އިސްލާމްދީނަށް ފުރައްސާރަ ކުރި ކަމުގެ ތުހުމަތުގައި ޕާކިސްތާނުގައި ގްރޫޕަކުން ހަމަލާ ދީ އަނިޔާވެރި ގޮތަކަށް ސްރީލަންކާގެ ރައްޔިތަކު މަރާލި މައްސަލަ ބޮޑުވެއްޖެ އެވެ.
ޕާކިސްތާނުގެ ސިއަލްކޮތު ޑިސްޓްރިކްޓުގައި ފެކްޓްރީ މެނޭޖަރެއްގެ ވަޒީފާ އަދާކުރަމުން ދިޔަ ޕްރިޔަންތަ ދިޔަވަދަނަގެ ގައިގައި ތަޅައި އަނިޔާކޮށް މަރާލުމަށް ފަހު ހަށިގަނޑުގައި ރޯކޮށްލީ ހުކުރު ދުވަހު އެވެ.
ޕާކިސްތާނުގެ ބޮޑު ވަޒީރު އިމްރާން ހާން ވިދާޅުވީ އެ މައްސަލައާ ގުޅުން ހުރި ކަމަށް ބެލެވޭ 100 އަށް ވުރެ ގިނަ މީހުން ހައްޔަރުކޮށްފައިވާ ކަމަށެވެ.
އިމްރާން ހާން އެކަން ސިފަކުރެއްވީ ގައުމަށް "ބޮޑު ލަދެއް" ލިބުނު ދުވަހެއްގެ ގޮތުގަ އެވެ. ސްރީލަންކާގައި ތިބި ދިޔަވަދަނަގެ އާއިލާ އިން ބުނީ އިންސާފު ބޭނުންވާ ކަމަށެވެ.
އޭނާގެ އަންހެނުން ނިރޯޝީ ދަސަނަޔަކެ ސްރީލަންކާ އާއި ޕާކިސްތާނުގެ ސަރުކާރަށް ގޮވާލީ ފުރިހަމަ ތަހުގީގެއް ހިންގައި "ފިރިމީހާ އާއި ދެ ކުދިންނަށް އިންސާފު ހޯދައިދިނުމަށެވެ."
"އޭނާ އަށް ހަމަލާ ދޭ މަންޒަރު އިންޓަނެޓުން އަޅުގަނޑަށް ފެނުނު... އެ މީހުން އަމަލު ކުރީ ވަރަށް ލާއިންސާނީކޮށް،" ދަސަނަޔަކެ ބުންޏެވެ.
ފާއިތުވި ހަފުތާ ބަންދުގައި އެ ހަމަލާއާ ގުޅޭ ވީޑިއޯތައް ސޯޝަލް މީޑިއާގައި ދައުރުވާން ފެށި އެވެ. ވީޑިއޯތަކުން ފެންނަނީ ގިނަ ބަޔަކު ދިޔަވަދަނަގެ ވަށާލައިގެން އޭނާ އަށް އަނިޔާ ކުރާ މަންޒަރެވެ.
އޭގެ ފަހުން ހަށިގަނޑުގައި ރޯކޮށްލައި، ބައެއް މީހުން ސެލްފީ ނަގާ މަންޒަރު ވެސް ވީޑިއޯތަކުން ފެނެ އެވެ.
ހަމަލާ ދިނީ ކީއްވެ؟
ހަމަލާ ދޭން ފެށީ ދިޔަވަދަނަގެ އިސްލާމްދީނަށް ފުރައްސާރަ ކުރި ކަމަށް ބުނެ އެވެ. އެގޮތުން ކީރިތި ރަސޫލާއާ ގުޅުވައިގެން މެސެޖުތައް ލިޔެފައިވާ ޕޯސްޓަރުތަކަށް އޭނާ ގެއްލުން ދިން ކަމަށް އަޑު ފެތުރުނެވެ.
