ދައުލަތުގެ ކޭޝްފްލޯ މެނޭޖްކުރުމަށްޓަކައި ސަރުކާރުން، މަރުކަޒީ ބޭންކް އެމްއެމްއޭ އިން ދަރަނި ނެގޭ ގޮތަށް ރައްޔިތުންގެ މަޖިލީހުން ދީފައިވާ ހުއްދަ އަނެއްކާ ވެސް އިތުރުކުރަން ހުށަހެޅީ ހީލަތްތެރި ރޭވުމެއްގެ ދަށުން 7.7 ބިލިއަން ރުފިޔާ ޗާޕްކުރުމަށް ކަމަށް އިދިކޮޅުން ތުހުމަތުކޮށްފި އެވެ.
އެ ހުއްދަ ތިން ވަނަ އަހަރަށް އިތުރުކޮށް ދިނުމަށް އެދި، ފިނޭންސް މިނިސްޓަރު ސޮއިކުރައްވައި މަޖިލީހަށް ފޮނުއްވި ސިޓީއެއްގައި ބުނެފައި ވަނީ އޯޑީގެ ސަބަބުން ދައުލަތުގެ ހަރަދުތައް ހަމަޖައްސައި ހިދުމަތްތަކަށް ބުރޫ ނާރާ ދައުލަތް ހިންގުމުގެ ފުރުސަތު ލިބުނު ކަމަށެވެ. ނަމަވެސް، އިގްތިސާދީ ގޮންޖެހުންތައް އަދިވެސް ދެމި އޮތުމުން ކުރު މުއްދަތެއްގައި ޕަބްލިކް ބޭންކް އެކައުންޓް އޯވާޑްރޯ ކުރި އަދަދު ދެއްކުމަކީ ކޭޝްޕްލޯ މެނޭޖުކޮށް، ބަޖެޓު ތަންފީޒު ކުރުމަށް ދަތިތައް ކުރިމަތިވެދާނެ ކަމެއްގެ އިތުރުން ފައިނޭންސް ހޯދަން ވެސް އެކަމުން ދަތިތަކެއް ކުރިމަތިވާނެ ކަމަށް ބުނެފައިވެ އެވެ.
އެހެންކަމުން، އެ އިސްތިސްނާގެ މުއްދަތު 2023 ވަނަ އަހަރު އޭޕްރީލް މަހާ ހަމައަށް އިތުރުކޮށް ދިނުމަށް އެ ސިޓީގައި އެދިފައިވެ އެވެ.
މިކަމާއި ގުޅިގެން ޕީޕީއެމް-ޕީއެންސީ ހިމެނޭ އިދިކޮޅު ޕްރޮގްރެސިވް ކޯލިޝަނުން މިއަދު ނެރުނު ބަޔާނެއްގައި ވަނީ ސަރުކާރަށް ބޮޑެތި ތުހުމަރުތަކެއް ކޮށްފަ އެވެ. އެ ކޯލިޝަނުން ތުހުމަތު ކުރާ ގޮތުގައި ސަރުކާރުގެ ވިސްނުން ހުރީ ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތަކަށް އަމަލުކުރުން 2023 ވަނަ އަހަރާއި ހަމައަށް ލަސްކުރުމަށްފަހު، 7.7 ބިލިއަން ރުފިޔާ ޗާޕްކުރުމަށެވެ.
މި ތުހުމަތުކޮށް އިދިކޮޅުން ވަނީ އެފަދަ ކަމެއް ނުކުރުމަށް ސަރުކާރަށް ގޮވާލައިފަ އެވެ.
"މިކަމަކީ މިކޯލިޝަނުން ވަރަށް ބޮޑަށް ކަންބޮޑުވާ ކަމަކަށްވާތީ މިގޮތަށް ގައުމުގެ އިގްތިސާދަށް ގެއްލުންދެނިވި ގޮތަކަށް އަދި ރައްޔިތުންނަށް އެކަމުގެ އެއްވެސް މަންފާއެއް ނެތް ގޮތަކަށް މިހާ ގިނަ އަދަދެއްގެ ފައިސާ ޗާޕުނުކުރުމަށް މިކޯލިޝަނުން ސަރުކާރަށް ގޮވާލަމެވެ،" އިދިކޮޅުން ނެރުނު ބަޔާނުގައިވެ އެވެ.
