ތޭރަ އަހަރުގެ ދަރިފުޅު އަހުމަދު ޒަޔާން ވަރުނުލާ ރާޅުތަކުގެ ތެރޭގައި މޮޅު ހުނަރު ދައްކަމުން ދިޔަ އިރު ސަންފާ އަބްދުﷲ (ސަންފާއްތަ) އިހުސާސްކުރަމުން ދިޔައީ ދުނިޔޭގެ ހުރިހާ އުފަލެކެވެ. ވެރި ރަށުން ފެންނަ ތަރައްގީއާ މާ ދުރުގައި އޮތް އޭނާގެ އުފަން ރަށް، ގދ. ވާދޫ ގައި ހުވަފަތް ހާލުގައި ތަނަވަސް ކަމެއް ނެތި ބޮޑުކުރި ދަރިފުޅު އެ އޮތީ ގައުމީ ރާޅު މުބާރާތުގެ ޝަރަފަށް ވާދަކުރާ އެންމެ ހުނަރުވެރި ކުދިންގެ މެދުން ޖާގަ ހޯދައިގެން, އެ ދާއިރާގައި ރާއްޖޭގައި ތިބި އެންމެ ގާބިލު މީހުންގެ ކުރިމަތީގައި އޭނާގެ ކުޅަދާނަކަން ސާބިތުކޮށްދޭށެވެ. އެއަށްވުރެ ދޮއްޓަށް ހުރި 22 އަހަރުގެ އަހުޒަމް އިބްރާހީމް ވެސް ހަމަ އެ މުބާރާތުގައި އޭގެ ކުރިން ބޭއްވި ހީޓް ތަކުގައި ވާދަކޮށް ހުނަރު ދެއްކި އެވެ.
ރާޅުގަނޑުގެ ބޭރު ތޮށި މަތީގައި ކޮޅަށް ހުރެ ކަރުގެ ނާރުތައް ތިލަވާ ވަރަށް ޒަޔާނަށް ގޮވަމުން ހިތްވަރު ދެމުން ދިޔަ އިރު، އަދިވެސް ސަންފާއްތަގެ ހިތުގައި ގިލަނެއް އެބަ އޮތެވެ. ދަރިންގެ ކުށްވެރިއެއް ކަމުގައި ކުރެވޭ އިހުސާސް، މިހާރު އެ ކުދިންގެ މޫނުމަތިން ފޮޅެމުން ބޮޑުވަމުން އަންނަ އުޖާލާ ހިނިތުންވުން ފެންނަ ކޮންމެ ފަހަރަކު އޭނާ އަށް އުނދަގޫ ކުރެ އެވެ.
"ބޭނުންވާ ވަރަށް ސަންފާއްތަގެ ދަރިން ނުކިޔަވާތީ އެއްޗެހި ކިޔައި ތަޅައި އަނިޔާކޮށް ހެދިން. އެއީ ސަންފައްތަ އަށް ކުރެވުނު އެންމެ ގޯސް ކަންތައް. އެކަމާ ވަރަށް ދެރަވޭ. ކުދިންނަށް އަނިޔާ ކުރުމަކީ ކުރެވުނު ބޮޑު ކުށެއް. އެކުދިންގެ ޝައުގުވެރިކަން ހުރީ އަބަދުވެސް މޫދަށް. ނުވިސްނުނީ ސަންފާއްތަ އަަށް."
އޭނާ އަށް ލިބުނު ދިހަ ދަރިން ވެސް ބޮޑުވަމުން އައި އިރު އެންމެ ބޮޑު ޝައުގުވެރިކަމެއް ދެއްކީ މޫދަށެވެ. ބޮޑުވި ބޮޑުވީނުން އެރުނީ ބޮޑަށް ފުނަށް، ހޮޅިލާފައި ބޮޑެތި ރާޅު ނަގާ ވާދޫގެ މަޝްހޫރު "ހުޓިކޮޑާ" އަށެވެ.
ފިރި މަރުވެ، ދަރިންނާ އެކު އެކަނިވީ ދުނިޔޭގައި ތައުލީމެއް ނެތި، އެންމެ އަންހެން ކުއްޖަކު ފިޔަވާ ތިބި ހުސް ފިރިހެން ދަރިން، މަސްތުވާ ތަކެތިން 'ކަޅު'ވެފައި އޮތް ވާދޫގެ އަނދިރި ފަރާތަށް ދަމައިގެންފާނެއޭ ހީވެ ސަންފާއްތަ އަށް ވެސް ޖެހުނީ ހަޅޭކެވެ. އަތް އިސްކުރެވުނީ އެވެ.
ސަންފައްތަ -- ފޮޓޯ: އާއިމް ޒަމީރު/އަދަދު
"އެކަމަކު ހަޅޭ ލެވިޔަސް ކުދިން އިސްލާހެއް ނުވޭ. އެމީހުން ކުރަނީ އެމީހުން ކުރަން ބޭނުންވާ ކަމެއް ސަންފާއްތަ ކިތަންމެ އަނިޔާ ކުރިޔަސް. އެހެންވެ ވަކި ހިސާބަކުން އަމާން ދިނީ. ކުދިންގެ ޝައުގުވެރިކަމަކީ އެއީ ކަން ގަބޫލުކޮށް އެކުދިންނަށް ހިއްވަރު ދޭން އަޒުމް ކަނޑައެޅިން. އެހިސާބުން ވިސްނުން ބަދަލުވާން ފެށި،" ކަމަށް ސަންފައްތަ ބުންޏެވެ.
