ކޮލޮމްބޯ، ސްރީ ލަންކާ (ނޮވެމްބަރު 8) - ހަފުތާއެއް ވަންދަން ވެހުނު ވާރޭގައި ސްރީ ލަންކާ އާއި ދެކުނު އިންޑިއާގައި ފެންބޮޑުވެ ނުވަ މީހުން މަރުވެ، ދެ މީހުން ގެއްލިގެން ހޯދަމުން އެބަ ދެ އެވެ.
ވާރޭގެ ސަބަބުން ލަންކާގެ 25 ޑިސްޓްރިކްޓުގެ ތެރެއިން ދެބައިކޮށްފައި އެއް ބަޔަށް އަސަރުކޮށްފައި ވާއިރު އެންމެ ބޮޑަށް އަސަރު ކުރީ ސައިފަތް ދަނޑުތައް ހުންނަ ހިސާބުތަކަށެވެ.
"އޮކްޓޯބަރު މަހުގެ ފަހުކޮޅު ވާރޭ ވެހެން ފެށި ފަހުން ލަންކާ އިން ފަސް މީހުން މަރުވެ، ދެ މީހުން ގެއްލިގެން ރިޕޯޓު ކުރި،" އެ ގައުމުގެ ޑިޒާޒްޓާ މެނޭޖްމަންޓް އެޖެންސީގެ ޕްރަދީޕް ކޮޑިޕިއްލި ވިދާޅުވި އެވެ.
މޫސުމާ ބެހޭ ބިޔުރޯ އިން ލަފާކޮށްފައިވާ ގޮތުގައި ކުރިއަށް އޮތް ދުވަސްތަކުގައި ބޮޑަށް ވާރޭ ވެހޭނެ ކަމަށް ބެލެވެނީ ލަންކާގެ އުތުރު އައްސޭރިފަށާ ދިމާލުން ޖަފްނާ ސިޓީ ހިމެނޭ ސަރަހައްދަށެވެ.
އިންޑިއާގެ ޓަމިލް ނާޑޫ ސްޓޭޓްގެ ޑިޒާޒްޓާ މެނޭޖްމަންޓް މިނިސްޓަރު ކޭކޭއެސްއެސްއާރް ރާމަޗަންދްރަން ވިދާޅުވީ އެ ސްޓޭޓުގައި ވާރޭގެ ސަބަބުން ހަތަރު މީހުން މަރުވި ކަމަށެވެ.
އޭނާ ވިދާޅުވީ ފެންބޮޑުވުމުން ގެތަކުން ނުކުންނަން ޖެހުނު މީހުންނަށް އެހީ އާއި ކާބޯތަކެތި ފޯރުކޮށްދިނުމަށް 150 ވަގުތީ ހިޔާ ގާއިމްކޮށްފައިވާ ކަމަށެވެ.
އެ ސްޓޭޓުގެ ވެރިރަށް ޗެންނާއީގެ ބޮޑެތު މަގުތަކުގައި ވެސް ފެންބޮޑުވެފައި ވާއިރު، ގަސްތައް ވެއްޓުމުގެ ސަބަބުން ޓްރެފިކަށް އަސަރު ކުރި އެވެ.
މީގެ ކުރިން 2015 ވަނަ އަހަރު ރިކޯޑު މިންވަރަށް ޗެންނާއީ އަށް ވާރޭވެހި ފެންބޮޑުވުމާ އެކު 250 އަށް ވުރެ ގިނަ މީހުން މަރުވި އެވެ.
ސައިންސްވެރިން ބުނާ ގޮތުގައި މޫސުމީ ވިއްސާރަ އާއި ހޫނުވުމުގެ އަސަރު ކުރިއަށް ވުރެ މާ ބޮޑަށް އަދި އަވަސް އަވަހަށް މިހާރު ދިމާވަމުން ދަނީ މޫސުމީ ބަދަލާއި، ޖަންގަލިތަކުން ގަސް ކެނޑުމާއި، ކޯރުތަކުގައި ޑޭމް ހަރުކުރުމުގެ އިތުރުން ދެމެހެއްޓެނިވި ނޫން ގޮތްގޮތަށް ތަރައްގީ ކުރަމުން ދާތީ އެވެ.
