ބްރިޖްޓައުން، ބާބޭޑޯސް (ނޮވެމްބަރު 28) - އިނގިރޭސި ރަސްކަމާ ވަކިވެ، ދުނިޔޭގެ އެންމެ ހަގު ޖުމްހޫރިއްޔަތަށް ވުމަށް ބާބޭޑޯސް އިން ތައްޔާރުވެއްޖެ އެވެ.
މި ހަފުތާގައި ބާބޭޑޯސްގެ ދައުލަތުގެ އެންމެ މަތީ ވެރިޔާގެ މަގާމުން ރާނީ އެލިޒަބަތު ވަކިކުރެއްވުމަށް ފަހު ގަވަރުނަރު ޖެނެރަލް ސެންޑްރާ މޭސަން އައްޔަނު ކުރައްވާނެ އެވެ.
އެކަން ފާހަގަކުރުމަށް ހޯމަ ދުވަހުގެ ހަވީރުން ފެށިގެން އަންގާރަ ދުވަހާ ހަމައަށް އުފާފާޅުކުރުމުގެ ހަރަކާތްތައް އޮންނާނެ އެވެ. އިނގިރޭސި ވަލީއަހުދު އަމީރު ޗާލްސް ބައިވެރިވެވަޑައިގަންނަވާ ރަސްމިއްޔާތުތަކުގެ ތެރެއިން ބާބޭޑޯސްގެ ރައީސްކަމާ ރަސްމީކޮށް މޭސަން ހަވާލުވެވަޑައިގަންނަވާނެ އެވެ.
ގާތްގަނޑަކަށް 285،000 މީހުންގެ އާބާދީއެއް އޮތް ބާބޭޑޯސް 200 އަހަރަށް ވުރެ ގިނަ ދުވަސްވަންދެން އޮތީ އިނގިރޭސި އަޅުވެތިކަމުގަ އެވެ. އެ ގައުމަށް މިނިވަންކަން ލިބުނީ 1966 ވަނަ އަހަރު އެވެ.
އަޅުވެތިކަމުގެ ތާރީހާ "މުޅިން" ވަކިވާނެކަން ބޮޑު ވަޒީރު މިއާ މޮޓްލީ އިއުލާނު ކުރެއްވިތާ އެއް އަހަރު ފަހުން ރައީސްކަމަށް މޭސަން އިންތިހާބުވެވަޑައިގެންނެވީ މިދިޔަ އޮކްޓޯބަރު މަހު އެވެ. އެކަމަނާ އަކީ ބާބޭޑޯސްގެ ފުރަތަމަ ރައީސުލްޖުމްހޫރިއްޔާ އެވެ.
