ލަންޑަން، އިނގިރޭސިވިލާތް (ޑިސެމްބަރު 12) - މިދިޔަ އަހަރު ކްރިސްމަސްގައި ކުރިއަށް ގެންދިޔަ އިވެންޓެއްގެ ތެރެއިން އިނގިރޭސި ބޮޑު ވަޒީރު ބޮރިސް ޖޯންސަން ކޮވިޑް އުސޫލާ ހިލާފުވި ކަމަށް ދޭހަވާ ފޮޓޯއެއް އާއްމުވެ، ފާޑުކިޔުން އަމާޒު ވެއްޖެ އެވެ.
ޑިސެމްބަރު 18، 2020 ވަނަ އަހަރު އުސޫލާ ހިލާފަށް ބޭއްވި ކްރިސްމަސް ޕާޓީއެއްގެ މައްސަލައިގައި ބޮރިސްގެ އިސްތިއުފާ އަށް ބައެއް ފަރާތްތަކުން ދަނީ ގޮވަމުންނެވެ.
ބޮރިސް ތަކުރާރުކޮށް ވިދާޅުވީ އެ ޕާޓީގައި ކޮވިޑް އުސޫލާ އެއް ގޮތަށް ގައިދުރުކަން ބެހެއްޓި ކަމަށާއި ތުހުމަތުތަކާ ގުޅިގެން ތަހުގީގަކަށް އަމުރު ކުރައްވާފައިވާ ކަމަށެވެ.
ނަމަވެސް ސަންޑޭ މިރާ އިން އާއްމުކުރި ފޮޓޯ އިން ފެންނަނީ ޕާޓީ ބޭއްވުމުގެ ތިން ދުވަސް ކުރިން ބޮރިސްގެ މުވައްޒަފުންނާ އެކު ބޭއްވި "ވާޗުއަލް ކުއިޒް"އެއްގެ ތެރެއިންނެވެ. އެ ހަރަކާތުގައި ބައިވެރިވި ހަ މީހުން ހިމެނޭ ހަތަރު ޓީމުން ވާދަކުރީ ޗެރިޓީ އަށް ފަންޑު ހޯދާށެވެ.
އެ އިވެންޓު ބޭއްވި އިރު "އިޖުތިމާއީ ހަރަކާތްތައް" ބޭއްވުން އިނގިރޭސިވިލާތުގައި އޮތީ މަނާކޮށްފަ އެވެ. އޭގެ ތެރޭގައި ކްރިސްމަސް ޕާޓީތަކާއި އެއްވުންތައް ހިމެނެ އެވެ. އެ ދުވަސްވަރަކީ ޑެލްޓާ ވޭރިއެންޓާ ހެދި އިނގިރޭސިވިލާތުގައި ކޮވިޑްގެ ހާލަތު ވަރަށް ބޮޑަށް ގޯސްވި ދުވަސްވަރެކެވެ.
އޭގެ އިތުރުން ތަފާތު ދެ ގޭބިސީއެއްގެ ދެ މީހުން އިންޑޯ ތަނެއްގައި އެކުގައި ތިބުން ވެސް އޭރު އޮތީ މަނާކޮށްފަ އެވެ. އެއާއެކު އެތައް މިލިއަން ބަޔަކު ކްރިސްމަސްއާ ދިމާކޮށް އާއިލާއާ ބައްދަލުކުރަން ރޭވި ނަމަވެސް އެކަން ކުރުން މަނާވި އެވެ.
ސަންޑޭ މިރާ އިން ބުނީ "ވާޗުއަލް ކުއިޒް" ހަރަކާތުގައި ބޮރިސް 15 މިނެޓު ބައިވެރިވެވަޑައިގެންނެވި ކަމަށާއި މުބާރާތުގެ އެއް ރައުންޑުގައި ކުއިޒްމާސްޓާގެ ގޮތުގައި ސުވާލުތައް ވެސް ހުށަހެޅުއްވި ކަމަށެވެ.
ވާޗުއަލް ކުއިޒްގައި ބޮރިސް ޖޯންސަން ބައިވެރިވެވަޑައިގަންނަވަނީ. -- ފޮޓޯ: ދަ ސަންޑޭ މިރާ
އެޑިއުކޭޝަން ސެކެޓްރީ ނަދީމް ޒަހާވީ އެކަން ދިފާއު ކުރެއްވުމަށް ފަހު ވިދާޅުވީ އެފަދަ "ޒޫމް ހަރަކާތްތައް" ގިނަ ބަޔަކު ބާއްވާނެ ކަމަށެވެ. އެ ހަރަކާތުގައި ބޮރިސް ބައިވެރިވެވަޑައިގެންނެވީ ވާޗުއަލްކޮށް ނަމަވެސް، އިދިކޮޅު ޕާޓީގެ ފާޑުކިޔުން އަމާޒުވި އެވެ.
ލޭބާ ޕާޓީ އިން ބުނީ އެކަމުން ދޭހަވަނީ ކޮވިޑްގެ އުސޫލާ ހިލާފަށް ކުރިއަށް ގެންދިޔަ ހަރަކާތެއްގައި ބޮރިސް ބައިވެރިވެވަޑައިގެންނެވިކަން ކަމަށެވެ. އަދި ސަރުކާރުގެ ތެރޭގައި ކޮވިޑްގެ އުސޫލުތަކަށް އިހްތިރާމް ނުކުރުމުގެ ސަގާފަތެއް އޮތް ކަމަށް ތުހުމަތު ކުރި އެވެ.
ހިޔާލު ހޯދުމުގެ ޕޯލްތަކުން ދައްކާ ގޮތުގައި ނުވަ ޕޮއިންޓުގެ ތަފާތަކުން އާއްމުންގެ ތާއީދު ބޮޑަށް އޮތީ ލޭބާ ޕާޓީ އަށެވެ. އޭގެ އިތުރުން ކޮންޒަވޭޓިވް ޕާޓީގެ ބޮރިސް އިސްތިއުފާ ދެއްވަން ޖެހޭ ކަމަށް 57 ޕަސެންޓު މީހުން ދެކެ އެވެ. އެއީ މީގެ ދެ ހަފުތާ ކުރިއާ އަޅާބަލާއިރު، ނުވަ ޕޮއިންޓުގެ އިތުރުވުމެކެވެ.
ބޮރިސްގެ މަގްބޫލުކަން ގެއްލެމުން ދަނީ އޮމިކްރޯން ވޭރިއެންޓު ހުއްޓުވަން އަޅާނެ ފިޔަވަޅުތަކާ ގުޅޭ ގޮތުން އަންނަ ހަފުތާގައި ޕާލިމެންޓުގައި ވޯޓަށް ދާން ތައްޔާރުވެފައި ވަނިކޮށެވެ. ވެކްސިން ޕާސްޕޯޓް ތައާރަފު ކުރަން ރާވާފައި ވާތީ ކޮންޒަވޭޓިވް ޕާޓީގެ ގިނަ މީހުން ހިތްހަމަނުޖެހެ އެވެ.
