ދަ ހޭގް، ނެދަލޭންޑްސް (ނޮވެމްބަރު 20) - ފިލިޕީންސްގެ ރައީސް ރޮޑްރިގޯ ޑުޓާޓޭ މަސްތުވާތަކެއްޗާ ދެކޮޅަށް ކުރައްވާ ހަނގުރާމައިގައި ޖަރީމާ ހިންގާފައިވާ ކަމަށް ކުރެވޭ ތުހުމަތުތައް ބެލުމަށް ފެށި ތަހުގީގު މަޑުޖައްސާލަން އިންޓަނޭޝަނަލް ކްރިމިނަލް ކޯޓު (އައިސީސީ) އިން ނިންމައިފި އެވެ.
ޑްރަގާ ދެކޮޅަށް ފިލިޕީންސްގައި ކުރާ މަސައްކަތާ ހެދި އެތައް ހާސް ބަޔަކު މަރުވެފައި ވާއިރު، އާއްމުންނާ ދެކޮޅަށް ރާވައިގެން ގާނޫނާ ހިލާފު އަމަލު ހިންގުމުގެ ސިފަތަކެއް އެ ކެމްޕެއިނުން ފާހަގަވާ ކަމަށް ބުނެ އައިސީސީން މައްސަލަ ބަލަން ފެށީ ސެޕްޓެމްބަރު މަހު އެވެ.
ދެހާސް ސޯޅަ ވަނަ އަހަރު ޑުޓާޓޭ ރައީސް ކަމަށް އިންތިހާބުވެވަޑައިގެންނެވީ ޑްރަގާ ދެކޮޅު ކެމްޕެއިނުގެ ވައުދާ އެކު އެވެ. ފުލުހުންގެ ފުރާނަ އަށް ނުރައްކާ އޮތް ނަމަ މަސްތުވާތަކެއްޗާ ގުޅުން ހުރި ކަމަށް ބެލެވޭ މީހުން މެރުމަށް ޑުޓާޓޭ އާއްމުކޮށް އަމުރު ކުރި އެވެ.
ފިލިޕީންސް އިން އެންމެ ފަހުން އާއްމުކުރި ރަސްމީ ތަފާސްހިސާބުތައް ދައްކާ ގޮތުން ޖުލައި 2016 ގައި ފެށި އެ ކެމްޕެއިނުގައި ހިންގި 200،000 އަށް ވުރެ ގިނަ އޮޕަރޭޝަނުގައި 6،181 މީހުން މަރުވެފައިވެ އެވެ. އައިސީސީން ބަލަމުންދާ ލިޔުންތަކުގައިވާ ގޮތުން މަރުވި މީހުންގެ އަދަދު އުޅެނީ 12،000 އާއި 30،000 އާ ދެމެދުގަ އެވެ.
އައިސީސީގެ ތަހުގީގު މަޑުޖައްސާލަން އެދި ފިލިޕީންސްގެ ފަރާތުން ހުށަހެޅުއްވީ ސަފީރު އެޑުއާޑޯ މަލަޔާ އެވެ. ތަހުގީގު މަޑުޖައްސާލުމަށް ފަހު އައިސީސީން ބުނީ އިތުރު މައުލޫމާތު ފިލިޕީންސް އިން ސާފުކުރާނެ ކަމަށެވެ.
މީގެ ކުރިން 2019 ވަނަ އަހަރު ވެސް އައިސީސީން މި މައްސަލައިގެ ތަހުގީގެއް ފެށި އެވެ. އެއާއެކު ޑުޓާޓޭ ވަނީ ފިލިޕީންސް އައިސީސީން ވަކިކުރައްވާފަ އެވެ. ނަމަވެސް އައިސީސީން ބުނީ އެ ތަނުގެ މެމްބަރެއްގެ ގޮތުގައި ފިލިޕީންސް އޮތް އިރު ހިންގި ޖަރީމާތައް ބެލޭނެ ކަމަށެވެ.
ގިނަ ދުވަސްތަކެއް ވަންދެން ޑުޓާޓޭ ވިދާޅުވީ އައިސީސީން ފިލިޕީންސް ވަކިވެފައި ވާތީ މައްސަލަ ނުބެލޭނެ ކަމަށެވެ. ނަމަވެސް އެންމެ ފަހުން މިދިޔަ އޮކްޓޯބަރު މަހު ވިދާޅުވީ އައިސީސީ އަށް ހުށަހަޅަން ދިފާއު ތައްޔާރު ކުރައްވާނެ ކަމަށެވެ.
ސަފީރު މަލަޔާ އައިސީސީ އަށް ފޮނުއްވި ސިޓީގައި ވިދާޅުވީ މަސްތުވާތަކެއްޗާ ދެކޮޅު ހަނގުރާމައިގައި ހިންގާފައިވާ ކަމަށް ބެލެވޭ ކުށްތައް ތަހުގީގު ކުރުމަށް ފިލިޕީންސް ސަރުކާރުން ވެސް މަސައްކަތް ކުރަމުންދާ ކަމަށެވެ.
ހިޔުމަން ރައިޓްސް ވޮޗް އިން އެ ވާހަކަ ދޮގުކުރުމަށް ފަހު ބުނީ، މަރުވެފައިވާ މީހުންނާ ގުޅޭ ކަންކަން ބަލާ ކަމަށް ދައްކަން އުޅެނީ އައިސީސީގެ ތަހުގީގު ހުއްޓުވުމުގެ ބޭނުމުގައި ކަމަށެވެ.
