އެސްއޯފުން އެމަނިކުފާނުގެ އެކައުންޓަށް ޖަމާކުރި ފައިސާއާމެދު ކުރީގެ ރައީސް އަބްދުﷲ ޔާމީން އަމަލު ކުރެއްވީ ރައީސުލްޖުމްހޫރިއްޔާގެ ހައިސިއްޔަތުން އުފުލަންޖެހޭ ގާނޫނީ ޒިންމާ އާއި ގާނޫނުގެ ވެރިކަމަށް ބެއްލެވުމެއް ނެތި، އަމިއްލަ މަންފާ އިސް ކުރައްވައިގެން ކަމަށް ސުޕްރީމް ކޯޓުން މިއަދު ބުނެފި އެވެ.
ޔާމީންގެ މައްޗަށް ކްރިމިނަލް ކޯޓުން އިއްވާފައި އޮތް ފަސް އަހަރުގެ ޖަލު ހުކުމް ބާތިލް ކުރައްވަމުން ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރު ވިދާޅުވީ، އެސްއޯއެފްގެ ފައިސާ އިތުރު ކަމަކަށް ބެލުމެއް ނެތި އެ ފައިސާ އިންވެސްޓުކޮށްފައިވާ ކަމަށާއި އެއީ "މި ފައިސާއާމެދު ކަންތައް ކުރަންޖެހޭ ގޮތެއް ނޫން" ކަމަށެވެ.
"މި ފައިސާއާމެދު ދައުލަތުގެ އިދާރާތަކުން ތަހުގީގު ކުރާކަން އެނގިހުރެ، މި ފައިސާއިން އިންވެސްޓް ކުރުމަކީ، ތަހުގީގު އިދާރާތަކުން ގާނޫނީ އިމުގެ ތެރެއިން ކުރާ ތަހުގީގުތަކަށާއި ބަލާ ބެލުންތަކަށް ފަރުވާލެއް ނުބަހައްޓައި، ދައުލަތުގެ އެއްބައިވަންތަކަން ދެމެހެއްޓުމަށް ރައީސުލްޖުމްހޫރިއްޔާއަށް ގާނޫނުއަސާސީން މަތިކޮށްފައިވާ ޒިންމާއަށް ބެލުމެއް ނެތި ގާނޫނުގެ ވެރިކަން ކުރިއަށް ނެރުމުގެ ބަދަލުގައި ތިމާގެ އަމިއްލަ މަންފާ އިސްކުރުމުގެ އަމަލެއް ކަމުގައި ބެލެވޭ އަމަލެއް،" ފަނޑިޔާރު މަހާޒް ވިދާޅުވި އެވެ.
ޔާމީންގެ މައްޗަށް ކްރިމިނަލް ކޯޓުން އިއްވި ފަސް އަހަރުގެ ޖަލު ހުކުމް ބާތިލް ކުރީ އެމަނިކުފާނުގެ އެކައުންޓަށް ޖަމާވެފައިވާ ފައިސާއަކީ ކުށުގެ އަމަލަކުން ހޯދާފައިވާ ފައިސާކަން ހުށަހަޅާފައިވާ ހެކިތަކުން ސާބިތުނުވާތީ އެވެ.
އެ މައްސަލައިގައި ޔާމީންއާ ދެކޮޅަށް ހެކި ބަސް ދިން ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ ވެރިޔާ އަބްދުﷲ ޒިޔަތުގެ ހެކިބަސް ބަލައިނުގަތުމަށް ސުޕްރީމް ކޯޓުން ނިންމި އެވެ. އެއީ އެ ދެ މީހުންނަކީ އެމްއެމްޕީއާރްސީގެ ވައްކަން ކުރިކަން އިއުތިރާފުވެފައިވާ ފާސިގުން ކަމަށްވެފައި، އެމީހުންގެ ހެކި ބަހަށް ބާރު ލިބިދޭ ގަރީނާ ހުށަހަޅާފައިނުވާތީ އެވެ.
އޭގެ އިތުރުން، އެކައުންޓަށް ޖަމާވި ފައިސާގެ ހަގީގަތް ޔާމީނަށް އެނގިވަޑައިގަންނަވާކަމުގެ ހެކި ހުށަހަޅާފައި އޮތް ނަމަވެސް ހުކުމް އިއްވަމުން ފަނޑިޔާރު ވިދާޅުވެފައިވެ އެވެ.
