ޕްރޮސިކިއުޓާ ޖެނަރަލް އޮފީހުގައި ރަނގަޅު ކުރަން ޖެހޭ ގިނަ ކަންތައްތަކެއް ފާހަގަކޮށް އެކަން ބެލުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ޖުޑީޝަލް ކޮމިޓީގައި އެދެން ފާސްކޮށްފި އެވެ.
ޕީޖީ އޮފީހުގެ މަސައްކަތުގައި ހުރި މައްސަލަތަކެއް ކޮމިޓީއަށް ފާހަގަވީ އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުންގެ މަސައްކަތާ ގުޅޭ ގޮތުން އޮޑިޓް އޮފީހުން ހެދި އޮޑިޓުންނެވެ. ކޮމިޓީގެ މުގައްރިރު ރޮޒައިނާ އާދަމް ވިދާޅުވި ގޮތުގައި ޕީޖީ އޮފީހުގެ މަސައްކަތުގައި ރަނގަޅު ކުރަން ޖެހޭ ގިނަ ކަންތައްތަކެއް ވަނީ ފާހަގަ ކުރެވިފަ އެވެ.
އެހެންވެ, މިއަދު ބޭއްވި އެ ކޮމިޓީގެ ބައްދަލުވުމުގައި ބާރަށު ދާއިރާގެ މެންބަރު އަހްމަދު އަބްދުﷲ ހުށަހެޅުއްވީ ޕީޖީ އޮފީހުގެ މަސައްކަތްތައް ކުރިއަށް ނުދާ މައްސަލަ ބަލަން ޖުޑިޝަރީ ކޮމިޓީއަށް ފޮނުވުމަށެވެ. މި ހުށަހެޅުން ކޮމިޓީއަށް ހާޒިރުވި މެންބަރުންގެ އަގުލަބިއްޔަތުން ފާސްވި އެވެ.
ކޮމިޓީން މިއަދު ވަނީ އޭސީސީގެ ފަސް މެންބަރުން މަގާމުން ވަކިކުރުމުގެ މަސައްކަތް ފަށަން ވެސް ނިންމާފަ އެވެ. އެއީ, އެ މެންބަރުންނަށް އެކަށީގެންވާ ގޮތެއްގައި ޒިންމާ އަދާނުކުރެވޭނެކަން އޮޑިޓުން ދެއްކުމުންނެވެ. އެގޮތުން ނުނިމި ގިނަ މައްސަލަތަކެއް ހުރިއިރު, އޭސީސީން ކޮމިޝަނަށް ލިބިފައިވާ ބާރުގެ ބޭނުން ނުކުރާކަން ވެސް އޮޑިޓްގައި ފާހަގަ ކޮށްފައިވެ އެވެ.
ކޮރަޕްޝަންގެ ގިނަ މައްސަލަތައް މަޑުޖެހިފައިވާއިރު, އޭގެ ތެރެއިން އެންމެ ފާހަގަކޮށްލެވޭ މައްސަލައަކީ އެމްއެމްޕީއާރްސީގެ ކޮރަޕްޝަންގެ މައްސަލަ އެވެ. އެ މައްސަލާގައި ތުހުމަތުވާ ގިނަ ބަޔަކު ތިބިއިރު މިހާތަނަށް ތަހުގީގު ނިމިފައިވަނީ މަދު މީހެއްގެ އެވެ.
އޭގެއިތުރުން ވެންޓިލޭޓަރު މައްސަލައަކީ ވެސް ދިގުލައިގެން ގޮސްފައިވާ މައްސަލައެކެވެ. އެ މައްސަލަ ދިގުލައިގެން ގޮސްފައިވަނީ ދައުވާ ކުރުމުގެ މަރުހަލާގަ އެވެ. އެ މައްސަލާގެ ތަހުގީގު ނިންމުމަށްފަހު ތިން ފަހަރެއްގެ މަތިން ދައުވާ ކުރުމަށް ޕްރޮސިކިއުޓާ ޖެނަރަލްގެ އޮފީހަށް ފޮނުވި އެވެ. ނަމަވެސް, ތިން ފަހަރު ވެސް އެ އޮފީހުން ވަނީ މައްސަލަ އިސްލާހު ކުރުމަށް އަންގައި އަނބުރާ އޭސީސީއަށް ފޮނުވާލާފަ އެވެ.
ޕްރޮސިކިއުޓާ ޖެނަރަލް އޮފީހުގެ މައްސަލަ ބަލަން އެމްޑީޕީގެ މެޖޯރިޓީ އޮންނަ މިނިވަން މުއައްސަސާތަކުގެ ކޮމިޓީން ނިންމާފައިވަނީ އިދިކޮޅު ލީޑަރު ކަމަށްވާ ކުރީގެ ރައީސް އަބްދުالله ޔާމީންގެ މައްޗަށް ސާބިތުވެފައި އޮތް މަނީލޯންޑްރިންގެ ކުށުން ސުޕްރީމް ކޯޓުގައި ސަލާމަތްވެފައިވަނިކޮށެވެ.
ޔާމީން ކުށުން ސަލާމަތްވެފައިވަނީ މައްސަލާގައި ހިމެނޭ ޗެކް ނަންބަރު, ދެ ގޮތަކަށް ދެ ލިޔުމެއްގައި އޮތުމުން, ޔާމީންގެ އެކައުންޓަށް ވަން ފައިސާއާމެދު ޝައްކު އުފެދިގެންނެވެ.
