އަންނަ ހަފްތާގައި ސްރީ ލަންކާގައި ފަށާ މަހިންދުރަ ރާޖަޕަކްސަ ފޯ ނޭޝަންސް ކަޕަށް އެކުލަވާލި ފައިނަލް ސްކޮޑުގައި ޒުވާން ކީޕަރު ޔޫސުފް މީސަމް އަބްދުﷲ އާއި މިޑްފީލްޑަރު ޔަސްފާދު ހަބީބު (މުލަކޭ) ހިމަނައިފި އެވެ.
ދާދި ފަހުން ގައުމީ ޓީމުގެ ކޯޗުކަމާ ހަވާލުވި އިޓަލީގެ ފްރެންޗެސްކޯ މޮރިއޭރޯގެ އިރުޝާދުގެ ދަށުން ލަންކާގައި ރާއްޖެ ކުޅޭ ފޯ ނޭޝަންސް ކަޕަށް ގައުމީ ޓީމު މިއަދު ވަނީ ފުރާފަ އެވެ.
މިދިޔަ މަހު 1-16 އަށް މާލޭގައި ބޭއްވި އުރީދޫ ސާފް ޗެމްޕިއަންޝިޕް ފުޓްބޯޅަ މުބާރާތަށް ނެގި ފައިނަލް ސްކޮޑަށް ބަލާއިރު، ފޯ ނޭޝަންސް ކަޕްގެ ފައިނަލް ސްކޮޑަށް އައިސްފައިވަނީ ދެ ބަދަލެކެވެ.
އެއީ އަނިޔާގެ ސަބަބުން ގައުމީ ޓީމާ ވަކިވާން ޖެހުނު އެއް ވަނަ ކީޕަރު މުހައްމަދު ފައިސަލް އާއި އާއިލީ ސަބަބެއްގައި ޓީމާ ދުުރުގައި މި ވަގުތު ހުރި ފުލްބެކް މޫސާ ޔާމީން (ޔާމްބެ)ގެ ބަދަލުގައި ކީޕަރު ޔޫސުފާއި މުލަކޭ ހިމެނުމެވެ. މިއަދު ގައުމީ ޓީމު ފުރިއިރު، ކެޕްޓަން އަކުރަމް އަބްދުލް ގަނީ (އަކޫ) ވެސް ޓީމާ އެކު ނުދާނެ އެވެ. އާއިލީ ކަމެއްގައި މާލޭގައި މަޑުކުރުމަށް ފަހު އަކޫ ފަހުން ޓީމާ ގުޅޭނެ އެވެ.
ފާއިތުވި ސީޒަނުގައި މޮޅު ކުޅުމެއް ދެއްކި މުލަކޭ ވަނީ ސާފް ޗެމްޕިއަންޝިޕްގެ ޕްރިލިމިނަރީ ސްކޮޑުގައި ހިމެނި ގަތަރު ޓްރެއިނިން ކޭމްޕްގައި ވެސް ބައިވެރިވެފަ އެވެ. އޭނާ ޓީމުން ބާކީވީ ސާފް ޗެމްޕިއަންޝިޕަށް ސްކޮޑު ފައިނަލް ކުރިއިރު އެވެ.
މުލަކޭ އެންމެ ފަހުން ގައުމީ ޓީމުގެ ރަސްމީ ފައިނަލް ސްކޮޑެއްގައި ހިމެނިގެން މެޗެއް ކުުޅުނީ 2018 ވަނަ އަހަރުގެ މާޗް މަހު ސިންގަޕޫރާ ދެކޮޅަށް ކުޅުނު އެކުވެރިކަމުގެ މެޗުގަ އެވެ. އޭގެ ފަހުން އޭނާ އަށް ގައުމީ ޓީމުގެ ޕްރިލިމިނަރީ ސްކޮޑުން ފުރުސަތު ލިބުނު ނަމަވެސް ފައިނަލް ޓީމުން ޖާގަ ނުލިބެ އެވެ.
ސީނިއާ ގައުމީ ޓީމުގެ ޕްރެކްޓިހުގައި ބައިވެރިވަމުން އަންނަ 19 އަހަރުން ދަށުގެ ޓީމުގެ ކީޕަރު ޔޫސުފް ވަނީ ދާދި ފަހުން ގައުމީ ޓީމުން ކުޅުނު ދެ އެގްސިބިޝަން މެޗުގައި ކުޅެފަ އެވެ. އެއީ ހދ. ކުޅުދުއްފުށީ ޒިގްޒެގް ސްޓޭޑިއަމް ހުޅުވަން އެ ރަށު ޓީމަކާ ދެކޮޅަށް ގައުމީ ޓީމު ކުޅުނު މެޗާއި މުހައްމަދު މޫސާ (އުއްޗު)ގެ ދައުވަތަކަށް ޅ. ކުރެއްދޫ ރިސޯޓްގައި އެ ތަނުގެ ޓީމާ ދެކޮޅަށް ކުޅުނު މެޗުގަ އެވެ. އެ ދެ މެޗުގައި ވެސް ޔޫސުފް، 18، ކުޅެން އެރީ ބަދަލު ކުޅުންތެރިއެއްގެ ގޮތުގަ އެވެ.
