ގޭބިސީތަކުން އުކާލާ ކުންޏަށް 62 މިލިއަނަށް ވުރެ ގިނަ ރުފިޔާ ނުލިބި އެބައޮތް ކަމަށާާއި އާންމު ފަރާތްތަކުން ހިދުމަތަށް އަގު ނުދެއްކުމަކީ ކުރިމަތިވެފައިވާ ބޮޑު ގޮންޖެހުމެއް ކަމަށް ވޭސްޓް މެނޭޖުމަންޓް ކޯޕަރޭޝަން (ވެމްކޯ) އިން ބުނެފި އެވެ.
"(މި އަހަރުގެ ސެބްޓެމްބަރު މަހުގެ ނިޔަލަށް) 80 މިލިއަން ރުފިޔާ އާންމު ފަރާތްތަކުން ނުލިބި އެބަ އޮތް، އޭގެ ތެރެއިން 62 މިލިއަން ރުފިޔާ އަކީ ގޭބިސީ ތަކުން ނުދައްކާ އޮތްވަރު،" ވެމްކޯގެ ޗީފް ފައިނޭންސް އޮފިސަރު އަބްދުލް ހަލީމް އަބްދުލް ގަފޫރު ވިދާޅުވި އެވެ.
އޮޑިޓް އޮފީހުގެ ވެބްސައިޓުގަ ދާދިފަހުން ހާމަކުރި ވެމްކޯގެ 2019 ވަނަ އަހަރުގެ އޮޑިޓް ރިޕޯޓުގަ ވާގޮތުން، އެ އަހަރު ވެމްކޯ އިން ދީފައިވައިވާ ހިދުމަތްތަކާއި ވިއްކާފައިވާ މުދަލަށް، 104 މިލިއަށް ރުފިޔާ ނުލިބި އެބައޮތެވެ. ނުލިބިވާ ފައިސާގެ ތެރެއިން 47.7 މިލިއަށް ރުފިޔާ އަކީ ސަރުކާރު ތަންތަނުން ލިބެން ޖެހޭ ފައިސާ އެވެ. އަދި 56 މިލިއަން ރުފިޔާ އަކީ އަމިއްލަ ފަރާތްތަކުން ލިބެން ޖެހޭ ފައިސާ އެވެ.
ވެމްކޯ އަށް ނުލިބިވާ ފައިސާގެ ތެރޭގައި ގަވާއިދުން ފައިސާ ނުދައްކާ ފަރާތްތަކުގެ 20 މިލިއަން ރުފިޔާ އާއި އެއްގޮތަކަށް ފައިސާ ނުދައްކާ ފަރާތްތަކުގެ ހަ މިލިއަން ރުފިޔާ ހިމެނޭ ކަމަށް 2019 ވަނަ އަހަރުގެ އޮޑިޓް ރިޕޯޓުގަ ފާހަގަ ކޮށްފައިވެ އެވެ.
ވަކިވަކި ކަސްޓަމަރުންގެ އަތުން ނުލިބި ހުރި ފައިސާގެ ބޮޑުވެގެން ގޮސްފައިވާ ކަމަށާއި މިގޮތުން 49 މިލިއަނަށްވުރެ ގިނަ ރުފިޔާ، 2019 ވަނަ އަހަރުގެ ނިޔަލަށް ނުލިބި އެބަހުރި ކަމަށް އޮޑިޓް އޮފީހުން ހާއްސަކޮށް ފާހަގަ ކޮށްފައިވެ އެވެ. އަދި އެ ކަސްޓަމަރުންނާ ގުޅޭ ފުރިހަމަ މައުލޫމާތު ލިބެން ނެތުމުން، އެ ކަސްޓަމަރުންގެ އަތުން ލިބެން ޖެހޭ ފައިސާގެ އެންމެ ފުރިހަމަ ތަފްސީލު ހޯދިފައި ނުވާކަމަށް ރިޕޯޓުގަ ބުނެފައިވެ އެވެ.
ވެމްކޯ އިން ބުނީ މިދިޔަ ސެޕްޓެމްބަރު މަހު ގަވާދިދަށް ބަދަލު ގެނެސް، ގޭގެ ވެރިފަރާތުން ހިދުމަތަށް ރަޖިސްޓްރީ ކުރަން ޖެހޭ ގޮތަށް ހަމަޖައްސައި މަގުމަތިން ކުނި ނެގުން ހުއްޓާލުމުން ގޭބިސީ ތަކުން ފައިސާ ނުދައްކާ މައްސަލަ އަށް ފާހަގަ ކުރެވޭ ހެޔޮ ބަދަލެއް އައި ކަމަށެވެ.