ފިނޭންސް މިނިސްޓްރީން ހިއްސާކޮށްފައިވާ މައުލޫމާތަށް ބަލާއިރު، އެ ހުއްދައިގެ ދަށުން މިހާތަނަށް 2.8 ބިލިއަން ރުފިޔާ އޯވާޑްރޯކޮށްފައިވާއިރު، އެ އަދަދު މި އަހަރު ނިމޭއިރު ހަތަރު ބިލިއަން ރުފިޔާއަށް އަރާނެކަމަށް ވަނީ ލަފާކޮށްފަ އެވެ. މިކަންވެސް އިދިކޮޅުގެ ބަޔާނުގައި ފާހަގަކޮށް ކަންބޮޑުވުން ފާޅުކޮށްފައިވެ އެވެ.
އިދިކޮޅުން ބުނަނީ މިހާ ސަރުކާރުން ޗާފްކުރި ފައިސާ ހޭދަކުރި ގޮތުގެ ތަފްސީލު ރައްޔިތުންނަށް އެނގެން ނެތް ކަމަށެވެ.
އިދިކޮޅުން ގަބޫލުކުރާ ގޮތުގައި އިސްތިސްނާގެ މުއްދަތު ދިގު ދަންމާލުމަށް ފަހު، އިތުރު ފައިސާތަކެއް ސަރުކާރުން ޗާޕްކޮށްފި ނަމަ، ތަކެތީގެ އަގު އަނެއްކާވެސް މައްޗަށް އުފުލި، ޑޮލަރުގެ އަގު ބޮޑުވެގެން ދާނެ އެވެ. އަދި ކަޅު ބާޒާރުގައި ޑޮލަރުގެ ރޭޓު މިހާރު ހުރި ވަރަށް ވުރެ ވެސް މައްޗަށް ދިއުމުގެ ފުރުސަތު ބޮޑުކަމަށާއި އަދި އޭގެ ސަބަބުން ރައްޔިތުންގެ ދިރިއުޅުމުގެ ހާލަތަށް އަސަރު ކުރާނެ ކަމަށް ވެސް އެ އިދިކޮޅުން ބުނެ އެވެ.
މީގެ އިތުރުން ބަޖެޓް މެނޭޖް ކުރުމަށްޓަކައި އިދިކޮޅުން ލަފާދެނީ ދައުލަތުގެ ރިކަރަންޓް ހަރަދު ކުޑަކޮށް މަޖިލީހުގެ މެންބަރުންނާ ސަރުކާރުގެ ސިޔާސީ އިސް މަގާމުތަކުގައި ތިބި މީހުންގެ މުސާރަ ކުޑަ ކުރުމަށެވެ. އަދި ސިޔާސީ މަގާމްތައް މަދުކުރުމަށާއި ދައުލަތުގެ އިސްރާފު ކުޑަކުރުމަށް ވެސް އެ ކޯލިޝަނުން ގޮވާލަ އެވެ.
އޯވާޑްރޯ ކޮށްފައިވާ އަދަދު އަނބުރާ ނުދެއްކޭނެތީ، މިނިސްޓްރީން ހުށަހަޅާފައިވަނީ އެ ހަތަރު ބިލިއަން ރުފިޔާ އެމްއެމްއޭއިން ދޫކުރާ އެމޯޓައިޒޭޝަން ބޮންޑަކަށް ބަދަލުކުރުމަށެވެ. އެގޮތުން، 50 އަހަރަށް ދޫކުރެވޭ ބޮންޑުގެ ކޫޕަން ރޭޓަކަށް މިނިސްޓްރީން ހުށަހަޅާފައިވަނީ 2.5 ޕަސަންޓެވެ.
