މޫސުމީ ބަދަލުގެ އަސަރުން އަރައިގަތުމަށް ފަގީރު ގައުމުތަކަށް އެހީވުމަށް ޔޫކޭ އިން 290 މިލިއަން ޕައުންޑް ނުވަތަ 390 މިލިއަން ޑޮލަރު ދޭން ވައުދުވެއްޖެ އެވެ.
އެކަން އިއުލާނު ކުރީ މިހާރު ގްލާސްގޯގައި ކުރިއަށްދާ އދ. ގެ މޫސުމީ ބަދަލާ ގުޅޭ ބޮޑު ސަމިޓު، ކޮޕް26ގެ ތެރެއިންނެވެ.
ފަގީރު ގައުމުތަކުން ޑިމާންޑު ކުރަނީ އެހީގެ ގޮތުގައި އަހަރަކު 100 ބިލިއަން ޑޮލަރު ހުރިހާ މުއްސަނދި ގައުމުތަކުން ދިނުމަށެވެ. އެކަމަށް މުއްސަނދި ގައުމުތަކުން ކުރިން އެއްބަސްވި ނަމަވެސް އެ އަދަދަށް ފައިސާ ނުދެ އެވެ.
މޫސުމީ ބަދަލު އަންނަން މެދުވެރިވި ވިހަ ގޭސްތައް ޖައްވަށް ބޭރު ކުރުމުގައި ފަގީރު އަދި ތަރައްގީވަމުން އަންނަ ގައުމުތަކުން ހިއްސާ ކުރަނީ ވަރަށް ކުޑަ މިންވަރެކެވެ. ނަމަވެސް މޫސުމީ ބަދަލުގެ އަސަރު އެންމެ ބޮޑަށް ކުރަނީ އެ ގައުމުތަކަށެވެ.
ޔޫކޭ އިން ބުނީ އެ ގައުމުން ފޯރުކޮށްދޭ ފައިސާ ދާނީ އޭޝިއާ އަދި ޕެސިފިކް ގައުމުތަކަށް މޫސުމީ ބަދަލުގެ އަސަރު ކުޑަކޮށް ދެމެހެއްޓެނިވި ތަރައްގީ އަށް އިންވެސްޓް ކުރުމަށް ކަމަށެވެ.
މިދިޔަ ހަފުތާގެ އާދީއްތަ ދުވަހު ފެށި ކޮޕް26 ސަމިޓު ނިންމާލާނީ އަން ހަފުތާގެ އާދީއްތަ ދުވަހު އެވެ. ގައުމުތަކުން މަޝްވަރާ ކުރަނީ ދުނިޔެ ހޫނުވުން 1.5 ޑިގްރީ އަށް ވުރެ މަތިވިޔަ ނުދީ ހިފެހެއްޓުމަށް އަޅާނެ ފިޔަވަޅުތަކާ މެދު އެވެ.
