ގަލޮޅު ސްކޫލްގައި ކިޔަވަމުންދިޔަ އުމުރުން އެންމެ ހަތަރު އަހަރުގެ ކުޑަ ކުއްޖަކަށް ޖިންސީ އަނިޔާ ކުރިކަމުގެ ތުހުމަތުގައި ހައްޔަރު ކުރި އެ ސްކޫލުގެ މުވައްޒަފު މިއަދު ބަންދުން ދޫކޮށްލައިފި އެވެ.
ހަތަރު އަހަރުގެ އަންހެން ކުއްޖާއަށް އަނިޔާ ކުރި މައްސަލައިގައި ރޭގެ ވަގުތެއްގައި ހައްޔަރު ކުރީ ސްކޫލް ސާފު ކުރުމުގެ ވަޒީފާގައި އުޅޭ އުމުރުން 63 އަހަރުގެ އަންހެނެކެވެ.
އެނގިފައިވާ ގޮތުގައި އެ މައްސަލައިގެ ތުހުމަތުގައި ހައްޔަރު ކުރި މީހާ ދޫކޮށްލިއިރު ބަންދުގެ މުއްދަތު އިތުރު ކުރުމަށް ކޯޓަށް ގެންގޮސްފައެއް ނުވެ އެވެ. އަދި އޭނާ ކްރިމިނަލް ކޯޓަށް ހާޒިރު ނުކުރާކަން އެ ކޯޓުން ވަނީ މި ނޫހަށް ކަށަވަރުކޮށްދީފަ އެވެ.
މި ހަބަރު ޕަބްލިޝް ކުރިއިރު ފުލުހުންގެ ކޮމެންޓެއް ލިބޭ ގޮތް ވަނީ ނުވެފަ އެވެ.
ކުޑަ ކުއްޖާއަށް ޖިންސީ ގޯނާ ކުރި މައްސަލައިގައި އެކަން ކުރި މީހަކު ސީދާ ނޭނގޭތީ، އެ ސްކޫލުގެ ހުރިހާ މަސައްކަތު މުވައްޒަފުން ތިބީ ހުކުރު ދުވަހުން ފެށިގެން ސަސްޕެންޑުކޮށްފަ އެވެ. މަސައްކަތު މުވައްޒަފުން ނުވަތަ "ދައްތަމެންނަކީ" ބައެއް ދަރިވަރުން ފާހާނައަށް ދިޔުމަށް އެހީތެރިވުމުގެ ޒިންމާ ހަވާލުކޮށްފައި އޮތް ބަޔެކެވެ.
"ހުކުރު ދުވަހުން ފެށިގެން މި ސްކޫލުގައި މަސައްކަތް ކުރާ ހުރިހާ މަސައްކަތު މީހުން [ދައްތަމެން] ވާނީ ވަޒީފާގެ މަސްއޫލިއްޔަތުތަކުން އެކަހެރިކުރެވިފަ،" އެ މައްސަލައިގައި ގަލޮޅު މަދަރުސާއިން ނެރުނު ބަޔާނެއްގައި ބުނެފައިވެ އެވެ.
އެ މައްސަލައިގައި އަމާޒުވެފައިވާ ފާޑުކިޔުންތަކާ ގުޅިގެން ގަލޮޅު މަދަރުސާއިން ވަނީ ޓީޗަރުގެ ބެލުމުގެ ދަށުން ދަރިވަރުން ފާހާނާއަށް ދާގޮތަށް ހަމަޖައްސާފަ އެވެ. އަދި ދަރިވަރުންގެ ސަލާމަތަށްޓަކައި ސްކޫލުގެ 18 ދިމާލެއްގައި ސީސީޓީވީ ކެމެރާ ހަރުކޮށް ވަނީ ނިންމައިފަ އެވެ.
ކުޑަކުއްޖާާއަށް އަނިޔާ ކުރުން "ސީރިއަސް" މައްސަލައެއްގެ ގޮތުގައި ބަލަމުން އަންނަ ކަމަށް އެޑިޔުކޭޝަނުން ބުނެ އެވެ. މައުލޫމާތު ލިބޭ ގޮތުގައި އެޑިޔުކޭޝަނުން ވަނީ މިކަމުގައި އިހުމާލުވި ޓީޗަރަށް ފިޔަވަޅުއަޅަން އަންގާފަ އެވެ.
އޭގެ އިތުރުން، ރައްޔިތުންގެ މަޖިލިހުގެ ޖެންޑާ ކޮމިޓީން ވެސް ދަނީ އެ މައްސަލަ ބަލަމުންނެވެ.
