ރިސޯޓު ހަދަން ރަށް ވިއްކުމަށްފަހު ލިބުނު ފައިސާ ލޯންޑާ ކުރި މައި ކުންފުނި އެސްއޯއެފްގެ ވެރިންގެ މައްޗަށް ދައުލަތުން ދައުވާ ނުކުރުމަށް ނިންމާފައިވާތީ ހައިރާންވެވަޑައިގެންނެވި ކަމަށް ކުރީގެ ރައީސް އަބްދުﷲ ޔާމީންގެ މައްޗަށް ހުކުމް އިއްވަމުން ފަނޑިޔާރު މަހާޒް އަލީ ޒާހިރު ވިދާޅުވެއްޖެ އެވެ.
އެސްއޯއެފް ކުންފުނިން އެއް މިލިއަން ޑޮލަރު ޖަމާވި މައްސަލައިގައި ޔާމީން ފަސް އަހަރަށް ޖަލަށްލައި، ފަސް މިލިއަން ޑޮލަރުން ޖޫރިމަނާ ކުރި ހުކުމް މިއަދު ސުޕްރީމް ކޯޓުން ވަނީ ބާތިލްކޮށްފަ އެވެ. އަދި ހުކުމް އިއްވަވަމުން ފަނޑިޔާރު މަހާޒް ވަނީ އެ މައްސަލައިގައި ދައުލަތުން ހެދިފައި ހުރި ބައެއް ގޯސްތައް ފާހަގަ ކުރައްވައިފަ އެވެ.
އެގޮތުން އެސްއޯއެފްއަކީ އެމްއެމްޕީއާރްސީން ވަގަށް ނެގި 1.3 ބިލިއަނަށްވުރެ ގިނަ ރުފިޔާ ލޯންޑާ ކުރުމުގެ މައި ކުންފުނި ކަމަށް ދައުލަތުން އަމިއްލައަށް ބުނާއިރު އެ ކުންފުނީގެ މައްޗަށް އެކަށީގެންވާ ތަހުގީގެއް ހިންގާފައިނުވާކަން ފަނޑިޔާރު ފާހަގަ ކުރެއްވި އެވެ.
"އަބްދުﷲ ޔާމީން އަބްދުލްގައްޔޫމްގެ އެކައުންޓަށް ޖަމާވެފައިވާ އެއް މިލިއަން ޑޮލަރަކީ ކޮން ގޮތަކުން ޖަމާވި ފައިސާ ފައިސާއެއްކަން ޔަގީނެއް ނޫން. އެ ފައިސާ ޖަމާވެފައި ވަނީ އެސްއޯއެފް ކިޔާ ކުންފުންޏަކުން. މި މައްސަލައިގައި ކުރެވިފައިވާ ތަހުގީގުގައި އެ ކުންފުންޏާ ގުޅޭ ތަހުގީގެއް އެދެވޭ ގޮތަކަށް ކޮށްފައިވާ ކަމަށް ނުބެލެވޭ،" ފަނޑިޔާރު މަހާޒް ވިދާޅުވި އެވެ.
އެސްއޯއެފް ކުންފުނީގެ ވެރިންގެ މައްޗަށް ދައުވާ ނުކުރަން ނިންމާފައިވާކަން ހާމަވީ، ޔާމީންގެ ޝަރީއަތުގެ މެދު ތެރެއިން ދިޔަ އަޑުއެހުމެއްގައި، ފަނޑިޔާރުން ކުރި ސުވާލުތަކެއްގެ ތެރެއިންނެވެ. މިއަދު ހުކުމް އިއްވަވަމުން ފަނޑިޔާރު މަހާޒް ވިދާޅުވީ، މަނީ ލޯންޑާ ކުރުމުގެ އެންމެ ބޮޑު އާލާތަކީ އެސްއޯއެފް ކަމަށްވާއިރު އެ ކުންފުނީގެ ވެރިންގެ މައްޗަށް ދައުވާ ނުކުރުމަށް ނިންމުމުން ހައިރާންވެވަޑައިގެންނެވި ކަމަށެވެ.
