ލަންޑަން، އިނގިރޭސި ވިލާތް (ނޮވެމްބަރު 15) - އާދީއްތަ ދުވަހުގެ ހެނދުނު ލިވަޕޫލް ވިމެންސް ހޮސްޕިޓަލުގެ ބޭރުގައި ކާރެއް ގޮއްވާލައި ދިން ހަމަލާގެ ތުހުމަތަށް ތިން މީހަކު ހައްޔަރުކޮށްފި އެވެ.
އެ ހަމަލާގައި އެކަކު މަރުވެ، އިތުރު މީހަކަށް އަނިޔާވި އެވެ. ތުހުމަތު ކުރެވޭ ތިން މީހުންނަކީ އުމުރުން 21، އަހަރާއި، 26 އަހަރު އަދި 29 އަހަރުގެ ފިރިހެނުންތަކެކެވެ.
ގްރޭޓާ މެންޗެސްޓާ ފުލުހުން ކުރި ޓްވީޓެއްގައި ބުނީ ތިން މީހުން ވެސް ހައްޔަރު ކުރީ ލިވަޕޫލްގެ ކެންސިންގްޓަން ޑިސްޓްރިކްޓުން ޓެރަރިޒަމް މަނާކުރުމުގެ ގާނޫނުގެ ދަށުން ކަމަށެވެ.
ހަމަލާގައި މަރުވި މީހާ އަކީ ކާކު ކަމެއް މިހާތަނަށް ހޯދިފައެއް ނުވެ އެވެ. އަނިޔާވެފައި ވަނީ ކާރުގެ ޑްރައިވަރަށް ކަމަށާއި އޭނާގެ ހާލު ރަނގަޅު ކަމަށް ފުލުހުން ބުންޏެވެ.
ތަހުގީގުގައި ޓެރަރިޒަމާ ދެކޮޅު ފުލުހުން އިސްކޮށް އުޅުނު ނަމަވެސް، މިއީ ޓެރަރިޒަމާ ގުޅުން ހުރި ހަމަލާއެއްގެ ގޮތުގައި އަދި ކަނޑައަޅާފައެއް ނުވެ އެވެ.
"މިހާތަނަށް ހޯދުނު މައުލޫމާތުން އެނގޭ ގޮތުގައި ގޮވާފައި ވަނީ ޓެކްސީއެއް. ގޮވުން ހިނގީ ހޮސްޕިޓަލުގެ ދޮރު މައްޗަށް ޓެކްސީ މަޑުކުރިތާ ކުޑައިރުކޮޅެއް ފަހުން،" ފުލުހުން ބުންޏެވެ.
