މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ޑިރެކްޓަރުކަމުގެ މަގާމުގައި ހުންނެވި ގޯޑަން އެންޑްރޫ ސްޓުވާޓް މިއަދު މަގާމުން ވަކިކޮށްފި އެވެ.
މިދިޔަ އަހަރުގެ ޖޫން މަހު އެ މަގާމަށް އައްޔަން ކުރި އެންޑްރޫ ވަކިކުރި ވަކި ސަބަބު އެމްއޭސީއެލް އިން ނުބުނި ނަމަވެސް އޭނާ އެ މަގާމުން ވަކިކުރީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) އަންގައިގެން ކަމަށް އެ ކުންފުނިން ބުނެއެވެ.
އެންޑްރޫއަކީ ޔޫރަޕް، މެދުއިރުމަތި، އުތުރު އެފްރިކާ، އޭޝިއާ، އުތުރު އެމެރިކާގައި އޭވިއޭޝަން އެންޑް ޓްރާންސްޕޯޓުގެ ދާއިރާގައި 30 އަހަރުގެ ތަޖުރިބާ ލިބިވަޑައިގެންފައިވާ ބޭފުޅެކެވެ.
އެމްއޭސީއެލްގެ ސީއީއޯ މަގާމުން ވަކޮށްފައިވާއިރު، އެކުންފުނިން މިއަދު ވަނީ ޗީފް އޮޕަރޭޝަންސް އޮފިސަރުގެ މަގާމަަށް އިނގިރޭސިވިލާތަށް ނިސްބަތްވާ ޑެރަން ވިލިއަމްސް އައްޔަން ކުރައްވާފައެވެ.
އެއާޕޯޓްތައް ހިންގެވުމުގައި ދާއިރާގައި 20 އަހަރުގެ ތަރުޖިބާ ލިބިފައިވާ ޑެރަންއަކީ އެމްއޭސީއެލްއާ ގުޅުމުގެ ކުރިން ދުނިޔޭގައި ވެސް އެންމެ ބާރުބޮޑު އެއް އެއާޕޯޓް ކަމަށްވާ ދުބާއީ އިންޓަނޭޝަނަލް އެއާޕޯޓުގައި މަސައްކަތް ކުރެއްވި ބޭފުޅެކެވެ.
ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލް އަށް މިދިޔަ އަހަރުގެ ތެރޭގައި ސީއީއޯއެއް އައްޔަން ކުރީ ވަރަށް ގިނަ ދުވަހަށް ފަހުއެވެ. އެންޑްރޫގެ ކުރިން އެމްއޭސީއެލްގެ ސީއީއޯގެ މަގާމުގައި އެންމެ ފަހުން ބޭފުޅަކު ހުންނެވީ އިންޑިއާގެ ޖީއެމްއާރުން އެއާޕޯޓު ހިންގި ދުވަސްވަރު އެވެ. އޭރުގެ ސީއީއޯ އަކީ އެންޑްރޫ ހެރިސަން އެވެ.
