ނިއު ދިއްލީ، އިންޑިއާ (އޮކްޓޯބަރު 24) - މި މަހު ފަހުކޮޅު ފަށާ މޫސުމީ ބަދަލާ ގުޅޭ ބޮޑު ބައްދަލުވުމަށް އިންޑިއާގެ ބޮޑު ވަޒީރު ނަރެންދްރަ މޯދީ ވަޑައިގަންނަވާނެކަން އިއުލާނުކޮށްފި އެވެ.
ޕެރިހުގައި 2015 ވަނަ އަހަރު އޮތް މޫސުމީ ބަދަލާ ގުޅޭ ބައްދަލުވުމަށް ފަހު ބާއްވާ އެފަދަ އެންމެ ބޮޑު ބައްދަލުވުމަށް ދުނިޔޭގެ 120 ލީޑަރުން ސްކޮޓްލޭންޑުގެ ގްލާސްގޯ އަށް ވަޑައިގަންނަވާނެ އެވެ.
ނަމަވެސް އޮކްޓޯބަރު 31 އިން ނޮވެމްބަރު 12 އަށް ކުރިއަށްދާ ކޮޕް 26 ސަމިޓުގައި ރަޝިއާގެ ރައީސް ލެޑިމިއަ ޕޫޓިން އާއި ޗައިނާގެ ރައީސް ޝީ ޖިންޕިން ބައިވެރިވެވަޑައިނުގަންވާނެ އެވެ.
އެހެންކަމުން މޯދީ ސަމިޓަށް ވަޑައިގަންނަވާނެކަން އިއުލާނުކުރުމާ އެކު އެއީ ބައްދަލުވުންތަކާ މެދު އުއްމީދު އާވެގެން ދިޔަ ކަމެއްގެ ގޮތުގައި އެނެލިސްޓުން ދެކެ އެވެ.
ޖައްވަށް ބޭރު ކުރާ ކާބަންޑައިއޮކްސައިޑް ގޭސް މަދު ކުރަން އިންޑިއާ އިން ކުރާ މަސައްކަތް އިތުރު ކުރަން އެމެރިކާ އާއި ޔޫރަޕިއަން ޔޫނިއަން (އީޔޫ) ގެ މަންދޫބުން ވަނީ ފަހަކަށް އައިސް އިންޑިއާ އަށް ޕްރެޝަރުކޮށްފަ އެވެ.
އެމެރިކާ އާއި ޗައިނާ އަށް ފަހު އެންމެ ގިނައިން ޖައްވަށް ވިހަ ގްރީންހައުސް ގޭސް ބޭރު ކުރަނީ އިންޑިއާ އެވެ. އޮފިޝަލުން ބުނެފައި ވަނީ އިންޑިއާ އިން ކުރާނެ މަސައްކަތާ ގުޅޭ އާ ހުށަހެޅުމެއް ސަމިޓުގެ އާއްމު ކުރާނެ އެވެ. ނަމަވެސް އޭގެ ތަފްސީލް އަދި އާއްމެއް ނުކުރެ އެވެ.
މޯދީ ގްލާސްގޯ އަށް ވަޑައިގަންނަވާނީ އަންނަ ހަފުތާ ބަންދުގައި ރޯމްގައި އޮންނަ ޖީ20 ސަމިޓުގައި ބައިވެރިވެވަޑައިގެންނެވުމަށް ފަހު އެވެ. އެ ސަމިޓުގައި ވެސް ދުނިޔެ ހޫނުވުމާ ގުޅޭ ވާހަކަތައް ކުރިއަށް ދާނެ އެވެ.
އެންޓަނޭޝަނަލް އެނާޖީ އެޖެންސީން ބުނެފައިވާ ގޮތުގައި އިންޑިއާ އިން މި ވަގުތު ޖައްވަށް ބޭރު ކުރާ ކާބަންޑައިއޮކްސައިޑަކީ މުޅި ޔޫރަޕުން ބޭރު ކުރާ މިންވަރާ އެއް ނިސްބަތެކެވެ.
ކޮވިޑް ބަލިމަޑުކަމަށް ފަހު އިންޑިއާގެ އިގްތިސާދު އަލުން ބިނާ ކުރުމުގެ މަސައްކަތުގައި ކާބަންޑައިއޮކްސައިޑް ބޭރު ކުރާ މިންވަރު 2019 ވަނަ އަހަރު ހުރި މިންވަރަށް ވުރެ އިތުރުވާނެ ކަމަށް އެ އެޖެންސީން ބުންޏެވެ.
އިންޑިއާ އިން ދެކޭ ގޮތުގައި ސިނާއީ އިންގިލާބުގައި ޖައްވަށް ގިނައިން ގޭސް ބޭރުކުރި މުއްސަނދި ގައުމުތަކުން ތަރައްގީވަމުން އަންނަ ގައުމުތަކަށް ދޭ ފައިސާ އިތުރު ކުރަން ޖެހެ އެވެ. އެ ފައިސާ އަކީ މޫސުމީ ބަދަލާ ދެކޮޅަށް ފިޔަވަޅު އެޅުމަށް ފޯރުކޮށްދޭ ފައިސާ އެވެ.
