އަނިޔާވެރިގޮތަކަށް މަރާލާފައި އޮއްވާ ފެނުނު ބްލޮގަރު ޔާމީން ޔާމީން ރަޝީދުގެ ގާތިލުންގެ ގޮތުގައި ތުހުމަތު ކުރާ މީހުންނާ ދެކޮޅަށް ހެކި ބަސް ދިން ސިއްރު ހެކިވެރިއެއްގެ މައުލޫމާތު ސޯޝަލް މީޑިއާ އަށް ދޫކޮށްލީ ދައުވާ ލިބޭ ފަރާތުން ކަމަށް ދައުލަތުން ތުހުމަތުކޮށްފި އެވެ.
ޔާމީން ރަޝީދުގެ މަރުގެ މައްސަލައިގައި ހިމެނޭ ދެ ހެކިވެރިއެއްގެ މައުލޫމާތު ލީކުވެފައިވާކަމަށް ބުނެ މީގެ ދުވަސްކޮޅެއް ކުރިން ވަނީ ސޯޝަލް މީޑިއާގައި ޕޯސްޓްތަކެއް ދައުރުވެފަ އެވެ. އެއީ ސިއްރު ހެކިވެރިޔާ އާއި ދިފާއީ ވަކީލު ވެސް ސޮއިކޮށްފައިވާ ލިޔުންތަކެއް ކަމަށް މިއަދުގެ އަޑުއެހުމުގައި ދައުލަތުގެ ވަކީލް ވިދާޅުވި އެވެ. އެ ލިޔުން ކޯޓުން ދޫކޮށްފައި ވަނީ ދައުވާ ރައްދުވާ ހަތަރު މީހެއް ތަމްސީލުކުރާ ތިން ވަކީލުންނަށް ކަމަށް ދައުލަތުން ފާހަގަކުރި އެވެ.
އެއީ އިސްމާއިލް ހައިޝަމް ރަޝީދާއި އަހުމަދު ޒިހާން އިސްމާއިލް އާއި ހަސަން ޝިފާޒް، ތަމްސީލު ކުރައްވާ ވަކީލް އަހްމަދު ޔާމީން އަށާއި އިސްމާއިލް ރަޝީދުގެ ދެ ވަކީލުން ކަމަށްވާ ބާ ކައުންސިލްގެ ރައީސް މައުމޫން ހަމީދާއި އަހްމަދު ޝަފީގު އެވެ.
ދައުލަތުން ބުނި ގޮތުގައި މި މީހުން ނޫން އިތުރު ބަޔަކަށް ކޯޓުން އެ ލިޔުމެއް ދޫކޮށްފައި ނުވާނެ އެވެ. އެކަން ކްރިމިނަލް ކޯޓުގެ އިދާރާއިން ސާފުކުރެއްވި ކަމަށް އޭނާ ވިދާޅުވި އެވެ. އެހެން ކަމުން ސިއްރު ހެކިވެރިންގެ މައުލޫމާތު ސޯޝަލް މީޑިއާ އަށް ލީކްކޮށްލި ކަމުގެ ތުހުމަތު ކުރެވެނީ އެ ތިން ވަކީލުންނަށް ކަމަށް ދައުލަތުގެ ވަކީލް ވިދާޅުވި އެވެ.
މީގެ އިތުރުން ސިއްރު ހެކިވެރިންގެ ހެކިބަސް ލީކުވުމާއި އެކު އެމީހުންނަށް އެކިހަލަ އިންޒާރު އަންނަމުން ދާ ކަމަށާއި، ހެއްކަށް ނުފޫޒު ފޯރުވަމުން ދާކަން ދައުލަތުން ފާހަގަކުރި އެވެ. އަދި އެކަން ފުލުހުންގެ ސަމާލުކަމަށް އެ ފަރާތްތަކުން ގެނެސްފައިވާ ކަމަށާއި، ފުލުހުންގެ ފަރާތުން ޕީޖީއަށް އޮފީހަށް ފޮނުވި ލިޔުމެއް ދައުލަތުން މިއަދުގެ އަޑުއެހުމުގެ ކުރިން ޝަރީއަތާއި ހިއްސާކޮށްފައި ވާނެ ކަމަށް ޕްރޮސެކިއުޓަރު ވިދާޅުވި އެވެ.
