މެނީލާ، ފިލިޕީންސް (ނޮވެމްބަރު 13) - ފިލިޕީންސްގެ ރައީސް ރޮޑްރިގޯ ޑުޓާޓޭގެ ދަރިކަނބަލުން ސާރާ އެ ގައުމުގެ ނައިބު ރައީސް ކަމަށް ވާދަކުރަން ނިންމަވައިފި އެވެ.
ކޮމިޝަން އޮން އިލެކްޝަންސްގެ ފޭސްބުކް ޕޭޖުގައި ބުނެފައި ވަނީ 2022 ވަނަ އަހަރުގެ އިންތިހާބުގައި ސާރާ ނައިބު ރައީސް ކަމަށް ވާދަކުރައްވާނެ ކަމަށެވެ.
"މޭޔަރު އިންޑޭ ސާރާ ޑުޓާޓޭގެ މަންދޫބަކު ވަނީ އެކަމަނާ ނައިބު ރައީސް ކަމަށް ވާދަކުރައްވަން ހުށަހަޅަން ޖެހޭ ލިޔުންތައް ލަކަސް ސީއެމްޑީ ޕާޓީގެ ދަށުން ހުށަހަޅާފައި،" ސާރާގެ ތަރުޖަމާނު ކްރިސްޓީނާ ގާސިއާ ފްރާސްކޯ ފޭސްބުކްގައި ކުރެއްވި ޕޯސްޓެއްގައި ވިދާޅުވި އެވެ.
އަންނަ މޭ މަހު އޮންނަ އިންތިހާބުގައި ވާދަކުރަން ބޭނުންވާ ކެންޑިޑޭޓުންގެ ލިޔުންތައް ހުށަހެޅުމުގެ ސުންގަޑިއަކީ ނޮވެމްބަރު 15 އެވެ. އެންމެ ފަހު ވަގުތު ލިޔުންތައް ހުށަހެޅުމާ އެކު ލަކަސް ސީއެމްޑީ ޕާޓީގެ ފަރާތުން ރައީސް ކަމަށް ވާދަކުރައްވާ ފާޑިނަންޑް މާކޯސް ޖޫނިއާ ވަނީ ރަނިންމޭޓަށް މަރުހަބާ ދަންނަވާފަ އެވެ.
ކުރިން ބެލެވިފައި އޮތީ ސާރާ ރައީސް ކަމަށް ވާދަކުރައްވާނެ ކަމަށެވެ. އެކަމަނާގެ ބައްޕާފުޅު ޑުޓާޓޭގެ ހަ އަހަރުގެ ދައުރު ހަމަވުމުން ގާނޫނު އަސާސީގައިވާ ގޮތުގެ މަތިން އިތުރަށް ރައީސްކަމުގައި ނުހުންނެވޭނެ އެވެ.
ނަމަވެސް ސާރާ ވިދާޅުވަމުން ދިޔައީ ބޭނުން ވަނީ ޑަވާއޯ ސިޓީގެ މޭޔަރުގެ މަގާމުގައި ދެމިހުންނެވުމަށް ކަމަށެވެ. އެކަމަކު ހިޔާލު ހޯދުމުގެ ޕޯލްތަކުން ދައްކާފައި ވަނީ ރައީސް ކަމަށް ކުރިމަތިލައްވައިފި ނަމަ ސާރާ އަށް ބޮޑު ތަރުހީބެއް ލިބިވަޑައިގަންނަވާނެ ކަމަށެވެ.
އެކަމަނާ ވަނީ ފާއިތުވި ހަފުތާގެ ތެރޭގައި މޭޔަރު ކަމަށް ވާދަނުކުރަން ނިންމަވައި، ލަކަސް ސީއެމްޑީ ޕާޓީއާ ގުޅިވަޑައިގެންފަ އެވެ. އެ ޕާޓީއަކީ ސާރާގެ ގާތް ބޭފުޅެއް ކަމަށްވާ ކުރީގެ ރައީސް ގްލޯރިއާ އަރޯޔޯ ނިސްބަތްވެވަޑައިގަންނަވާ ޕާޓީ އެވެ.
އެ ޕާޓީގެ ފަރާތުން ނައިބު ރައީސް ކަމަށް ސާރާ ނުކުމެވަޑައިގެންނެވުމުން، މާކޯސް ޖޫނިއާ އަށް އިންތިހާބު ކާމިޔާބު ކުރެއްވުމުގެ ފުރުސަތު އިތުރަށް ބޮޑުވެ އެވެ.
