ޑެންމާކަށް ހިޖުރަ ކުރި ޒުވާން އާއިލާތައް ގާނޫނާ ހިލާފަށް ވަކިކުރި ކަމަށް ސާބިތުވެ، ކުރީގެ އިމިގްރޭޝަން މިނިސްޓަރަށް 60 ދުވަހުގެ ޖަލު ހުކުމެއް އިއްވައިފި އެވެ.
ފަނޑިޔާރުން ބުނީ 2016 ވަނަ އިންގާ ސްޓޮއެޖްބާގް ނިންމެވި ނިންމުން ގާނޫނާ ހިލާފު ކަމަށެވެ. އެ ސިޔާސަތަކީ ކުޑަކުދިންގެ ކައިވެނި ހުއްޓުވަން ހެދި ސިޔާސަތެއް ކަމަށް ވިދާޅުވެ، ސްޓޮއެޖްބާގް ހުކުމާ މެދު ހައިރާންކަން ފާޅުކުރެއްވި އެވެ.
މިއީ ފާއިތުވި 30 އަހަރުގެ ތެރޭގައި ޑެންމާކްގައި ހިންގި ފުރަތަމަ އިމްޕީޗްމަންޓް ޝަރީއަތެވެ. އަދި އެ ގައުމުގެ ތާރީހުގައި ހިންގި ހަ ވަނަ އިމްޕީޗްމަންޓް ޝަރީއަތެވެ.
"މިއީ ހަމައެކަނި އަޅުގަނޑަށް ލިބުނު ގެއްލުމެއް ނޫން. އެކަމަކު ޑެންމާކަށް ވެސް ލިބުނު ގެއްލުމެއް،" ޝަރީއަތަށް ފަހު ކޯޓުގެ ބޭރުގައި ނޫސްވެރިންނަށް އޭނާ ވިދާޅުވި އެވެ.
އިމިގްރޭޝަން މިނިސްޓަރުގެ ގޮތުގައި ސްޓޮއެޖްބާގް ހުންނެވީ 2015 އިން 2019 އަށެވެ. އޭރު ހިޖުރަކުރާ މީހުންނާ ދެކޮޅަށް ހަރުކަށި ސިޔާސަތުތައް ތަންފީޒު ކުރަން ފެށި އެވެ.
އޭގެ ތެރެއިން އެއް ސިޔާސަތަކީ ފެބްރުއަރީ 16 ވަނަ ދުވަހު ނެރުނު އަމުރެކެވެ. އޭގައި ބުނެފައި ވަނީ ކައިވެނިކޮށްގެން ތިބި ރެފިއުޖީންގެ ތެރޭގައި ހިމެނޭ 18 އަހަރުން ދަށުގެ ކުދިން އެ މީހުންގެ އަނބިން ނުވަތަ ފިރިންނާ އެކު ދިރިނޫޅެވޭނެ ކަމަށެވެ.
އަމުރުގެ ދަށުން 23 އާއިލާއެއް ވަކިކުރި އެވެ. ނަމަވެސް ދުވަސްކޮޅެއް ފަހުން އެ ސިޔާސަތު ތަންފީޒު ކުރުން ހުއްޓާލި އެވެ.
ވަކިކުރި އާއިލާތަކުގެ ތެރެއިން ފާހަގަވާ އެއް ބަޔަކީ ސީރިއާގެ ޒުވާން ދެމަފިރިއެކެވެ. ޑެންމާކުން އެ ފިޔަވަޅު އެޅިއިރު، އުމުރުން 17 އަހަރުގެ ރިމާޒް އަލްކަޔާލް އާއި 26 އަހަރުގެ އަލްނޫރް އަލްވަން ފަހުން އަލުން ގުޅެން ފުރުސަތު ލިބުނީ ޝަކުވާ ހުށަހަޅައިގެންނެވެ.
ހަތަރު މަސް ވަންދެން އެ ދެމަފިރިން ވަކިން ދިރިއުޅެން ޖެހުނު އިރު، އަލްނޫރު އޭރު އިނީ ބަލިވެ އެވެ.
ޑެންމާކްގެ ސުޕްރީމް ކޯޓުން ހޯމަ ދުވަހު އިއްވި ހުކުމާ އެކު ސްޓޮއެޖްބާގްގެ ސިޔާސީ ކެރިއަރަށް ވަނީ ލޮޅުންއަރާފަ އެވެ.