މި ތުހުމަތާ ގުޅިގެން ވަކީލް ޔާމީން ވިދާޅުވީ ކޯޓުން އޭނާއަށް ލިޔުންތަކެއް ދޫކޮށްފައިވާ ކަމަށާއި، އެ ލިޔުންތައް ދޫކޮށްފައި ވަނީ އިޖުރާއަތްތައް ފުރިހަމަކުރުމަށް ފަހުގައި ކަމަށެވެ. އަދި ލިބެން ނުޖެހޭ އެއްވެސް ލިޔެކިޔުމެއް ލިބިފައި ނުވާކަން ފާހަގަކޮށް އޭނާ ވަނީ ސިއްރު ހެކިވެރިންގެ ހެކިބަސް ހިމެނޭ ލިޔުންތައް ހުންނާނީ އޭނާގެ އޮފީހުގައި ކަމަށް ވިދާޅުވެފަ އެވެ. އަދި އިތުރު ފަރާތަކަށް އެ ލިޔުންތައް އޭނާގެ ފަރާތުން ލިބިފައި ނުވާނެ ކަމަށް ބުނެ، ދައުލަތުން ކުރި ތުހުމަތަށް އޭނާ އިންކާރު ކުރެއްވި އެވެ.
ވަކީލް ޔާމީން ވިދާޅުވީ، އެއްވެސް އަސާސެއްގެ މައްޗަށް ބިނާނުކޮށް ދައުލަތުން ދިފާއީ ވަކީލުންގެ މައްޗަށް ބޮޑެތި ތުހުމަތުތައް ކުރުމަކީ ޒިންމާދާރުކަން ކުޑަ އަމަލެއް ކަމަށެވެ. އަދި އެކަމުގެ ސަބަބުން ދައުވާ ރައްދުވާ ފަރާތްތަކުގެ ކަރާމާތަށްވެސް އުނިކަން އަންނާނެ ކަމަށް ވިދާޅުވި އެވެ. އޭނާ ވަނީ ހެއްކަށް ނުފޫޒު ފޯރުވުމަށް ދައުލަތުންވެސް އެފަދަ ކަމެއް ކޮށްފާނެ ކަމުގައި ބެލެވޭ ކަމަށް ތުހުމަތުކޮށްފަ އެވެ.
ދައުލަތުގެ ތުހުމަތު ރައްދުވާ ވަކީލް މައުމޫން ވަނީ އެ މައުލޫމާތު ލީކްކޮށްލި ވަކީލުގެ ނަން ޝަރީއަތުގެ މަޖިލީހުގައި ހާމަކުރުމަށް އެދިފަ އެވެ. އަދި އެފަދަ ތުހުމަތުތައް ވަކި ބޭފުޅަކަށް އަމާޒުނުކޮށް ކުރުމަކީ "ވަކީލުކަމުގެ ޕްރޮފެޝަނިޒަމް ގެއްލޭ" ކަމެއް ކަމަށް ވިދާޅުވި އެވެ.
މައުމޫން ވަނީ މިފަދަ ތުހުމަތެއް ދައުލަތުން ކުރުމުން އެ މައްސަލަ އިތުރަށް ބަލާދިނުމަށް ގާޒީގެ އަރިހުގައި އެދިވަޑައިގެންފަ އެވެ. އަދި އެ ތުހުމަތު ދައުލަތަށް ސާބިތު ނުކޮށްދެވިއްޖެ ނަމަ ކޯޓުގެ ހުރުމަތް ކަނޑާލި ކަމަށް ކަނޑައަޅާ، ދައުލަތުގެ ވަކީލަށް ފިޔަވަޅު އެޅުމަށް ވެސް ގޮވާލެއްވި އެވެ.
މިއަދު ކުރިއަށް ދިޔަ ޝަރީއަތުގެ އަޑުއެހުމުގައި އޮތީ ހުލާސާ ބަޔާން އިއްވުމެވެ. ދައުލަތުންނާއި ދައުވާ ރައްދުވާ ފަރާތްތަކުން ހުލާސާ ބަޔާން އިއްވާ ނިމުމުން މި މައްސަލަ ބައްލަވާ ގާޒީ، އަލީ އާދަމް ވިދާޅުވީ ދެން އޮންނަ އަޑުއެހުމެއްގައި އޮންނާނީ ހުކުމް ކުރުން ކަމަށެވެ. ގާޒީ ވިދާޅުވީ މިއަދުން ފެށިގެން 30 ދުވަސްތެރޭގައި ހުކުމް ކުރައްވަން އަޑުއެހުމެއް ތާވަލް ކުރައްވާނެ ކަމަށެވެ.
titledesc
