ދާޕާ، ފިލިޕީންސް (ޑިސެމްބަރު 16) - ބުރާސްފަތި ދުވަހު "ސުޕާ" ތޫފާން ފިލިޕީންސް އަށް އެރުމުގެ ކުރިން އެތައް ހާސް ބަޔަކު ގެތަކާއި ރިސޯޓުތައް ދޫކޮށް ރައްކާތެރި ހިސާބުތަކަށް ބަދަލުވެއްޖެ އެވެ.
ދެކުނު ސިއާރްގާއޯ ރަށަށް ފިލިޕީންސް ގަޑިން މެންދުރު 01:30 ގައި ތޫފާން އެރީ ގަޑިއަކު 195 ކިލޯމީޓަރުގެ ގަދަ ވަޔާ އެކު އެވެ.
"މި ފުރޭތައެއް ކަހަލަ ތޫފާނުގެ ބިރުވެރިކަން ވަރަށް ބޮޑު އަދި ބާރު ސްޕީޑުގައި ދާ ރޭލެއް ފަދައިން ގޮސް އައްސޭރިފަށުގެ ހިސާބުތަކަށް ލައްވާލާނެ ކަމަށް ބެލެވޭ،" ފިލިޕީންސްގައި ހުންނަ ރެޑް ކްރޮސް ވެރިޔާ އަލްބޭޓޯ ބޮކަނެގްރާ ވިދާޅުވި އެވެ.
މޫސުމާ ބެހޭ އިދާރާ އިން ލަފާކުރި ގޮތުގައި "ވަރަށް ގަދަ ވަޔާ ހެދި އިމާރާތްތަކާއި ދަނޑުތަކަށް ބޮޑެތި ގެއްލުން ވާނެ" އެވެ. އޭގެ އިތުރުން ބޮޑު ހިސާބެއްގައި ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތައް ހިނގާނެ ކަމަށް ވެސް ވަނީ ލަފާކޮށްފަ އެވެ.
ތޫފާން ދަތުރު ކުރާނެ ކަމަށް ބެލެވޭ ރޫޓުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް އަދިވެސް ދަނީ ކުރިއަށެވެ. ދާޕާ އަވަށުގައި ސްޕޯޓްސް ކޮމްޕްލެކްސް އެއް ވަގުތީ ހިޔާއަކަށް ބަދަލުކޮށް، ގިނަ އާއިލާތަކެއް ވަނީ އެތަނުގައި އުޅެން ފަށާފަ އެވެ.
ތޫފާނާ ހެދި ގިނަ ފްލައިޓްތަކެއް ކެންސަލްކޮށް ބައެއް ބަނދަރުތައް ވެސް ވަނީ ވަގުތީ ގޮތުން ބަންދުކޮށްފަ އެވެ. މޫސުމާ ބެހޭ އިދާރާ އިން އިންޒާރުދީފައިވާ ގޮތުގައި މީޓަރަކަށް ވުރެ އުސް ރާޅާ އެކު އުދަ އަރައި، އައްސޭރި ފަށުގެ ހިސާބުތަކުގައި "ފުރާނަ އަށް ނުރައްކާ މިންވަރަށް" ފެންބޮޑުވާނެ ކަމަށް ބެލެވެ އެވެ.
ފިލިޕީންސްގެ ވިސާޔާސް ސަރަހައްދާ ހިސާބަށް ތޫފާން ފޯރާއިރު ބާރު ދަށްވާނެ ކަމަށް ބެލެވެ އެވެ. އެއަށް ފަހު މިންޑަނާއޯ އަދި ޕަލަވަން އައިލެންޑްސް އަށް އަރައި، ދެކުނު ޗައިނާ ކަނޑުން ފައިބައިގެން ވިއެޓްނާމާ ދިމާލަށް މިސްރާބު ޖަހާނީ ހޮނިހިރު ދުވަހު އެވެ.
