އޭޝިއާގެ 23 އަހަރުން ދަށުގެ މުބާރާތަށް ކޮލިފައިވުމަށް ކުޅޭ ކޮލިފައިން މެޗުތަކުގައި ވާދަކުރާ ރާއްޖޭގެ ޒުވާން ގައުމީ ޓީމުގެ ކެޕްޓަނަކަށް ސީނިއާ ގައުމީ ޓީމުގައި ވެސް މޮޅު ކުޅުމެއް ދައްކަމުން އަންނަ ހައިޝަމް ހަސަން (ބިޑި) ހަމަޖައްސައިފި އެވެ.
އުމުރުން 22 އަހަރުގެ ހައިޝަމް އަކީ މާލޭގައި މި މަހު 1-16 އަށް ކުރިއަށްދިޔަ އުރީދޫ ސާފް ޗެމްޕިއަންޝިޕްގައި ވެސް ތަފާތު މޮޅު ކުޅުމެއް ދައްކައި ގިނަ ބަޔެއް ސަމާލުކަން ހޯދާފައިވާ ހުނަރުވެރި ކުޅުންތެރިއެކެވެ.
ތޭވީސް އަހަރުން ދަށުގެ ގައުމީ ޓީމުގެ ވައިސް ކެޕްޓަނުންގެ ގޮތުގައި ހަމަޖައްސާފައިވަނީ ކުރިން ސީނިއާ ގައުމީ ޓީމަށް ކުޅުނު އަބްދުﷲ ޔާމީން (ޔާން) އާއި މުހައްމަދު ޖައިލަމް (އޮގީ) އެވެ.
ހައިޝަމް ވަނީ 2017 ވަނަ އަހަރު 19 އަހަރުން ދަށުގެ ގައުމީ ޓީމަށް ކުޅެފަ އެވެ. އޭގެ ފަހުން 2019 ވަނަ އަހަރު 23 އަހަރުން ދަށުގެ ގައުމީ ޓީމުގެ ކޮލިފައިންގައި ކުޅެ އެ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ކުޅުނު ޓީމުގައި ހިމެނުނެވެ. އެ މުބާރާތުގައި ދެއްކި މޮޅު ކުޅުމަށް ފަހު ހައިޝަމް އަންނަނީ ސީނިއާ ގައުމީ ޓީމުން ފުރުސަތު ހޯދަމުންނެވެ.
ބ. އޭދަފުއްޓަށް އުފަން ހައިޝަމް ވަނީ 2019 ވަނަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްގައި ވާދަކުރި 23 އަހަރުން ދަށުގެ ގައުމީ ޓީމަށް ވެސް ކުޅެފަ އެވެ.
ޒުވާން އުމުރުގައި ގައުމީ ސީނިއާ ޓީމަށް ކުޅުނު ޔާން ވެސް ވަނީ އުމުރުފުރާ ގައުމީ ޓީމުތަކަށް ކުޅެފަ އެވެ. އަނިޔާ އަށް ފަހު ކުޅުމަށް އެނބުރި އައިސް މިދިޔަ ސީޒަނުގައި އާ ހިތްވަރަކާ އެކު ކުޅެން ފެށި އޮގީ ވަނީ މި ފަހަރުގެ ކޮލިފައިން އަށް ތައްޔާރުވާން ޅ.އަތޮޅުގައި ގައުމީ ޓީމުން ޖެހި ކޭމްޕްގެ ބައެއް މެޗުތަކުގައި ޓީމުގެ ކެޕްޓަންކަން ކޮށްފަ އެވެ.
އެންމެ ފަހުން ކުޅުނު 23 އަހަރުން ދަށުގެ އޭޝިއަން ކަޕްގެ ކޮލިފައިންގައި ވާދަކުރި ގައުމީ ޓީމުތަކުގެ ކެޕްޓަންކަން ކޮށްފައިވާ ކުޅުންތެރިންނަށް ބަލާއިރު، ޓީސީ އަށް ކުޅުނު އައްޒާމް އަބްދުﷲ (އެޑޫ) އާއި މާޒިޔާގެ މުހައްމަދު އިރުފާން (އިރޭ) ހިމެނެ އެވެ.
އަފްގާނިސްތާން ހާޒިރެއް ނުވޭ، ކޮލިފައިންގައި ރާއްޖެ އަށް އޮތީ ދެ މެޗު
ކޮލިފައިންގެ ޝެޑިއުލް ފުރަތަމަ އާންމުކުރިއިރު، ބަހްރޭންގައި ކުރިއަށްދާ ގޮތަށް ރޭވި ކޮލިފައިން ގްރޫޕް ސީގައި ބަހްރޭނާއި ރާއްޖޭގެ އިތުރުން ދެން އޮތީ އަފްގާނިސްތާން އާއި އިރާގް އެވެ. އެކަމަކު، އެންމެ ފަހު ވަގުތު އަފްގާނިސްތާނުން ބަހްރޭނަށް ނުދާތީ ރާއްޖެ މިހާރު ކޮލިފައިންގައި ރާއްޖެ އަށް ކުޅެން އޮތީ އެންމެ ދެ މެޗެވެ.
ކޮލިފައިންގައި ރާއްޖެ ކުޅޭ ފުރަތަމަ މެޗުގައި މިއަދު ކުޅޭނީ އިރާގާ ދެކޮޅަށެވެ. އަދި ދެ ވަނަ މެޗުގައި ރާއްޖޭން ބަހްރޭނާ ބައްދަލުކުރާނީ އަންނަ ބުރާސްފަތި ދުވަހު އެވެ.
އަންނަ އަހަރު އުޒްބެކިސްތާންގައި އޮންނަ 23 އަހަރުން ދަށުގެ މުބާރާތުން ޖާގަ ލިބޭނީ މިހާރު ކުރިއަށްދާ ކޮލިފައިންގެ 11 ގްރޫޕްގެ އެއް ވަނަ ޓީމުގެ އިތުރުން 11 ގްރޫޕްގެ ދެ ވަަނަ އަށް ދާ ޓީމުތަކުގެ ތެރެއިން އެންމެ ރަނގަޅު ނަތީޖާތަކެއް ނެރޭ ހަތަރު ޓީމެކެވެ.
މިއަދު ރާއްޖެ ކުޅެން ޖެހޭ އިރާގަކީ އޭޝިއާ ފުޓްބޯޅައިގެ ވަރުގަދަ ބާރެކެވެ. އުމުރުފުރާ މުބާރާތްތަކުގައި ވެސް އިރާގުން އަންނަނީ ނަތީޖާ ނެރެމުންނެވެ. އިރާގާއި ރާއްޖެ ކުޅޭ މެޗު ފަށާނީ ރާއްޖެ ގަޑިން މިއަދު އިރުއޮއްސި 18:15 ގަ އެވެ.
