އިނގިރޭސި ޕާލިމެންޓުގައި މަސްތުވާތަކެތި ބޭނުންކުރާ ކަމުގެ ތުހުމަތު ކުރެވުމާ އެކު އެ މައްސަލަ ފުލުހަށް ހުށަހަޅުއްވާނެ ކަމަށް ހައުސް އޮފް ކޮމޮންސްގެ ރައީސް ސާ ލިންޑްސީ ހޮއިލް ވިދާޅުވެއްޖެ އެވެ.
ޕާލިމެންޓުގެ ބައެއް ފާހާނާތައް ހުންނަ ސަރަހައްދުގައި މަސްތުވާތަކެތީގެ ބާވަތެއް ކަމަށްވާ ކޮކެއިންގެ ބޭނުންކުރާ ކަމުގެ ނިޝާން ފެންނަން ހުންނަ ކަމަށް ސަންޑޭ ޓައިމްސް އިން ރިޕޯޓުކޮށްފައި ވާތީ އޭނާ ކަންބޮޑުވުން ފާޅުކުރެއްވި އެވެ.
ސާ ލިންޑްސީ ބީބީސީ އަށް ވިދާޅުވީ ގާނޫނަށް މަކަރު ހަދާ މީހުންނަށް އަދަބު ދޭން ޖެހޭނެ ކަމަށެވެ.
ޕާލިމެންޓާ ގުޅޭ މިފަދަ ތުހުމަތެއް އައިސްފައި ވާއިރު، މަސްތުވާތަކެތީގެ މައްސަލަ ހައްލު ކުރަން ކުރިއަށް އޮތް ތިން އަހަރަށް 700 މިލިއަން ޕައުންޑްގެ ބަޖެޓެއް ކަނޑައަޅަން ސަރުކާރުން ދަނީ ތައްޔާރުވަމުންނެވެ.
ސަންޑޭ ޓައިމްސް ނޫހުން ރިޕޯޓު ކުރި ގޮތުގައި ޕާލިމެންޓުގެ 12 ފާހާނާ ޓެސްޓުތައް ހެދިއިރު، އެންމެ ތަނެއް ފިޔަވައި އެހެން ހުރިހާ ތަނަކުން ކޮކެއިންގެ އަސަރު ފެނުނެވެ.
ޕާލިމެންޓުގައި ކޮކެއިން ބޭނުން ކުރާ ފަރާތްތައް ދެނެގަންނަން ކުއްތާ ބޭނުން ކުރުމުގެ ވިސްނުން ހައުސް އޮފް ކޮމޮންސް ކޮމިޝަނުން ގެންގުޅޭ ކަމަށް އެ ނޫހުން ބުންޏެވެ.
ކޮކެއިން އަކީ އިނގިރޭސިވިލާތަކުގައި ކްލާސް އޭ ދަރަޖައިގެ މަސްތުވާ އެއްޗެކެވެ. އެފަދަ އެއްޗެއް އަތުގައި ގެންގުޅޭ މީހަކަށް ޖޫރިމަނާ އާއި ހަތް އަހަރުގެ ޖަލު ހުކުމެއް އައުން އެކަށީގެންވެ އެވެ.
ކޮކެއިން އަދި ކްލާސް އޭ މަސްތުވާތަކެތި ސަޕްލައި ކުރާ ފަރާތްތަކަށް އުމުރު ދުވަހުގެ ޖަލު ހުކުމަކާ އެކު ޖޫރިމަނާ އައުން އެކަށީގެންވެ އެވެ.
