މޮސްކޯ، ރަޝިއާ (ނޮވެމްބަރު 25) - ރަޝިއާގެ ޖަލެއްގެ ތެރޭގައި ލާއިންސާނީ އަނިޔާކޮށް، ރޭޕްކުރާ މަންޒަރު ފެންނަ ވީޑިއޯ އާއްމުވުމާ އެކު ޖަލުތަކުގެ ވެރިޔާ މަގާމުން ވަކިކޮށްފަ އެވެ.
ރައީސް ލެޑިމިއަ ޕުޓިން ނިންމެވީ ފެޑެރަލް ޕްރިޒަން ސާވިސްގެ ޗީފް އެލެގްޒެންޑާ ކަލަޝްނިކޯވް މަގާމުން ވަކިކުރުމަށެވެ. އޭނާ އެ މަގާމުގައި ހުންނެވީ ދެ އަހަރެވެ.
އޭގެ ބަދަލުގައި އެ މަގާމަށް އައްޔަނުކޮށްފައި ވަނީ ފުލުހުންގެ ކާނަލްގެ މަގާމު ފުރުއްވަމުންދާ އަރްކަޑީ ގޮސްޓޭވް އެވެ.
މިދިޔަ މަހު އިންސާނީ ހައްގުތަކަށް މަސައްކަތް ކުރާ ގްރޫޕުތަކުން ވަނީ ސަރަޓޯވް ސިޓީގެ ޖަލެއްގެ ތެރޭގައި ހިނގާ ކަންކަން ފެންނަ ގިނަ ވީޑިއޯތައް އާއްމުކޮށްފަ އެވެ.
އެ ވީޑިއޯތައް ޖަލުގެ ތެރެއިން ބޭރަށް ސިއްރުން ނެރުނީ ކުރިން އެ ތަނުގައި ބަންދުކޮށްފައި ހުރި ސާގެއި ސަވެލްޔެވް އެވެ. އޭނާ ވަނީ ރަޝިއާ ދޫކޮށް ގޮސް، ފްރާންސްގެ ރައްކާތެރިކަމަށް އެދިފަ އެވެ.
މި މަހުގެ ކުރީކޮޅު ޕްރިޒަން ސާވިސް އިން ބުނީ އެ ވީޑިއޯތަކުގެ މައްސަލައިގައި ސަރަޓޯވް ސަރަހައްދުގެ 18 ޖަލު އޮފިޝަލުން ވަކިކުރި ކަމަށާއި ތަހުގީގުތައް ފަށާފައިވާ ކަމަށެވެ.
ވީޑިއޯތައް އާއްމުކުރި ސަވެލްޔެވް އަކީ ބެލަރޫސްގެ ރައްޔިތެކެވެ. ރަޝިއާ އިން ހޯދަމުންދާ މީހުންގެ ލިސްޓުގައި މިދިޔަ މަހު އޭނާގެ ނަން ހިމެނުމަށް ފަހު މިހާރު ވަނީ އުނިކޮށްފަ އެވެ.
ޖަލުގެ ގައިދީއެއްގެ ގޮތުގައި އުޅުނު އިރު، ސަވެލްޔޭވް ދިޔައީ އައިޓީ މެއިންޓެނަންސް އޮފިސަރެއްގެ ވަޒީފާ އަދާކުރަމުންނެވެ. އެހެންވެ، އެ ޖަލާއި އެހެން ޖަލުތަކުގެ އިންޓާނަލް ސާވާ އަށް އެކްސެސް އޮވެ އެވެ.
ޖަލުން ބޭރަށް ސިއްރުން ނެރުނު ވީޑިއޯތަކަކީ ސީސީޓީވީ ފުޓޭޖެވެ. އެ ވީޑިއޯތައް ޝާއިއުކުރީ ގޫލާގު ޑޮޓް ނެޓް އެންޖީއޯ އިންނެވެ.
