ލަންޑަން، އިނގިރޭސިވިލާތް (ނޮވެމްބަރު 10) - އަގުހެޔޮ، ކުޑަ ނިޔުކްލިއާ ރިއެކްޓަރުތައް އުފައްދައި އިނގިރޭސިވިލާތުން ބޭރު ކުރާ ކާބަން މަދުކުރަން އެހީވާނެ ކަމަށް ވައިގެ އުޅަނދުތަކުގެ އިންޖީން އުފައްދާ ރޯލްސް ރޮއިސް ކުންފުނިން ބުނެފި އެވެ.
ރޯލްސް ރޮއިސްއިން އެހެން ބުނެފައި ވާއިރު ނިޔުކްލިއާ ހަކަތައިގެ ދާއިރާ ފުޅާކުރަން އިނގިރޭސިވިލާތުން އަންނަނީ ފިޔަވަޅުތަކެއް އަޅަމުންނެވެ. އެގޮތުން މި ފަހުން އެ ގައުމުގައި ގާއިމްކުރާ އެންމެ ބޮޑު ނިޔުކްލިއާ ޕްލާންޓް "ހިންކްލީ ޕޮއިންޓް ސީ" ގެ ބިޔަ ޕްރޮޖެކްޓު ވަނީ ލޯންޗުކޮށްފަ އެވެ.
ރޯލްސް ރޮއިސްއިން ބުނީ 547 މިލިއަން ޑޮލަރު އިންވެސްޓުކޮށްގެން ކުޑަ މޮޑިއުލާ ރިއެކްޓަރެއް އުފައްދާފައިވާ ކަމަށެވެ. އެފަދަ ރިއެކްޓަރަކީ ބޮޑެތި ނިޔުކްލިއާ ޕްލާންޓްތަކާ އަޅާ ބަލާއިރު ކުޑަ ހޭދައެއް ކޮށްގެން ފަސޭހައިން އުފެއްދޭ އެއްޗެކެވެ.
"މިއަދުގެ މި ނިންމުމަކީ ސަރުކާރުގެ ނެޓް ޒީރޯ ސްޓްރެޓެޖީ އަށް ވާސިލްވުމުގައި އެހީވުމަށް ލިބުނު އިތުރު ކުރިއެރުމެއް،" އެ ކުންފުނިން ނެރުނު ބަޔާނެއްގައި ބުންޏެވެ.
ނަމަވެސް, ތިމާވެށި ގްރޫޕުތަކުން ބުނީ ނިޔުކްލިއާ ހަކަތަ އަށް ވުރެ ބޮޑަށް އިނގިރޭސިވިލާތުން އިސްކަން ދޭންވީ އިއާދަކުރަނިވި ޓެކްނޮލޮޖީތަކަށް ކަމަށެވެ.
އިނގިރޭސި ސަރުކާރުގެ އަމާޒަކީ ނިޔުކްލިއާ ހަކަތައިގެ އެހީގައި 2050 ވަނަ އަހަރާ ހަމައަށް ދާން ވާއިރަށް ކާބަން ނެޓް ޒީރޯ ހާސިލް ކުރުމެވެ.
ރޯލްސް ރޮއިސްގެ އުއްމީދަކީ ނިޔުކްލިއާ ރިއެކްޓަރު ވިޔަފާރީގެ ތެރެއަށް ވަނުމުން 2050 ވަނަ އަހަރުގެ ކުދިން މަދުވެގެން 40،000 އާ ވަޒީފާ އުފެއްދުމެވެ.
