ލަންޑަން (ނޮވެމްބަރު 27) - ގަތަރުގައި އަންނަ އަހަރުގައި ބާއްވާ ފީފާ ވޯލްޑް ކަޕްގައި އެންމެ ފަހުން ޔޫރަޕްގެ ޗެމްޕިއަންކަން ހޯދި ދެ ޓީމު ކަމަށްވާ އިޓަލީ އާއި ޕޯޗުގަލްގެ ތެރެއިން ކޮންމެ ވެސް އެއް ޓީމަކަށް ނުކުޅެވޭނެކަން ކަށަވަރުވެއްޖެ އެވެ.
ޕޯޗުގަލް އާއި އިޓަލީ ކޮލިފައިންގައި ވާދަކުރި ގްރޫޕްތަކުން ދިޔައީ ރަނަރަޕަށެެވެ. އެހެންވެ، ވޯލްޑް ކަޕް ޖާގައެއް ހޯދަން ދެ ޓީމު ވެސް ކުޅެން ޖެހިފައި އޮތީ ޕްލޭއޮފް ބުުރުގަ އެވެ.
މިރޭ ބޭއްވި ޔޫރަޕްގެ ޕްލޭއޮފް މެޗުތަކުގެ ގުރުއަތުލުމުގައި އިޓަލީ އާއި ޕޯޗުގަލް ލައްވާލީ އެއް ފަޅިއެއްގަ އެވެ. އިޓަލީ ޕްލޭއޮފް ފުރަތަމަ މެޗުގައި ކުޅޭނީ ނޯތު މެސެޑޯނިއާއާ އެވެ. ޕޯޗުގަލް އިން ފުރަތަމަ މެޗުގައި ތުރުކީއާ ބައްދަލުކުރާނެ އެވެ.
ފުރަތަމަ ޕްލޭއޮފް މެޗުތަކުން މޮޅުވެއްޖެނަމަ ޕޯޗުގަލް އާއި އިޓަލީ ޖެހޭނީ ވޯލްޑް ކަޕްގެ ޖާގަ އަކަށް ގަދަހިފުމަކަށް ދާށެވެ. މި އަހަރުގެ ޔޫރޯ ތަށި އުފުލާލި އިޓަލީ އަށް އެންމެ ފަހުން 2018 ވަނަ އަހަރު ރަޝިއާގައި ބޭއްވި ވޯލްޑް ކަޕުން ޖާގަ ނުލިިބުނީ އެ ފަހަރުގެ ޕްލޭއޮފްގައި ސްވިޑެން އަތުން ބަލިވުމުންނެވެ. އަންނަ އަހަރުގެ ވޯލްޑް ކަޕުން އިޓަލީ އަށް ޖާގަ ނުލިބިއްޖެނަމަ އަނެއްކާ ވެސް އެ ގައުމުގެ ފުޓްބޯޅަ އަށް ބޮޑު ނާކާމިޔާބީއަކާ ކުރިމަތިލާން ޖެހުނީ އެވެ.
ގަތަރު ވޯލްޑް ކަޕަށް ޔޫރަޕްގެ ޕްލޭއޮފް ރޭވިފައިވާ ގޮތް.
އަނެއްކޮޅުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ކާމިޔާބު ކެރިއަރުގައި ކުޅެލަން ލިބޭނެ އެންމެ ފަހުގެ ވޯލްޑް ކަޕަކީ އަންނަ އަހަރު ގަތަރުގައި ބާއްވާ މުބާރާތަށް ވުމުގެ ފުރުސަތު ބޮޑެވެ. އެކަމަކު، މިހާރު މި ކުރިމަތިވީ ގޮތުން ގަތަރު ވޯލްޑް ކަޕްގައި ރޮނާލްޑޯ ނުފެނުމުގެ ފުރުސަތު ވެސް އެބައޮތެވެ.
