ކޮވިޑު ބަލި ޖެހުމުން ފުއްޕާމޭ ފެއިލްވެ، މަރުވުމުގެ ފުރުސަތު ދެ ގުނަ އިތުރު ކުރާ ޖީން އެއް ޔުނިވާސިޓީ އޮފް އޮކްސްފޯޑުގެ ސައިންޓިސްޓުން ހޯދައިފި އެވެ.
ސައިންޓިސްޓުން ބުނީ ދެކުނު އޭޝިއާ ދަރިކޮޅަށް ނިސްބަތްވާ 60 ޕަސެންޓު މީހުންގެ ހަށިގަނޑުގައި އެ ޖީންގެ ނުރައްކާ ބޮޑު ވާޝަން ހިމެނޭ ކަމަށާއި ޔޫރަޕު ދަރިކޮޅަށް ނިސްބަތްވާ 15 ޕަސެންޓު މީހުންގެ ހަށިގަނޑުގައި ވެސް އެ ޖީން ހިމެނޭ ކަމަށެވެ.
އެ ޖީންގެ ސަބަބުން ކޮވިޑުގައި ހާލު ދެރަވުމުގެ ފުރުސަތު ބޮޑު ނަމަވެސް، ވެކްސިނާއެކު އެ ނުރައްކާ ވަރަށް ބޮޑު ތަނުން ކުޑަކުރެވޭ ކަމަށް ސައިންޓިސްޓުން ބުންޏެވެ.
ނޭޗާ ޖެނެޓިކްސްގައި ޝާއިއުކޮށްފައިވާ ދިރާސާގައި ވަނީ އިނގިރޭސިވިލާތާއި ދެކުނު އޭޝިއާގެ ބައެއް ކޮމިއުނިޓީތަކަށް ކޮވިޑުގައި ބޮޑުވަރުވާ ސަބަބު ހޯދަން މަސައްކަތް ކޮށްފަ އެވެ.
މީގެ ކުރިން ކޮށްފައިވާ ބައެއް ޖެނެޓިކް މަސައްކަތްތަކަށް ބިނާކޮށް ސައިންޓިސްޓުން ވަނީ އާޓިފިޝަލް އިންޓެލިޖެންސާއި މުޅިން އާ މޮލެކިއުލާ ޓެކްނޮލޮޖީއެއްގެ އެހީގައި ކޮވިޑުގެ ނުރައްކާ ބޮޑުވާ ސީދާ ޖީން ދަނެގަނެފަ އެވެ. އޭގެ ނަމަކީ އެލްޒީޓީއެފްއެލް1 އެވެ.
ސައިންޓިސްޓުން ލަފާކުރާ ގޮތުގައި އެ ޖީންގެ ނުރައްކާ ބޮޑު ވާޝަން ހުރިހާ ދަރިކޮޅެއްގެ މީހުންގެ ހަށިގަނޑުގައި ވެސް ވެ އެވެ. އެގޮތުން އެފްރިކާ އަދި ކެރީބިއަން ދަރިފަސްކޮޅުގެ މީހުންގެ ދެ ޕަސެންޓާއި އިރުމަތީ އޭޝިއާ ދަރިކޮޅުގެ މީހުންގެ 1.8 ޕަސެންޓުގެ މެދުގައި އެ ޖީން ހިމެނޭ ކަމަށް ލަފާކުރި އެވެ.
ދިރާސާގައި އިސްކޮށް އުޅުނު ޕްރޮފެސަރު ޖޭމްސް ޑޭވީޒް ވިދާޅުވީ އެ ޖީންގެ އަސަރު އެކި ދަރިފަސްކޮޅުގެ މީހުންނަށް ކުރަނީ އެކި މިންވަރަށްކަން ހޯދުމަކީ ވަރަށް މުހިއްމު ކުރިއެރުމެއް ކަމަށެވެ.
އެހެން ނަމަވެސް ވަކިވަކި ފަރުދުންގެ މެދުގައި ނުރައްކާ ބޮޑުވާ މިންވަރު ބިނާވަނީ އެ މީހެއްގެ އުމުރާއި ސިއްހީ އެހެން މައްސަލަތަކުގެ މައްޗަށް ކަމަށް އޭނާ ފާހަގަކުރެއްވި އެވެ.
އޭގެ އިތުރުން އިޖްތިމާއީ އަދި އިގްތިސާދީ ކަންކަމާ ހެދި ވެސް ނުރައްކާ ބޮޑުވާ މިންވަރު ތަފާތުވެދާނެ ކަމަށާއި ބަލިމަޑުކަމުގައި ބައެއް ގައުމުތަކަށް ވަރަށް ބޮޑަށް އަސަރުކޮށްފައިވާ މަންޒަރު ފެންނަނީ އެހެންވެގެން ކަމަށް ޑޭވީޒް ވިދާޅުވި އެވެ.
"އަޅުގަނޑުމެންގެ ހަށިގަނޑުގެ ޖެނެޓިކްސް ބަދަލު ކުރުމަކީ ކުރެވޭނެ ކަމެއް ނޫން. އެހެން ނަމަވެސް މި ޖީން ހިމެނޭ މީހުންނަށް ވެކްސިން ޖެހުމުން ކުރާ ފައިދާ ބޮޑުކަމަށް އަޅުގަނޑުމެންގެ ދިރާސާ އިން ދައްކާ."
