މިދިޔަ އަހަރުގެ ޑިސެމްބަރުމަހު މޯލްޑިވްސް އޯޝަން ޕްލާސްޓިކް އެލާޔަންސް (މޯޕާ) އާއި އެ ކުންފުނީގެ ޕާޓްނަރުން ގުޅިގެން ފެށީ ޕްލާސްޓިކް ކުނި އެއްކޮށް އެތަކެތި ރިސައިކަލް ކުރުމުގެ މަޝްރޫއުގެ ފުޅާކޮށް ރިސޯޓުތަކުން ވެސް ޕްލާސްޓިކް ނެގުމުގެ މަސައްކަތް ފެށުމަށް އެ ޖަމިއްޔާއިން ތައްޔާރުވެއްޖެ އެވެ.
ރިވާސް ޕެޓް ލޮޖިސްޓިކްސްގެ ނަމުގައި މިދިޔަ އަހަރު ފެށި އެ ޕްރިޖެކްޓުގެ ދަށުން މޯޕާއިން ވަނީ ޕްލާސްޓިކް ނުވަތަ ޕެޓް ފުޅި އެއްކޮށް، ޕާލޭ މޯލްޑިވްސްއާ ހަވާލުކޮށްގެން އެތަކެތި ރީސައިކަލްކޮށް، އެޑިޑާސް ބްރޭންޑުގެ ބޫޓު ފަދަ އާންމު ދިރިއުޅުމުގައި ބޭނުންކުރާ ތަފާތު ތަކެއްޗަށް ބަދަލުކޮށްފަ އެވެ.
"ރިސޯޓް ޕެޓް ކަލެކްޝަން ޕްރޮޖެކްޓް" ގެ ނަމުގައި މިއަދު އިފްތިތާހް ކުރި އެ ޕްރޮޖެކްޓުގެ ދަށުން ރާއްޖޭގައި ހިންގާ 150 އަށް ވުރެ ގިނަ ރިސޯޓުތަކުން އުކާލާ ހުސް ފުޅި އެއްކޮށް ރީސައިކަލް ކުރެވޭނެ ކަމަށް އެ ޖަމިއްޔާއިން ބުނެ އެވެ.
"ރީސައިކަލް ކުރުމާ ގުޅުންހުރި ހައްލުތައް ވީހާ ވެސް ފުޅާ ދާއިރާއެއްގައި ބޭނުންކުރެވޭނެ ގޮތްތައް އަޅުގަނޑުމެން ބަލަމުން އަންނައިރު، އަޅުގަނޑުމެންނަށް ފާހަގަކުރެވެނީ ޕްލާސްޓިކް ކުނީގެ މައްސަލައަށް އެކަށީގެންވާ ހައްލެއް ހޯދުމަށް މާލެ ސަރަހައްދަށް ފޯކަސްކޮށްގެން ކުރާ މަސައްކަތް ނުފުދޭކަން،" މި ޕްރޮޖެކްޓުގައި މޯޕާގެ ޕާޓްނަރެއް ކަމުގައިވާ މާލޭ އެރޭޓެޑް ވޯޓާ ކޮމްޕެނީގެ މެނޭޖިން ޑިރެކްޓަރު ސަންޖޭ މަނިކު ވިދާޅުވި އެވެ.
ރިީސައިކަލް ކުރުމަށް ރިސޯޓުތަކަށް ގޮންޖެހުންތަކެއް ހުރިކަން ފާހަގަ ކުރައްވައި ސަންޖޭ އިތުރަށް ވިދާޅުވީ އެ ޕްރޮކެޖްޓުގެ ސަބަބުން ރިސޯޓާއި އެ ޖަމިއްޔާއަށް ވެސް ފައިދާތަކެއް ކުރާނެ ކަމަށެވެ.
"މި މަސައްކަތް މިއަށްވުރެ ފުޅާކޮށް، މި ކަމުގައި ބައިވެރިވާ ފަރާތްތަކުގެ އަދަދު އިތުރުކުރަން ޖެހޭ. ޕެޓް ފުޅި ރީސައިކަލްކުރުމުގައި ވަރަށް ގިނަ ރިސޯޓުތަކަށް ގޮންޖެހުންތަކާ ކުރިމަތިލާން ޖެހޭކަން އަޅުގަނޑުމެންނަށް އެނގޭ. އެހެންވެ، މި ހަރަކާތަކީ ދެ ފަރާތަށް ވެސް ފައިދާހުރި ކަމަކަށް ވެގެން ދިއުމަކީ އަޅުގަނޑުމެންގެ އަޒުމް،" އޭނާ ވިދާޅުވި އެވެ.
ރިވާސް ޕެޓް ލޮޖިސްޓިކްސް ޕްރޮޖެކްޓުގެ ތެރެއިން އަލަށް ތައާރަފުކުރި ރިސޯޓް ޕެޓް ކަލެކްޝަން ޕްރޮޖެކްޓްގެ ސަބަބުން، އަހަރަކު މަދުވެގެން 150،000 ކިލޯގެ ޕްލާސްޓިކް ކުނި ރާއްޖެ އިން އެއްކުރެވި، އެތަކެތި ރިސައިކަލް ކުރެވިގެން ދާނެކަމަށް މޯޕާއިން ލަފާކުރެ އެވެ.
"ޕްލާސްޓިކް ކުނި ޒިންމާދާރުކަމާ ހަރުދަނާކަމާއެކު މެނޭޖްކުރުމުގައި އެންމެން ގުޅިގެން މަސައްކަތްކުރުން ވަރަށް މުހިންމު. އަޅުގަނޑުމެންގެ ރިވާސް ޕެޓް ލޮޖިސްޓިކްސް ޕްރޮޖެކްޓްގެ ކާމިޔާބީން ދަލީލުކޮށްދެނީ، ރާއްޖޭގައި އިތުރުވަމުންދާ އެއްފަހަރު ބޭނުންކޮށްފައި އުކާލާ ޕްލާސްޓިކް ކުނި، ހަރުދަނާ ގޮތެއްގައި އަލުން އަނބުރާ އިޔާދަކުރުމުގައި ކަސްޓަމަރުންނާއި ވިޔަފާރި ޕާޓްނަރުންގެ އެހީތެރިކަން ލިބުމުގެ މުހިންމުކަން،" މޯޕާގެ ފައުންޑަރ އަދި ރައީސް ތޯރިގް އިބްރާހީމް ވިދާޅުވި އެވެ.
މިދިޔަ އަހަރު ފެށިގެންދިޔަ މި ބޮޑު މަޝްރޫއުގެ ތެރެއިން މޯޕާއިންވަނީ މާލޭ ސަރަހައްދުގެ 120 އަށް ވުރެ ގިނަ ރީޓެއިލް އައުޓްލެޓް ތަކުން އުކާލާ ޕްލާސްޓިކް ކުނި އެއްކޮށްފަ އެވެ. މިގޮތުން މާލެ އާއި ހުޅުމާލޭގެ 263 އަށް ވުރެގިނަ ރެސްޓޯރެންޓާއި ކެފޭ ހިމެނޭ ގޮތަށް އެ މަޝްރޫއު މިހާރު ފުޅާކޮށްފައިވާއިރު ފާއިތުވި އަހަރުގެ ތެރޭގައި 30،000 ކިލޯއަށްވުރެ ގިނަ ޕްލާސްޓިކް ފުޅި އެއްކޮށްފައިވާނެ ކަމަށް އެ ޖަމިއްޔާއިން ބުނެ އެވެ.