ސުޕަ ޔުނައިޓެޑް ސްޕޯޓްސް (ސަސް) އަށް ކުޅެމުން އަންނަ ޔޫސުފް ވަނީ އުމުރުފުރާ ގައުމީ ޓީމުތަކާ އެކު ސާފް ސަރަހައްދުގެ މުބާރާތްތަކުގައި ވާދަކޮށްފަ އެވެ. އަދި ޒުވާން ގައުމީ ޓީމުގެ ކެޕްޓަން ބޭންޑް އަޅައިގެން ވެސް ސަރަހައްދުގެ މުބާރާތްތަކުގެ މެޗުތަކުގައި ކުޅެފައިވެ އެވެ.
ސްކޮޑު ފައިނަލްކުރިއިރު، ބާކީވި ކުޅުންތެރިންގެ ތެރޭގައި ދެ ކީޕަރުން ކަމަށްވާ ހަސަން ތޮލާލް (ޓޮޕްލަކް) އާއި އިޔާން އަބްދުލް އަލީމް (ޗިކީ)ގެ އިތުރުން ޒުވާން ގައުމީ ޓީމަށް ދާދި ފަހުން 23 އަހަރުން ދަށުގެ އޭޝިއަން ކަޕް ކޮލިފައިންގައި ކުޅުނު ހަސަން ނަޒީމް ގާސިމް (ޗޯޓު) އާއި ފުލްބެކް ހުސެއިން ފައިސަލް (ފައިޓޯ) ހިމެނެ އެވެ.
ފޯ ނޭޝަންސް ކަޕްގައި ރާއްޖެ އާއި ލަންކާގެ އިތުރުން ދެން އޮތީ ސީޝެލްސް އާއި ބަންގްލަދޭޝް އެވެ. ބަންގްލަދޭޝް ވެސް މުބާރާތަށް ނުކުންނާނީ އާ ކޯޗަކާ އެކީ އެވެ. އެއީ އެ ގައުމުގެ ޑާކާ އަބަހާނީއާ ހަވާލުވެހުރި ކޯޗު ޕޯޗުގަލްގެ މާރިއޯ ލެމޯސް އެވެ. މީގެ ތެރެއިން ސީޝެލްސް އަކީ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖެއާ އެކު ވާދަކުރާ ގައުމެކެވެ.
ފޯ ނޭޝަންސް ކަޕްގެ ސްކޮޑު:
ކީޕަރުން: ޔޫސުފް މީސަމް އަބްދުﷲ، ނާޖިހު އަލީ (ނާޖީ)، މުހައްމަދު ޝަފީއު (ޗެކް)،
ޑިފެންޑަރުން: އަކުރަމް އަބްދުލް ގަނީ (އަކޫ)، ސަމޫހު އަލީ (ސަމުއްޓެ)، އަހުމަދު ނޫމާން (ހެލްމެޓް)، ހުސެއިން ޝިފާއު (ކުރޯ)، ހައިޝަމް ހަސަން (ބިޑި)، ގާސިމް ސައްމާމް (ސައްމެ)،
މިޑްފީލްޑަރުން: ޔަސްފާދު ހަބީބު (މުލަކޭ)، އައިޝަމް އިބްރާހިމް، ހުސެއިން ނިހާން (ނިހާޓް)، އަސްހަދު އަލީ (އަޑޭ)، އަލީ ފާސިރު (ސެންޓޭ)، އިސްމާއިލް އީސާ (މެސީ)، އިބްރާހިމް ވަހީދު ހަސަން (އިއްބެ)، މުހައްމަދު އުމެއިރު، ހަމްޒާ މުހައްމަދު (ހަމްޕު)،
ފޯވާޑުން: އަލީ އަޝްފާގު (ދަގަނޑޭ)، ހަސަން ރާއިފް އަހުމަދު (ހަންނަ)، ނާއިޒު ހަސަން (ދާދު)، އިބްރާހިމް މަހުދީ (ފޭދޫ އިއްބެ)، އަސަދުﷲ އަބްދުﷲ (އަސަކޮ)
ލަންކާ މުބާރާތުގައި އަންނަ ހަފްތާގެ ހޯމަ ދުވަހުގެރޭ ރާއްޖެ ކުޅޭނީ ލަންކާއާ އެވެ. ދެ ވަނަ މެޗުގައި 11 ވަނަ ދުވަހު ބަންގްލަދޭޝްއާ ބައްދަލުކުރާނެ އެވެ. އަދި ތިން ވަނަ މެޗުގައި ސީޝެލްސްއާ ކުޅޭނީ މި މަހު 14 ވަނަ ދުވަހު އެވެ. ފައިނަލަށް ގޮސްފިނަމަ އެ މެޗު އޮންނާނީ މި މަހު 17 ވަނަ ދުވަހު އެވެ.