"އަހުރެން ހައިރާންވީ އެސްއޯއެފް ކުންފުންޏަކީ، އެމްއެމްޕީއާރްސީ މައްސަލައިގައި މަނީ ލޯންޑާ ކުރުމަށް ބޭނުން ކުރި އެންމެ ވަރުހުރި އާލާތް ކަމަށް ދައުލަތުން ތަކުރާރުކޮށް ބުނުމަށްފަހު އެ ކުންފުނީގެ އިސް ފަރާތްތަކަށް ދައުވާ ވެސް ނުކުރުމަށް ނިންމާފައިވާ ވާހަކަ ބުނުމުން،" ފަނޑިޔާރު ވިދާޅުވި އެވެ.
އޭގެ އިތުރުން، ޔާމީންގެ އެކައުންޓަށް އެއް މިލިއަން ޑޮލަރު ޖަމާކުރުމުގައި އަމަލީ ގޮތުން ހަރަކާތްތެރިވި ދެ މީހުންގެ ހެކިބަސް ދަށު ކޯޓުގައި ނުނެގުމަކީ މައްސަލައެއްގެ ގޮތުގައި ފަނޑިޔާރު ފާހަގަ ކުރެއްވި އެވެ.
"މީގެ އިތުރަށް މި ފައިސާ ޖަމާ ކުރި މުއާމަލާތާ ގުޅިގެން، ފައިސާ ޖަމާ ކުރުމުގައި ހަރަކާތްތެރިވި ދެ މީހުންގެ ހެކި ބަސް ކްރިމިނަލް ކޯޓުން ނަގާފައިނުވުމަކީ މި މައްސަލައިގައި ލިބިފައިވާ ހެކި ބަލިކަށިވެދާނެ ހާލަތެއް ކަމުގައި ބަލައި އެ ހެކިންގެ އެ ކޯޓުން ނަގައި މައްސަލަ ނިންމުމުގެ ކުރިން އެ ހެކިންގެ ހެކި ބަހަށް އެ ކޯޓުން ބުރަދަނެއް ހޯދަން ދައުލަތުން މަސައްކަތްކޮށްފައެއް ނުވޭ. މިފަދައިން މަސައްކަތްކޮށް، އެ ކޯޓުން ކާމިޔާބުނުވި ނަމަ އެކަން އިސްތިއުނާފީ މައްސަލައިގައި ދައުލަތަށް ފަހި ކަމެއްގެ ގޮތުގައި ފާހަގަ ކުރެވުނީސް،" ހުކުމް އިއްވަމުން ފަނޑިޔާރު ވިދާޅުވި އެވެ.
ޔާމީންގެ މައްޗަށް ކްރިމިނަލް ކޯޓުން އިއްވި ފަސް އަހަރުގެ ޖަލު ހުކުމް ބާތިލް ކުރެއްވީ އެމަނިކުފާނުގެ އެކައުންޓަށް ޖަމާވެފައިވާ ފައިސާއަކީ ކުށުގެ އަމަލަކުން ހޯދާފައިވާ ފައިސާކަން ހުށަހަޅާފައިވާ ހެކިތަކުން ސާބިތުނުވާތީ އެވެ.
އެ މައްސަލައިގައި ޔާމީންއާ ދެކޮޅަށް ހެކި ބަސް ދިން ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ ވެރިޔާ އަބްދުﷲ ޒިޔަތުގެ ހެކިބަސް ބަލައިނުގަތުމަށް ސުޕްރީމް ކޯޓުން ނިންމި އެވެ. އެއީ އެ ދެ މީހުންނަކީ އެމްއެމްޕީއާރްސީގެ ވައްކަން ކުރިކަން އިއުތިރާފުވެފައިވާ ފާސިގުން ކަމަށްވެފައި، އެމީހުންގެ ހެކި ބަހަށް ބާރު ލިބިދޭ ގަރީނާއަކީ ކޮބައިކަން ދަށު ކޯޓުގެ ނިންމުމުގައި ބަޔާންކޮށްފައި ނެތުމުންނެވެ.