"ސެޕްޓެމްބަރާ އޮކްޓޫބަރު މަހު ބިލު ތަކުގެ ދެ ގުނަ އަށް ފައިސާ ދެއްކި، ފައިސާ ނުދައްކާ ހުރި ބައެއް ފަރާތްތަކުން ވެސް ފައިސާ ދެއްކި،" ހަލީމް ވިދާޅުވި އެވެ. "ގޭބިސީ ތަކުގެ ބިލަށް 5.7 މިލިއަން ރުފިޔާ އަރާނަމަ އެ ދެ މަހު 10 މިލިއަން ރުފިޔާ ލިބިފައި އެބަހުރި."
ހިދުމަތަށް ރަޖިސްޓްރީ ކޮށްފައިވާ ފަރާތްތަކުން ފައިސާ ދެއްކުމަށް ހަދާން ކޮށްދިނުމަށް، އެ މަހެއްގެ 10 ވަނަ ދުވަހު އާއި މަސް ނިމުމުން ވެމްކޯ އިން މެސެޖު ފޮނުވަ އެވެ. ފައިސާ ނުދައްކާ ފަރާތްތަކަށް ހިދުމަތް ހުއްޓާލަނީ ތިން މަސް ދުވަހުގެ ބިލް ނުދައްކާ ނަމަ ހަތަރު ވަނަ މަހުން ފެށިގެންނެވެ.
ހަލީމް ވިދާޅުވި ގޮތުގައި އެހެން އިދާރާތަކުގެ މައުލޫމާތުތަކަށް ބަލާއިރު މާލޭގައި 47،000 ގޭބިސީ ހުރި ކަމަށް ދައްކާއިރު، ވެމްކޯ ގައި ރަޖިސްޓްރީ ކޮށްފައިވަނީ އޭގެ ތެރެއިން 16،000 ގޭބިސީ އެވެ.
"ވެމްކޯގަ ރަޖިސްޓްރީ ނުކުރާ ވަރަށް ގިނަ ފަރާތްތަކުގެ ކުނި ވެސް އެބަ އުކާލެވޭ،" ހަލީމް ވިދާޅުވި އެވެ.
މިދިޔަ ސެޕްޓެމްބަރު މަހުގެ ނިޔަލަށް ސަރުކާރުގެ ތަންތަނަށް ވެމްކޯ އިން ނުލިބިވާ ފައިސާގެ ތެރެއިން ބޮޑު ބައެއް މި އަހަރުގެ ނިޔަލަށް ލިބޭނެ ކަމުގެ ވަރަށް ބޮޑު ޔަގީންކަމެއް އެބަ އޮތް ކަމަށް ހަލީމު ވިދާޅުވި އެވެ.
"ސަރުކާރުން ނުލިބިވާ 52 މިލިއަން ރުފިޔާގެ ތެރެއިން ބޮޑު ބަޔަކީ މާލޭ ސިޓީ ކައުންސިލުން ލިބެން ޖެހޭ ފައިސާ، ސިޓީ ކައުންސިލުން ލިބެން ޖެހޭ 30 މިލިއަން ރުފިޔާ މި އަހަރު ނިމުމުގެ ކުރިން ލިބޭނެ ކަމަށް ބެލެވޭ،" އެނާ ވިދާޅުވި އެވެ.
ވެމްކޯ އިން ބުނީ އަމިއްލަ ފަރާތަކަކުން ފައިސާ ނުދައްކައިގެން ކޯޓަށް ހުށަހެޅި ނުވަ މައްސަލައެއް ނިމިފައިވާ ކަމަށާއި، ފައިސާ ނުދައްކާ ގޭބިސީ ތަކާމެދު އަމަލުކުރާނެ ގޮތަކާމެދު މަޝްވަރާ ކުރަމުން ގެންދާ ކަމަށެވެ.
ވެމްކޯގެ އޮޑިޓް ރިޕޯޓުގަ ބުނެފަވާ ގޮތުގައި 2019 ވަނަ އަހަރު ވެމްކޯ އަށް 229 މިލިއަން ރުފިޔާގެ އާމްދަނީއެއް ލިބި 51.5 މިލިއަން ރުފިޔާގެ ޖުމްލަ ފައިދާ އެއް ވި ނަމަވެސް އެ އަހަރު އެ ކުންފުންނަށް 37 މިލިއަން ރުފިޔާ ވަނީ ގެއްލުންވެފަ އެވެ.
