ލިވަޕޫލް، އިނގިރޭސި ވިލާތް (ނޮވެމްބަރު 16) - ލިވަޕޫލްގެ ހޮސްޕިޓަލެއްގެ ބޭރުގައި އެއްޗެއް ގޮއްވާލައި ދިން ހަމަލާ އަށް ފަހު އިނގިރޭސި ވިލާތުގެ ޓެރަރިޒަމް އެލާޓް މަތިކޮށްފި އެވެ.
އިންޓީރިއާ މިނިސްޓަރު ޕްރިޓީ ޕަޓޭލް ވިދާޅުވީ ޓެރަރިޒަމްގެ ނުރައްކާ އޮތް މިންވަރު ބެލުމަށް ފަހު "ހާލަތު ގޯސް" ކަމަށް ކަނޑައަޅާފައިވާ ކަމަށެވެ. އެއީ ދެ ވަނަ އަށް އެންމެ މަތި އެލާޓެވެ. އެ އެލާޓުން އަންގައިދިނީ އިތުރު ހަމަލާއެއްގެ ފުރުސަތު އެބަ އޮތް ކަމެވެ.
ލިވަޕޫލް ވިމެންސް ހޮސްޕިޓަލުގެ ބޭރުގައި ދިން ހަމަލާ އަކީ އޮކްޓޯބަރު މަހުން ފެށިގެން އިނގިރޭސި ވިލާތުގައި ދިން ދެ ވަނަ ޓެރަރިސްޓު ހަމަލާ އެވެ. މިދިޔަ މަހު ޕާލިމެންޓް މެމްބަރު ޑޭވިޑް އެމެސްގެ ހަށިކޮޅަށް ވަޅިން ހަމަލާދީ އަވަހާރަކޮށްލާފައި ވެ އެވެ.
އިނގިރޭސި ވިލާތުގައި ފާހަގަކުރާ "ރިމެމްބްރަންސް ސަންޑޭ" އާ ދިމާކޮށް އާދީއްތަ ދުވަހު ހެނދުނު ލިވަޕޫލްގެ ހޮސްޕިޓަލުގެ ބޭރުގައި އައިއީޑީއެއް ގޮއްވާލީ ޓެކްސީއެއްގައި ދަތުރުކޮށްފައި ދިޔަ ޕަސެންޖަރެކެވެ. އެ ހަމަލާގައި އޭނާ މަރުވި ނަމަވެސް، ޓެކްސީ ޑްރައިވަރު ވަނީ ސަލާމަތްވެފަ އެވެ.
ފުލުހުން ބުނީ އަމިއްލަ އަށް މަރުވެގެން ދިން ހަމަލާގެ ފަހަތުގައި ހުރީ އުމުރުން 32 އަހަރުގެ އިމާދް އަލް ސްވީލްމީން ކަމަށެވެ. ހަމަލާ އަށް ފަހު ފުލުހުން ބަލައި ފާސްކުރި ދެ ގެޔަކީ އޭނާއާ ގުޅުން ހުރި ދެ ތަނެވެ. އެ ތަނުން އެއް ގެއިން ފުލުހުން ވަނީ ބައެއް ތަކެތި ގެންގޮސްފަ އެވެ.
މީގެ ކުރިން ފުލުހުން ވަނީ ތުހުމަތު ކުރެވޭ ތިން މީހުން ހައްޔަރުކޮށްފައި އެވެ. އުމުރުން 21 އަހަރާއި، 26 އަހަރާއި، 29 އަހަރުގެ ތިން ފިރިހެނުން އަދިވެސް ތިބީ ބަންދުކޮށްފަ އެވެ. އުމުރުން 20 އަހަރުގެ އިތުރު ފިރިހެނަކު ހޯމަ ދުވަހުގެ ހެނދުނު ހައްޔަރުކުރި އެވެ.
ރިޕޯޓުތައް ބުނާ ގޮތުން ހަމަލާގެ އަސްލު ޓާގެޓަކީ 2000 އަށް ވުރެ ގިނަ މީހުން ޖަމާވި ލިވަޕޫލް ކެތީޑްރަލްގައި އޮތް "ރިމެމްބްރަންސް ސަންޑޭ" އެއްވުމެވެ. ހަމަލާގައި އަނިޔާވި ޓެކްސީ ޑްރައިވަރު، ޕަސެންޖަރުގެ އަމަލުތަކާ މެދު ޝައްކު އުފެދި އޭނާ އަށް ޓެކްސީ އިން ނުނިކުމެވޭ ގޮތަށް ދޮރުތައް ތަޅުލި ކަމަށް ވެ އެވެ. އެހެންވެ، އެ ޓެކްސީ ޑްރައިވަރަކީ ބަތަލެއްގެ ގޮތުގައި އިނގިރޭސި ރައްޔިތުން ދަނީ ސިފަކުރަމުންނެވެ.
