ގަތަރުގެ ދޯހާގައި މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގެ ކޮލިފައިންގައި ރާއްޖޭގެ ގައުމީ ކްރިކެޓް ޓީމުން ކުޅުނު ތިން ވަނަ މެޗުން މިއަދު ބަހްރޭން އަތުން ބަލިވެއްޖެ އެވެ.
ފުރަތަަމަ މެޗުގައި ސައުދީ އަރަބިއްޔާއާ ދެކޮޅަށް ކުޅުނު މެޗުން ރާއްޖެ ބަލިވީ ހަތް ވިކެޓުންނެވެ. ގަތަރުން ދެ ވަނަ މެޗުގައި ރާއްޖެ ބަލިކުރީ 98 ލަނޑުންނެވެ. އަދި މިއަދު ބަހްރޭނުން ރާއްޖޭގެ މައްޗަށް ކުރިހޯދީ ހަތް ވިކެޓުންނެވެ. މި ނަތީޖާތަކާ އެކު ބާކީ އެއް މެޗު އޮއްވައި ރާއްޖެ ވަނީ ކޮލިފައިން އިން ކަޓައިފަ އެވެ. ފަހު މެޗުގައި ރާއްޖެ ކުޅެން ޖެހޭނީ ކުވޭތާ ދެކޮޅަށެވެ. ކުވޭތާ ދެކޮޅަށް ރާއްޖެ ކުޅޭ މެޗު އޮންނާނީ މާދަމާ އެވެ.
ދޯހާގެ ވެސްޓް އެންޑް ޕާކް އިންޓަނޭޝަނަލް ކްރިކެޓް ސްޓޭޑިއަމްގައި ކުޅުނު މިއަދުގެ މެޗުގެ ޓޮސް ދިމާވުމުން ބަހްރޭނުން ނިންމީ ފީލްޑްކުރާށެވެ. ބަހްރޭނުގެ މި ނިންމުމާ އެކު ރާއްޖޭން ކުޅެން އަރައި 20 އޯވަރު ހަމަވިއިރު ނުވަ ކުޅުންތެރިން ނުބައިވެގެން ހެދުނީ 88 ލަނޑެވެ.
ރާއްޖެ ޓީމުން އެންމެ އެންމެ ރަނގަޅަށް ކުޅުނީ 22 ބޯޅައިން 31 ލަނޑު ހެދި އުމަރު އާދަމާއި 15 ބޯޅައިން 15 ލަނޑު ހަމަކުރި މުހައްމަދު ރިޝްވާނެވެ. ރިޝްވާނަކީ މި ފަހަރުގެ މުބާރާތުގައި ސްކޯރިން އަށް ބަލާއިރު، ރަނގަޅު ލެވަލެއްގައި ކުޅެމުން އަންނަ ކުޅުންތެރިއެކެވެ.
ބަހްރޭނުން ފުރަތަމަ މެޗުގައި ގަތަރު ބަލިކުރި ނަމަވެސް ދެ ވަނަ މެޗުގައި ކުވޭތު އަތުން ބަލިވުމުން ރާއްޖެ އަތުން މޮޅުވުން ނޫން ގޮތެއް އެ ޓީމަށް ނެތެވެ. އެހެންވެ، ޖަވާބުގައި ކުޅެން އަރައި އެ ޓީމުން މޮޅުވެވޭވަރުގެ ކުޅުމެއް ދެއްކި އެވެ. އެ ޓީމުން ކުޅެން ނުކުމެ ހަތް ވަނަ އޯވަރުގައި ތިން ކުޅުންތެރިން ނުބައިވެގެން 93 ލަނޑު ހަދައި މެޗުން ފުރިހަމަ މޮޅެއް ހޯދި އެވެ.
ބަހްރޭނުގެ މި މޮޅުގައި އެންމެ ހިއްސާ ބޮޑީ 13 ބޯޅަ އިން 31 ލަނޑު ހެދި މުހައްމަދު ޔޫނިސް އެވެ. ރާއްޖޭގެ ކުޅަދާނަ އުުކުންތެރިޔާ ހަސަން އިބްރާހިމް ވަނީ ދެ ވިކެޓް ނަގައިފަ އެވެ.
އަންނަ އަހަރު ބާއްވާ ޓީ20 ވޯލްޑް ކަޕަށް ކޮލިފައިވާނީ މި ގްރޫޕުން އެންމެ ކުރި ހޯދާ ޓީމެކެވެ. ގްރޫޕްގެ އެެއް ވަނައިގައި އޮތް ބަހްރޭނާއި ދެ ވަނައިގައި އޮތް ގަތަރު އަދި ތިނެއްގައި އޮތް ސައުދީ އަރަބިއްޔާ އަށް ވަނީ ހަތަރު ޕޮއިންޓް ލިބިފަ އެވެ. އެއިން ކޮންމެ ޓީމެއް ވެސް ތިން މެޗެއް ވަނީ ކުޅެފަ އެވެ. ހަތަރެއްގައި އޮތީ ދެ މެޗުން ދެ ޕޮއިންޓާ އެކު އޮތް ކުވޭތެވެ. ރާއްޖެ ފުލުގައި އޮތީ ތިން މެޗުން ޕޮއިންޓެއް ނުލިބި އެވެ.
