އަންނަ އަހަރު އޮންނަ ފިލިޕީންސްގެ ސެނެޓު އިންތިހާބަށް ކުރިމަތިލެއްވި ރައީސް ރޮޑްރިގޯ ޑުޓާޓޭގެ ކެންޑިޑެސީ އަނބުރާ ގެންގޮސްފި އެވެ.
"ރައީސް ވަނީ ސެނެޓުން އިންތިހާބުން ކެންޑިޑެސީ އަނބުރާ ގެންދަން ހުށަހަޅާފައި،" އިލެކްޝަންސް ކޮމިޝަނުގެ ތަރުޖަމާން ޖޭމްސް ޖިމެނޭޒް ކުރެއްވި ޓްވީޓެއްގައި ވިދާޅުވި އެވެ.
އުމުރުން 76 އަހަރުގެ ޑުޓާޓޭގެ ރައީސްކަމުގެ ދައުރު ވަނީ ނިމެން ގާތްވެފަ އެވެ. ފިލިޕީންސްގެ ގާނޫނު އަސާސީގައިވާ ގޮތުން ރައީސަކަށް މަގާމުގައި ހުންނެވޭނީ ހަ އަހަރުގެ އެއް ދައުރަށެވެ.
އެހެންކަމުން، ޑުޓާޓޭ ސެނެޓު އިންތިހާބަށް ކުރިމަތިލެއްވީ ސިޔާސީ ކެރިއަރު ކުރިއަށް ގެންދިޔުމުގެ ބޭނުމުގަ އެވެ. މަސްތުވާތަކެއްޗާ ދެކޮޅަށް ޑުޓާޓޭ ހިންގެވި ހަނގުރާމައިގެ ބައިނަލްއަގްވާމީ ތަހުގީގެއް ވަނީ ފަށާފަ އެވެ.
ސެނެޓު އިންތިހާބުން ނަން އަނބުރާ ގެންދިޔަ ނަމަވެސް، ޑުޓާޓޭގެ ސިޔާސީ ކެރިއަރު ނިންމަވާނެ ކަމަށް ނުބެލެވެ އެވެ.
ޑުޓާޓޭގެ ދަރިކަނބަލުން ސާރާ ގެންދަވަނީ ނައިބު ރައީސް ކަމަށް ވާދަކުރަމުންނެވެ. އޭގެ އިތުރުން ފިރިހެން ދަރިކަލުން ސެބާސްޓިއަން ވަނީ ޑަވާއޯ ސިޓީގެ މޭޔަރު ކަމަށް ކުރިމަތިލައްވާފަ އެވެ.
