ލަންޑަން، އިނގިރޭސިވިލާތް (ޑިސެމްބަރު 12) - އިނގިރޭސިވިލާތުގެ ވެރިރަށް ލަންޑަންގައި ހަތިޔާރު ހިފައިގެން މަގުމަތީގައި އުޅުނު މީހެއްގެ ގަޔަށް ފުލުހުން ބަޑި ޖަހައި މަރާލައިފި އެވެ.
ފުލުހުން ބުނީ ކެންސިންގްޓަން ސަރަހައްދުގެ ބޭންކެއް ކައިރީގައި ހަތިޔާރު ހިފައިގެން މީހަކު އުޅޭކަމުގެ ރިޕޯޓު ލިބުމުން ފުލުހުންގެ ހާއްސަ ޔުނިޓެއް އެ ތަނަށް ދިޔައީ ހޮނިހިރު ދުވަހު ހަވީރު ކަމަށެވެ.
އެ ތަނަށް ފުލުހުން ދިޔަތާ 20 މިނެޓު ފަހުން، އުޅަނދެއް ހުއްޓުވައި ބަޑި ޖެހި އަޑު އިވުނު ކަމަށް ނޫސްތަކުން ރިޕޯޓުކުރެ އެވެ. އެއާ އެމްބިއުލެންސާއި ޕެރެމެޑިކް އަށް ގުޅި ނަމަވެސް ހަތިޔާރު ހިފައިގެން އުޅުނު މީހާ އެ ތަނުގައި މަރުވި އެވެ.
"އެއީ ކާކުތޯ ދެނެގަނެ އޭނާގެ އާއިލާ އަށް އެންގުމުގެ މަސައްކަތް ދަނީ ކުރަމުން،" މެޓްރޮޕޮލިޓަން ފުލުހުން ނެރުނު ބަޔާނެއްގައި ބުންޏެވެ.
"ފުލުހުންގެ ޑައިރެކްޓޮރޭޓް އޮފް ޕްރޮފެޝަނަލް ސްޓެންޑަޑްސް އަށް މި ހާދިސާ ހިނގިކަން އެންގުމަށް ފަހު، ތަހުގީގެއް ހިންގުމަށް އިންޑެޕެންޑެންޓް އޮފީސް ފޯ ޕޮލިސް ކޮންޑަކްޓަށް ވަނީ ހުށަހެޅިފައި."
"މިއީ ޓެރަރިޒަމާ ގުޅުން ހުރި ހާދިސާއެއް ކަމަށް ނުބެލެވޭ،" ބަޔާނުގައި ބުންޏެވެ.
އިނގިރޭސި ފުލުހުންނަކީ އާއްމުކޮށް ބަޑި ހިފައިގެން އުޅޭ ބަޔެއް ނޫނެވެ. އަދި އާއްމު ތަނެއްގައި މިކަހަލަ ބަޑި ޖެހުމުގެ ހާދިސާ ހިނގަނީ ވަރަށް މަދުންނެވެ.
އެންމެ ފަހުގެ ތަފާސްހިސާބު ދައްކާ ގޮތުން 2019 ވަނަ އަހަރުގެ މާޗް މަހުން 2020 ވަނަ އަހަރުގެ މާޗް މަހުގެ ނިޔަލަށް އިންގްލެންޑާއި ވޭލްސްގައި ބަޑި ޖެހުމުގެ ސަބަބުން 30 މީހުން މަރުވި އެވެ.
ފާއިތުވި ދެ އަހަރަށް ބަލާއިރު ފުލުހުން ބަޑި ޖެހުމުގެ ސަބަބުން މަރުވީ އެންމެ މީހެކެވެ. ދާދި ފަހުން އިނގިރޭސިވިލާތުގައި ވަނީ ޓެރަރިޒަމްގެ އެލާޓް މަތިކޮށްފަ އެވެ.
އެއީ ނޮވެމްބަރު މަހު ލިވަޕޫލްގައި ދޭން އުޅުނު ބޮމުގެ ހަމަލާއަކާ ގުޅިގެންނެވެ. އޭގެ ކުރިން އޮކްޓޯބަރު މަހު ޕާލިމެންޓުގެ މެމްބަރެއްގެ ގަޔަށް ވަޅިން ހަމަލާދީ އަވަހާރަކޮށްލި އެވެ. އެ ދެ ހަމަލާ ވެސް ގުޅިފައި ވަނީ ޓެރަރިޒަމްއާ ކަމަށް ފުލުހުންނާއި ޕްރޮސެކިއުޓަރުން ބުނެ އެވެ.