މިހާރު އޭނާގެ ހުރިހާ ދަރިން ވެސް އުޅެނީ މޫދު ކުޅިވަރުގަ އެވެ. ބައެއް ކުދިން ދާއިރާގެ ވަޒީފާ ތަކުގަ އެވެ. ހަގު ކުދިން ހުނަރު ފައްކާކުރުމުގަ އެވެ. މަސްތުވާތަކެއްޗާއި ހުތުރު އުޅުންތަކާއި އެކުދިން ދުރެވެ. ކުރާ ކަންތައްތަކާއި ދެކޭ ހުވަފެންތަކުގައި އެކުދިން އޭނާ ބައިވެރި ކުރެ އެވެ.
މައިންބަފައިންގެ ފަރާތުން ލިބޭ ހިއްވަރަކީ ކުދިންނަށް ވަރަށް ހިތްހަމަޖެހުން ލިބޭ ބާރެއްކަން ސަންފައްތަ މިހާރު ގަބޫލުކުރަން. އެހެންވީމަ މި ބުނީ އެކުދިން ހުއްޓުވަން ކުރިން އެ ކުރެވުނީ ވަރަށް ބޮޑު ކުށެކޭ. ވަރަށް ގިނަ ބެލެނިވެރިންނަށް ކުރެވޭ ކުށެއް އެއީ
ކުދިންގެ މުސްތަގުބަލު ބައްޓަންކުރުމުގައި ތައުލީމުގެ ދައުރު ބޮޑެވެ. އެކަމަކު ފޮތުން ދޭ ތައުލީމަކީ ހަމައެކަނި އެކުދިންގެ ވިސްނުން ފޯރުވަން ޖެހޭ އިން ކަމަށް ކަނޑައެޅުމަކީ އެކުދިންގެ ހުނަރުވެރިކަމާއި ގާބިލުކަން އެތައް ގުނައެއް ދަށަށް ގެނެސްދޭނެ ކަމެކެވެ.
އަހަރެމެންގެ މުޖުތަމައުގައި ކުރިއާ އަޅާ ބަލާއިރު މިހާރު، ހުނަރު ކުރިއަރުވަން ހިތްވަރުދޭ ބެލެނިވެރިން ތިއްބަސް، އަދިވެސް ބޮޑަށް ސިކުނޑި ހުޅުވަން ވީ އެވެ. ކުދިންނަށް ތަފާތުކޮށް އުހަށް އަމާޒުކުރަން ދަސްކޮށްދީ ހުވަފެންތައް ބިނާކުރަން މައިންބަފައިން ހިތްވަރުދޭންވީ އެވެ. އޭރުން އަމިއްލަ ނަފްސާމެދު ހިތްހަމަ ނުޖެހިފައި، އަޒުމާއި ޖޯޝާއި އިތުބާރު ގެއްލި، މަގުން ކައްސައިގެން ދާ ކުދިންގެ އަދަދު އެތައް ގުނައަކަށް މަދު ކުރެވޭނެ އެވެ.
ސަންފައްތަ ރާޅާ އަޅަނީ --
ކުދިންނަށް އެންމެ ރައްކާތެރި، އެންމެ އިތުބާރުކުރެވޭ ޒޯނަށް "މައިންބަފައިންގެ ޒޯން" ހަދާލެވިއްޖެނަމަ އެ ޒޯނުން ނިކުންނަ ކުދިންނަކީ ނަފްސާނީ ގޮތުންނާއި ޖިސްމާނީ ގޮތުން އެ ނޫން ކުދިންނާ އަޅާ ބަލާއިރު ދުޅަހެޔޮ، ވިސްނުންތޫނު ކުދިންނަށް ވެ އެވެ.
"ސަންފައްތަ އަށް އެ ބަދަލު ފެނުނު. ޒަޔާނުމެން ވެސް މިހާރު ވެސް ވަރަށް ބަސް އަހާ. އަހުޒަމް ވެސް ގޯސް ގޮތްގޮތަކަށް ނުދޭ. ކިޔެވުމަށް އެންމެ މޮޅު ނުވިޔަސް، އެކުދިންނަކީ ދިރިއުޅުމަށް ގަދައަޅައި މަސައްކަތްކުރާނެ، އަމިއްލަ ނަފުސަށް އެ އިތުބާރު އޮތް ކުދިން ކަން ސަންފައްްތަ އަށް އެނގޭ،" ފަހުރުވެރިކަމާ އެކު ވަކި ވަކިން ކޮންމެ ކުއްޖެއްގެ ނަން ކިޔާފައި ވާހަކަ ދައްކަމުން ތައާރަފު ދެމުން ސަންފާއްތަ ބުންޏެވެ.
