ފަސް ތަރީގެ އެމަރަލްޑް ރިސޯޓުން ކަނޑަށް ކުނި އަޅާ މައްސަލަ ބަލަން ފަށައިފި

ދިވެހިރާއްޖޭގައި އޮޕަރޭޓްކުރާ ފަސް ތަރީގެ އެމެރަލްޑް މޯލްޑިވްސް ރިސޯޓް އެންޑް ސްޕާއިން ކަނޑަށް ކުނި އަޅާ ކަމަށް ބުނާ މައްސަލަ އެންވަރަމަންޓް ޕްރޮޓެކްޝަން އެޖެންސީގެ ފަރާތުން މިއަދު ބަލަން ފަށައިފި އެވެ.

އިޓަލީގެ ކުންފުންޏަކުން ރ. އަތޮޅުގައި ހިންގާ 160 އެނދުގެ އެ ރިސޯޓުން ކަނޑަށް ކުނި އަޅާ ކަމަށް ބުނާ މައްސަލަ ހިލުނީ، އެ ރިސޯޓުގައި މަސައްކަތް ކުރާ ދިވެހި ފީނާ މީހަކު އެކަން ސޯޝަލް މީޑިޔާގައި ލިޔެ، އާންމުންގެ ސަމާލުކަމަށް ގެނައުމުންނެވެ.

އެ މައްސަލައިގައި ރިސޯޓަށް ވަރަށް ބޮޑު ފާޑުކިޔުންތަކެއް އަމާޒުވެފައި އޮއްވާ ތިމާވެށި ހިމާޔަތް ކުރުމުގެ ޒިންމާ އޮތް އީޕީއޭގެ ފަރާތުން ނެރުނު ކުރު ބަޔާނެއްގައި ބުނެފައި ވަނީ "ރިސޯޓަކުން ގަވާއިދާ ހިލާފަށް ކަނޑަށް ކުނި އެޅި މައްސަލަ ކަމާގުޅޭ އިދާރާތަކާ ގުޅިގެން" ބަލަމުންދާ ކަމަށެވެ.

އީޕީއޭގެ ޑިރެކްޓަރު އަދި އެ އޮފީހުގެ ސީނިއާ އެންވަޔަރަންމެންޓް އެނަލިސްޓް ރިއްފަތު ނައީމް ވިދާޅުވީ ރިސޯޓުގެ މައްސަލަ ބަލަނީ އީޕީއޭ އާއި ޓޫރިޒަމް މިނިސްޓްރީ ގުޅިގެން ކަމަށެވެ.

"އެއީ އެކަމުގައި ތުހުމަތު ވަނީ ރިސޯޓަކަށްކަމުގައިވާތީ. ދެން ގާނޫނުގެ އެބަ އުޅޭ ފުށުއެރުންތަކެެއް. އެހެންވެ ގިނަ ފަހަރަށް އީޕީއޭއަށް ފިޔަވަޅު ނޭޅެނީ ވެސް ރިސޯޓުތަކަށް އެކަހަލަ ކަންކަމުގައި. އެހެންނަމަވެސް، އަޅުގަނޑުމެން މިދަނީ ޓޫރިޒަމް މިނިސްޓްރީއާ އެއްކޮށް މިކަމުގައި މަސައްކަތް ކުރަމުން،" ރިއްފަތު ވިދާޅުވި އެވެ.

ރާއްޖޭގައި ހިންގާ ރިސޯޓުތަކުން އުފައްދާ، ހަލާކުވެދާޒާތުގެ ކާބޯތަކެތީގެ ކުނި، ކަނޑުގެ ވަކި ސަރަހައްދަކަށް އެޅުން އޮންނަނީ ސަރުކާރުން ހުއްދަކޮށްފަ އެވެ. ނަމަވެސް އެމެރަލްޑުން އެޅި ކަމަށް ބުނާ ކުނިތަކުގެ ތެރޭގައި ޕްލާސްޓިކާއި ރިސޯޓުގައި ބޭނުން ކުރާ ތަކެތި ހިމެނޭކަން ސޯޝަލް މީޑިއާއަށް ލާފައިހުރި ފޮޓޯތަކުން ފެނެ އެވެ.

އެ މައްސަލައިގައި އެމަރަލްޑް މޯލްޑިވްސް ރިސޯޓް އެންޑް ސްޕާގެ ކޮމެންޓަށް ހޯދަން މި ނޫހުން ގުޅި ނަމަވެސް މިހާތަނަށް އަދި ބަހެއް ނުލިބެ އެވެ.

އެމެރަލް ރިސޯޓުން ކަނޑަށް އެޅި ކުނި ނެގި އެ ރިސޯޓުގެ ފީނާ މީހާ އެ ކުނިތައް ނެގުމަށްފަހު ބެހެއްޓީ ރިސޯޓުގެ ރިސެޕްޝަން ސަރަހައްދުގަ އެވެ. އެ މައްސަލައިގައި އޭނާ ވަނީ ވަޒީފާއިން ވަކިކޮށްފަ އެވެ.

"ވަރަށް ސަލާމް އެމެރަލްޑް. ތި އަގުބޮޑު ތަނުން މިއަދު އަހަރެން ކަނޑާލެވިދާނެ. އެކަމަކު އަހަންނާއި ކަނޑާ އޮތް ގުޅުން ކަލޭމެންނަކަށް ދުވަހަކު ވެސް ކަނޑައިނުލެވޭނެ،" އެ މުވައްޒަފު އިނގިރޭސި ބަހުން ފޭސްބުކްގައި ލިޔެފައި އޮތެވެ.