މެނީލާ، ފިލިޕީންސް (ނޮވެމްބަރު 16) - އަންނަ އަހަރު އޮންނަ ގާނޫނު ހަދާ މަޖިލިސް، ސެނެޓުގެ، އިންތިހާބުގައި ވާދަކުރަން ފިލިޕީންސްގެ ރައީސް ރޮޑްރިގޯ ޑުޓާޓޭ ނިންމަވައިފި އެވެ.
ފިލިޕީންސްގެ ގާނޫނު އަސާސީގައިވާ ގޮތުން ހަ އަހަރުގެ އެއް ދައުރަށް ފަހު އިތުރަށް ރައީސްކަން ނުކުރެއްވޭނެ އެވެ. އެހެންކަމުން އުމުރުން 76 އަހަރުގެ ޑުޓާޓޭ ފުރަތަމަ އުޅުއްވީ ނައިބު ރައީސް ކަމަށް ކުރިމަތިލުމަށެވެ.
ދެހާސް ސޯޅަ ވަނަ އަހަރު ވެރިކަމަށް އިންތިހާބުވެވަޑައިގެންނެވި ޑުޓާޓޭ މިދިޔަ މަހު ވިދާޅުވީ 2022 ވަނަ އަހަރު ރިޓަޔާ ކުރައްވާނެ ކަމަށެވެ. އޭގެ ފަހުން އެމަނިކުފާނުގެ ދަރިކަނބަލުން ސާރާ ވަނީ ނައިބު ރައީސް ކަމަށް ކުރިމަތިލައްވާފަ އެވެ.
ރިޕޯޓުތައް ބުނާ ގޮތުން ސެނެޓަށް ވާދަކުރަން ބޭނުންވާ ލިޔުންތައް ގާނޫނީ ވަކީލެއް މެދުވެރިކޮށް އިލެކްޝަންސް ކޮމިޝަންގެ އޮފީހަށް ޑުޓާޓޭ ހުށަހެޅުއްވީ ސުންގަޑި ހަމަވާން މިނެޓުކޮޅަކަށް ވެފައި ވަނިކޮށެވެ.
ދެހާސް ބާވީސް ވަނަ އަހަރު ރިޓަޔާ ކުރައްވާނެ ކަމަށް ޑުޓާޓޭ ވިދާޅުވުމުން ފާޑުކިޔުން އަމާޒުވި އެވެ. އެއީ މީގެ ކުރިން 2015 ވަނަ އަހަރު ވެސް އެގޮތަށް ވިދާޅުވުމަށް ފަހު އޭގެ ދެ މަސް ފަހުން ރިޔާސީ އިންތިހާބަށް ނުކުމެވަޑައިގެންފައި ވާތީ އެވެ.
އެނެލިސްޓުން ބުނާ ގޮތުގައި ރިޓަޔާ ކުރުމުގެ ބަދަލުގެ ސެނެޓަށް ވާދަކުރަން ޑުޓާޓޭ ނިންމެވީ ޑްރަގާ ދެކޮޅަށް ހިންގާ ހަނގުރާމައިގެ މައްސަލަ އިންޓަނޭޝަނަލް ކްރިމިނަލް ކޯޓް (އައިސީސީ) އިން ބަލަމުން ދާތީ ކަމަށެވެ.
ޑުޓާޓޭ ޑްރަގާ ދެކޮޅަށް ހިންގަވާ ކެމްޕެއިނަކީ އިންސާނީ ހައްގުތަކާ ހިލާފު މަސައްކަތެއް ކަމަށް ދޭހަވާތީ އެކަމާ ގުޅޭ ތަހުގީގެއް އައިސީސީން ފެށީ ސެޕްޓެމްބަރު މަހު އެވެ. އެ ކެމްޕެއިނުގައި އެތައް ހާސް ބަޔަކު މަރުވެފައިވެ އެވެ.
ފިލިޕީންސްގެ ގާނޫނުގެ ދަށުން ސެނެޓްގެ މެމްބަރެއްގެ މައްޗަށް ހަ އަހަރަށް ވުރެ ކުރު ޖަލުގެ ހުކުމެއް އަންނަ ފަދަ ކުށެއް ސާބިތުވި ނަމަވެސް ހައްޔަރެއް ނުކުރެވޭނެ އެވެ.
