ރާއްޖޭގެ އެންމެ މޮޅު ފެތުންތެރިންނަށް ހާއްސަ ކޮށްގެން ކުރިއަށް ގެންދިޔަ މޯލްޑިވްސް ސްވިިމިން އެސޯސިއޭޝަންގެ ޗެމްޕިއަން އޮފް ޗެމްޕިއަންސް މުބާރާތުގެ ފުރަތަމަ ރަން ވަނަތައް ކާމިޔާބު ދެ ފެތުންތެރިން ކަމަށްވާ ހަމްނާ އަހުމަދާއި މުހައްމަދު އާން ހުސެއިން ހޯދައިފި އެވެ.
މި މަހު 22 އިން ފެށިގެން ރޭގެ ނިޔަލަށް ހުޅުމާލޭ ސްވިމިން ޕޫލްގައި ބޭއްވި ފެތުމުގެ މި ހާއްސަ މުބާރާތުގެ ގިނަ އިވެންޓްތަކެއް ކާމިޔާބުކުރީ ހަމްނާ އާއި އާން އެވެ.
ހަމްނާ އާއި އާން އަކީ އަންނަ ޑިސެމްބަރު މަހު ޔުނައިޓެޑް އަރަބް އެމިރޭޓްސް (ޔޫއޭއީ)ގައި ބާއްވާ ދުނިޔޭގެ ފެތުމުގެ މުބާރާތުގައި ވާދަކުރުމަށް ހަމަޖެހިފައިވާ ހަތަރު ފެތުންތެރިންގެ ތެރެއިން ދެ ފެތުންތެރިއެކެވެ. އަދި ވޯލްޑް ޗެމްޕިއަންޝިޕްގައި ބައިވެރިވުމުގެ ފުރުސަތު ހޯދި އައިޝަތު ސައުޝަން އަށް ޗެމްޕިއަނުންގެ މުބާރާތުގައި ވާދަނުކުރެވުނީ ފަހު ވަގުތު ކޮވިޑް-19 އަށް ޕޮޒިޓިވްވުމުންނެވެ.
ޗެމްޕިއަނުންގެ މުބާރާތުގައި ހަމްނާ ވަނީ 13 އިވެންޓްގައި ވާދަކޮށް 12 އިވެންޓުން ރަން މެޑަލް ހޯދައިފަ އެވެ. ހަމްނާ އަށް ރަން މެޑަލް ނުލިބުނީ އޭނާ ވާދަކުރި 100 މީޓަރު ބަޓަފްލައި އިވެންޓްގަ އެވެ. މި އިވެންޓްގައި ހަމްނާ ޑިސްކޮލިފައިވެ، ވަނަ އަކާ ހަމައަށް ދެވޭ ގޮތެއްނުވި އެވެ.
ޗެމްޕިއަނުންގެ މުބާރާތުގެ އިވެންޓެއްގެ ތެރެއިން ހަމްނާ ފަތަނީ.-- ފޮޓޯ: ހުސެއިން ޝަޔާހު/ އަދަދު
ހަމްނާ މެޑަލް ހޯދި އިވެންޓްތަކަކީ 100 އާއި 200 މީޓަރު ބެކްސްޓްރޯކް، 100 މީޓަރާއި 50 މީޓަރު ބްރެސްޓްސްޓްރޯކް، 50 މީޓަރު ބެކްސްޓްރޯކް، 200 މީޓަރު ފްރީސްޓައިލް، 400 މީޓަރު ފްރީސްޓައިލް، 100 އާއި 200 މީޓަރު އިންޑިވިޖުއަލް މެޑްލީ، 50 މީޓަރު ބަޓަފްލައި އަދި 100 އާއި 50 މީޓަރު ފްރީ ސްޓައިލް އެވެ.
އާން ވަނީ 15 އިވެންޓްގައި ވާދަކޮށް 14 އިވެންޓުން ރަން މެޑަލް އަދި އެއް އިވެންޓުން ރިހި މެޑަލް ހޯދައިފަ އެވެ. އާން އަށް ރިހި މެޑަލް ލިބުނީ 200 މީޓަރު ބަޓަފްލައި އިވެންޓުންނެވެ. މި އިވެންޓުން ރަން މެޑަލް ގެނައީ މުހައްމަދު ރިހާން ޝިޔާމް އެވެ.
އާން ކާމިޔާބުކުރި އިވެންޓްތަކަކީ 400 މީޓަރު އިންޑިވިޖުއަލް މެޑްލީ، 100 އާއި 200 މީޓަރު ބެކްސްޓްރޯކް، 100 މީޓަރު ބްރެސްޓްސްޓްރޯކް، 100 މީޓަރު ބަޓަފްލައި، 50 މީޓަރު ބެކްސްޓްރޯކް، 200 މީޓަރު ފްރީ ސްޓައިލް، 50 މީޓަރު ބްރެސްޓްސްޓްރޯކް، 400 މީޓަރު ފްރީ ސްޓައިލް، 100 އާއި 200 މީޓަރު އިންޑިވިޖުއަލް މެޑްލީ، 50 މީޓަރު ބަޓަފްލައި އަދި 50 އާއި 100 މީޓަރު ފްރީ ސްޓައިލް އެވެ.
އިވެންޓެއް ނިންމާލުމަށް ފަހު އާން މީޑިއާ އަށް އިންޓަވިއުދެނީ.-- ފޮޓޯ: ހުސެއިން ޝަޔާހު/ އަދަދު
ސްވިމިން އެސޯސިއޭޝަނުން ބުނީ ކޯވިޑް-19އާ ހެދި މިދިޔަ އަހަރު އެ އެސޯސިއޭޝަން އިން ކުރިއަށްގެންދާ އެއްވެސް މުބާރާތެއް ބޭއްވިފައިނުވެ އެވެ. އެހެންވެ، މި އަހަރު އަލަށް ޗެމްޕިއަން އޮފް ޗެންޕިއަންސް މުބާރާތް ފެށިއިރު، މުބާރާތުގައި ބައިވެރިކުރީ 2019 ވަނަ އަހަރު ކުރިއަށް ގެންދިޔަ ހުރިހާ އިވެންޓްތަކުން މަތީ ވަނަތައް ހޯދި ފެތުންތެރިންނަށް ދައުވަތުދީގެންނެވެ.
އެ ގޮތުން ޗެމްޕިއަނުންގެ މި މުބާރާތުގައި ބައިވެރިވުމަށް ދައުވަތު ދީފައިވަނީ ކޮންމެ ކެޓަގަރީ އަކުން ވެސް އެންމެ މޮޅު އަށް ފެތުންތެރިންނަށް ކަމަށް ސްވިމިން އެސޯސިއޭޝަނުން ބުނެފައިވެ އެވެ.
މުސްތަގުބަލުގައި ޗެމްޕިއަނުންގެ މި މުބާރާތް ފުޅާކުރުމުގެ ވިސްނުން ސްވިމިން އެސޯސިއޭޝަނުން ގެންގުޅެ އެވެ. އެ ގޮތުން ކުރިއަށް އޮތްތަނުގައި މި މުބާރާތަކީ ސްވިމިން އެސޯސިއޭޝަނުން ބާއްވާ އެންމެ ޝަރަފްވެރި މުބާރާތަށް ހެދުމަކީ އެސޯސިއޭޝަނުން ގެންގުޅޭ ވިސްނުމެކެވެ. އެެސޯސިއޭޝަނުގެ އެއް ވިސްނުމަކީ ސަރަހައްދުގެ އެކި ޗެމްޕިއަނުންނާ އެކު މި މުބާރާތް ކުރިއަށް ގެންދިއުމެވެ.