ޕޯޗުގަލް ނެތި އެންމެ ފަހުން ވޯލްޑް ކަޕެއް ކުޅުނީ 1998 ވަނަ އަހަރު ފްރާންސްގަ އެވެ. އޭގެ ފަހުން ކޮންމެ ވޯލްޑް ކަޕެއްގައި ޕޯޗުގަލް ވާދަކުރެ އެވެ. ޕޯޗުގަލްގެ ކޯޗު ފެނާންޑޯ ސަންޓޯ ބުނީ އިޓަލީއާ މެދު ވިސްނަން ޖެހޭނީ ފުރަތަމަ ކުޅެން އޮތް ތުރުކީ މެޗުން މޮޅުވެގެން ކަމަށެވެ.
ޕޯޗުގަލް އާއި އިޓަލީ ޕްލޭއޮފްގެ ފުރަތަމަ މެޗުތަކުން ބަލިވެއްޖެނަމަ އަންނަ އަހަރުގެ ވޯލްޑް ކަޕްގައި ދެ ޓީމުން ކުރެ އެއްވެސް ޓީމެއް ނުފެނުމުގެ ފުރުސަތު ވެސް އެބައޮތެވެ.
އިޓަލީގެ ކޯޗު ރޮބާޓޯ މަންޗިނީ ބުނީ ފުރަތަމަ ހުރިހާ ސަމާލުކަމެއް ހުރީ ނޯތު މެސެޑޯނިއާ މެޗަށް ކަމަށެވެ. އެ މެޗުން މޮޅުވެގެން ފްރާންސް ނޫނީ ތުރުކީ ތެރެެއިން ކޮންމެ ޓީމަކާ ކުޅެން ޖެހުނަސް ފަސޭހަނުވާނެ ކަމަށް މަންޗިނީ ބުނެފައިވެ އެވެ.
ޕްލޭއޮފްގައި ދެން އޮތް ދެ ފަޅިން ފުރަތަމަ ފަޅީގައި ސްކޮޓްލެންޑާއި ޔޫކްރެއިން ކުޅެގެން މޮޅުވާ ޓީމެއް ވޯލްޑް ކަޕްގެ ޖާގަ ހޯދަން ކުޅެން ޖެހޭނީ އޮސްޓްރިއާ އާއި ވޭލްސް ބައްދަލުކޮށްގެން މޮޅުވާ ޓީމަކާ އެވެ. އަދި ރަޝިއާ އާއި ޕޮލެންޑް ކުޅެގެން މޮޅުވާ ޓީމެއް ވާދަކުރަން ޖެހޭނީ ސްވިޑެން އާއި ޗެކް ރިޕަބްލިކް ކުޅެގެން މޮޅުވާ ޓީމަކާ އެވެ.
އަންނަ އަހަރު ގަތަރުގައި ހޯސްޓްކުރާ ވޯލްޑް ކަޕް އޮތީ އާންމުކޮށް މުބާރާތް ބާއްވާ ތާރީހުގައެއް ނޫނެވެ. އެ މުބާރާތް ޝެޑިއުލްކޮށްފައި އޮތީ ގަތަރުގެ ފިނިހޫނުމިނަށް ބަލާފައި އަހަރު ފަހު ކޮޅަށެވެ. އެ ގޮތުން މުބާރާތް ކުރިއަށްދާނީ އަންނަ އަހަރު 21 ނޮވެމްބަރުން އިން 18 ޑިސެމްބަރަށެވެ.
ގަތަރުގައި އަންނަ އަހަރު ބާއްވާ ފީފާ ވޯލްޑް ކަޕުގެ ޖާގަ ހޯދާފައިވަނީ ހޯސްޓްގެ ހައިސިއްޔަތުން ގަތަރުގެ އިތުރުން 12 ގައުމަކުންނެވެ. އެއީ ދެކުނު އެމެރިކާގެ ބްރެޒިލާއި އާޖެންޓީނާގެ އިތުރުން ޔޫރަޕްގެ 10 ގައުމެކެވެ. ޔޫރަޕްގެ ގައުމުތަކަކީ ނެދަލެންޑްސްގެ އިތުރުން ޖަރުމަނާއި ފްރާންސް، ޑެންމާކް، ބެލްޖިއަމް، ސްޕެއިން، ސާބިއާ، ކްރޮއޭޝިއާ، އިންގްލެންޑް އަދި ސްވިޒަލެންޑް އެވެ.
