މެޑްރިޑް (ނޮވެމްބަރު 18) - ސްޕެއިނުގެ ރެއާލް ސޮސިއެޑާޑަށް ކުޅެމުން އަންނަ ސްވިޑެންގެ ފޯވާޑް އަލެކްސަންޑަ އިސާކަށް ކުރިއަށް އޮތް ޖެނުއަރީ މަހު ލިވަޕޫލުން ބިޑްކޮށްފާނެ ކަމަށް ސްޕެއިނުގެ ނޫސްތަކުން ރިޕޯޓްކޮށްފި އެވެ.
އުމުރުން 22 އަހަރުގެ އިސާކް ވަނީ މި އަހަރުގެ ޔޫރޯ ފުޓްބޯޅަ މުބާރާތުގައި ސްވިޑެން ޓީމަށް މޮޅު ކުޅުމެއް ދައްކައިފަ އެވެ. މިދިޔަ ސީޒަނުގައި ސްޕެނިޝް ލީގުގައި 17 ގޯލު ޖެހި އިސާކް، ވަނީ މި ސީޒަނުގައި މިހާތަނަށް ސްޕެނިޝް ލީގުގެ ރޭހުގެ ކުރީގައި ސޮސިއެޑާޑް ބޭއްވުމުގައި އިސް ރޯލެއް އަދާކޮށްފަ އެވެ.
މި ސީޒަނުގެ މިހާތަނަށް އިސާކް ވަނީ ހުރިހާ މުބާރާތެއްގައި ކުޅުނު 13 މެޗުން ފަސް ގޯލު ޖަހައިފަ އެވެ.
އިސާކް ގަންނަން އިނގިރޭސި ޕްރިމިއާ ލީގުގެ ކްލަބްތަކުން ވަނީ މީގެ ކުރިން މަސައްކަތް ކޮށްފަ އެެވެ. ދާދި ފަހުން އިންޑިޕެންޑެންޓްް ނޫހަށް ދިން އިންޓަވިއުއެއްގައި އިސާކް ބުނީ މުޅި ދުނިޔެ އަށް ބެލިޔަސް ކްލަބް ފުޓްބޯޅައިގެ ވަރުގަދަ ނަންތައް ނިސްބަތްވަނީ އިނގިރޭސި ޕްރިމިއާ ލީގަށް ކަމަށާއި އެ ލީގުގެ ޓީމަކަށް މުސްތަގުބަލުގައި ކުޅުމުގެ ފުރުސަތު ބޮޑު ކަމަށެވެ.
ޖެނުއަރީ މަހުގެ ޓްރާންސްފާ މާކެޓްގައި ލިވަޕޫލުން އިސާކް ގަންނަން ޝައުގުވެރިވާ އެންމެ ބޮޑު ސަބަބަކީ އެ ޓީމުގެ މުހިއްމު ދެ ފޯވާޑުން މަހެއްހާ ދުވަހަށް ގައުމީ ޓީމަށް ދާނެތީ އެވެ. ޖެނުއަރީ މަސް ތެރޭ ލިވަޕޫލްގެ ފޯވާޑް މުހައްމަދު ސަލާހާއި ސަޑިއޯ މާނޭ އެފްރިކަން ކަޕް އޮފް ނޭޝަންސް ކުޅެންދާނެ އެވެ.
ސަލާހާއި މާނޭ ނެތްތަނަށް އެ ދުވަސްވަރަކަށް މޮޅު ފޯވާޑެއް ހޯދަން ޖެހޭ ސަބަބަކީ މި ސީޒަނުގައި ލިވަޕޫލްގެ ބްރެޒިލް ފޯވާޑް ރޮބާޓޯ ފިރްމީނޯ އަށް އަނިޔާ އާއި ފިޓްނަސްގެ މައްސަލަ ކުރިމަތިވަމުން އަންނާތީ އެވެ. މި ތިން ކުޅުންތެރިންގެ މަގާމުގައި ބޭނުންކުރަން ލިވަޕޫލްގެ ސްކޮޑުގައި ތިބީ ޑިއޯގޯ ޖޮޓާ، ޓަކޫމީ މިނަމީނޯ އަދި ޑިވޮކް އޮރީގީ އެވެ. މި ކުޅުންތެރިންގެ ތެރެއިން އޮރީގީ އަށް ވެސް ފިޓްނަސް މައްސަލަ ކުރިމަތިވެ އެވެ.
މި ހުރިހާ ސަބަބަކާ ހުރެ ލިވަޕޫލުން ޖެނުއަރީ މަހު އިސާކަށް ބިޑް ކުރުމުގެ ފުރުސަތު އެބައޮތެވެ. އިސާކް ގަންނަން ލިވަޕޫލުން 42 މިލިއަން ޑޮލަރު ހަރަދުކުރަން ޖެހޭނެ އެވެ.
މީގެ ދެ އަހަރު ކުރިން 2019 ވަަނަ އަހަރު ޖޫން މަހު ބޮރޫޝިއާ ޑޯޓްމަންޑް ދޫކޮށް ސޮސިއެޑާޑަށް ބަދަލުވެ، އިސާކް އެ ޓީމާ އެކު ސޮއިކުރީ ފަސް އަހަރުގެ އެއްބަސްވުމެއްގަ އެވެ. އެ ފަހަރު ޑޯޓްމަންޑް ދޫކޮށްލިއިރު، އެ ކްލަބުން ވަނީ އަލުން ބޭނުންނަމަ 30 މިލިއަން ޔޫރޯ ދީފައި އިސާކް ގެނެވޭ ގޮތަށް މާއްދާއެއް (ބައިބެކް ކްލޯސް) އެއް ހިމަނައިފަ އެވެ. ރިޕޯޓްތައް ބުނާގޮތުން މިދިޔަ ސީޒަނުގެ ނިޔަލަށް އެ މާއްދާގެ މުއްދަތު ވަނީ ހަމަވެފަ އެވެ.
