެވެ.
ރިޕޯޓާޒް ވިތައުޓް ބޯޑާޒް އިން ބުނީ 2020 ވަނަ އަހަރާ އަޅާ ބަލާއިރު މި އަހަރު ހައްޔަރު ކުރި ނޫސްވެރިންގެ އަދަދު 20 އިންސައްތަ އިތުރު ކަމަށެވެ. އޭގެ އިތުރުން މި އަހަރު ރިކޯޑް އަދަދަކަށް އަންހެން ނޫސްވެރިން ވެސް ހައްޔަރުކޮށްފައި ވެ އެވެ.
މި އަހަރު އެންމެ ގިނަ ނޫސްވެރިން ހައްޔަރު ކުރީ ޗައިނާ އިންނެވެ. އެ ގައުމުން 127 ނޫސްވެރިން ހައްޔަރުކޮށްފައި ވާއިރު، ހޮންކޮންގައި ތައާރަފް ކުރި ހަރުކަށި ގައުމީ ސަލާމަތާ ބެހޭ ގާނޫނަކީ އޭގެ އެއް ސަބަބު ކަމަށް ރިޕޯޓާޒް ވިތައުޓް ބޯޑާޒް އިން ބުންޏެވެ.
2021 ވަނަ އަހަރު އެންމެ ގިނަ ނޫސްވެރިން ހައްޔަރު ކުރި ގައުމުތައް
- ޗައިނާ - 127 ނޫސްވެރިން
- މިޔަންމާ - 53 ނޫސްވެރިން
- ވިއެޓްނާމް - 43 ނޫސްވެރިން
- ބެލަރޫސް - 32 ނޫސްވެރިން
- ސައުދީ އަރަބިއްޔާ - 31 ނޫސްވެރިން
2021 ވަނަ އަހަރު ނޫސްވެރިންނަށް އެންމެ ނުރައްކާތެރި ގައުމުތައް
- މެކްސިކޯ - 7 މަރު
- އަފްގާނިސްތާން - 6 މަރު
- ޔަމަން - 4 މަރު
- އިންޑިއާ - 4 މަރު
2021 ވަނަ އަހަރު އެންމެ ގިނަ ނޫސްވެރިން ރަހީނުކުރި ގައުމުތައް
- ސީރިއާ - 44 ނޫސްވެރިން
- އިރާގް - 11 ނޫސްވެރިން
- ޔަމަން - 9 ނޫސްވެރިން
