ބަގާވާތަކަށް ފަހު މަގާމުން ދުރުކޮށްފައިވާ މިޔަންމާގެ ލީޑަރު އަންގް ސަން ސޫ ކީ ހަތަރު އަހަރަށް ޖަލަށް ހުކުމްކޮށްފި އެވެ.
އެކަމަނާގެ މައްޗަށް ސާބިތުވީ ހަމަނުޖެހުން އުފެއްދުމާއި ކޮވިޑާ ގުޅިގެން އަޅާފައިވާ ފިޔަވަޅުތަކާ ހިލާފަށް އަމަލު ކުރެއްވި ކަމަށެވެ.
ސޫ ކީ އާ ދެކޮޅަށް ޖުމްލަ 11 ދައުވާއެއް އުފުލާފައި ވާއިރު، ހުރިހާ ދައުވާއަކަށް ވެސް އެކަމަނާ އިންކާރު ކުރައްވަ އެވެ.
މިދިޔަ ފެބްރުއަރީ މަހު ހިންގި އަސްކަރީ ބަގާވާތަށް ފަހު ސޫ ކީ ހުންނަވަނީ ބަންދުގަ އެވެ. ހުކުމް އިއްވުމާ އެކު ޖަލަށް ބަދަލު ކުރައްވާނެކަން ސާފެއް ނޫނެވެ. މި ވަގުތު އެކަމަނާ ބަންދުކޮށްފައި ހުންނެވި ތަނެއް ވެސް އަސްކަރިއްޔާއިން ހާމައެއް ނުކުރެ އެވެ.
ސޫ ކީ ގެ އިތުރުން ކުރީގެ ރައީސް ވިން މިންޓް އަށް ވެސް އެ ދައުވާތައް ސާބިތުވާ ކަމަށް ނިންމައި ހަތަރު އަހަރަށް ޖަލަށް ހުކުމްކޮށްފަ އެވެ.
ސޫ ކީ އާ ދެކޮޅަށް ކުރިއަށް ގެންދިޔަ ޝަރީއަތް ކުށްވެރި ކުރައްވަމުން އދ. ގެ އިންސާނީ ހައްގުތަކާ ބެހޭ ޗީފް މިޝޭލް ބެޗެލެޓް ވިދާޅުވީ އޭގެ ސަބަބުން ބަގާވާތާ ދެކޮޅުވުން އިތުރު ވާނެ ކަމަށެވެ.
ޑިސެމްބަރު 14 ވަނަ ދުވަހު ވެސް ސޫ ކީ ގެ ޝަރީއަތެއް އޮންނާނެ އެވެ. އެއީ ގަވާއިދާ ހިލާފަށް ވޯކީޓޯކީ ގެންގުޅުއްވި ކަމަށް ބުނާ މައްސަލައެކެވެ.
އުމުރުން 75 އަހަރުގެ ސޫ ކީ އާ ދެކޮޅަށް އުފުލާފައިވާ ހުރިހާ ދައުވާތައް ސާބިތުވެއްޖެ ނަމަ 10 އަހަރަށް ވުރެ ދިގު ޖަލު ހުކުމެއް އަންނާނެ އެވެ.