ނަމަވެސް ދިޔަވަދަނަގެއާ އެކު މަސައްކަތް ކުރާ މީހަކު ބުނީ ޕޯސްޓަރުތައް ފާރުން ނެއްޓީ އިމާރާތް ސާފު ކުރުމުގެ މަސައްކަތަށް ކަމަށެވެ. ދިޔަވަދަނަގެ އަންހެނުން ވެސް ބުނީ އޭނާ އިސްލާމްދީނަށް ފުރައްސާރަ ނުކުރާނެ ކަމަށެވެ.
"އެ ވާހަކަތައް އަޅުގަނޑު ދޮގުކުރަން. އޭނާ އަކީ ކުށެއް ނެތް މީހެއް،" ދަސަނަޔަކެ ބުންޏެވެ.
"ޕާކިސްތާނުގައި ދިރިއުޅުމުގެ ކަންކަން އޮންނަ ގޮތް އޭނާ އަށް ވަރަށް ރަނގަޅަށް އެނގޭ. އެއީ މުސްލިމް ގައުމެއް. އެ ތަނުގައި ކޮށްގެން ނުވާނެ ކަންކަން އޭނާ އަށް އެނގޭ. އެ ތަނުގައި 11 އަހަރު ވަޒީފާގައި އެ އުޅެވުނީ އެހެންވެ."
އިސްލާމްދީނާއި ކީރިތި ރަސޫލާ އަށް ފުރައްސާރަ ކުރުމަކީ ޕާކިސްތާނުގައި ބޮޑު ކުށެކެވެ. އެފަދަ ކަމެއްގެ ތުހުމަތު ކުރެވޭ މީހާއާ މެދު ޕާކިސްތާނު ރައްޔިތުން ވަރަށް ގިނަ ފަހަރު އަމަލު ކުރަނީ އަނިޔާވެރިކޮށެވެ.
ހުކުރު ދުވަހު ދިން ހަމަލާގައި ވެސް އެތައް ސަތޭކަ ބަޔަކު ބައިވެރިވި އެވެ. އެހެންވެ އެ ހަމަލާ އަށް ފަހު ގިނަ ބަޔަކު ދަނީ ހައިރާންކަން ފާޅުކުރަމުންނެވެ.
ބޮޑު ވަޒީރު އިމްރާން ހާން އެ ހަމަލާ ކުށްވެރި ކުރެއްވުމަށް ފަހު ވިދާޅުވީ ބައިވެރިވި އެންމެންނަށް އެންމެ ހަރުކަށި އަދަބު ދެއްވާނެ ކަމަށެވެ.
އޭގެ އިތުރުން ސްރީލަންކާގެ ރައީސް ގޮތަބަޔަ ރާޖަޕަކްސައާ ވާހަކަދެއްކެވި ކަމަށާއި، އެ ހަމަލާ އަކީ ޕާކިސްތާނުން ބަލައިގަންނާނެ ހަމަލާއެއް ނޫން ކަމަށް ދަންނަވާފައި ވާނެ ކަމަށް އިމްރާން ހާން ވިދާޅުވި އެވެ.
އެ މައްސަލައާ ގުޅޭ ގޮތުން ސްރީލަންކާގެ އިދާރާތަކުން އަދި ވަކި އެއްޗެއް ނުބުނެ އެވެ. ނަމަވެސް އެކަމާ ގުޅިގެން ސްރީލަންކާގެ މުސްލިމުންނަށް ހަމަލާތައް އަމާޒުވެދާނެ ކަމުގެ ބިރު ބޮޑެވެ.
ދިޔަވަދަނަގެ ހަށިގަނޑު ހޯމަ ދުވަހު ސްރީލަންކާ އަށް ފޮނުވާނެ އެވެ. ބެލެވޭ ގޮތުގައި ވެރިރަށް ކޮލޮމްބޯގައި މުޒާހަރާތައް ބާއްވަން ދަނީ ތައްޔާރުވަމުންނެވެ.
