ކޮވިޑް-19 އާ ގުޅިގެން މުވައްޒަފުންނަށް އެލަވަންސް ދިނުމަށް ހެލްތު މިނިސްޓްރީން 65.5 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފި އެވެ.
ކޮވިޑާ ގުޅިގެން މުވައްޒަފުންނަށް އެލަވަންސް ދިނުމަށް މުއައްސަސާތަކުން މިހާތަނަށް ޖުމްލަ 177.4 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސްގެ ތަފާސްހިސާބުތަކުން ދައްކަ އެވެ. އޭގެތެރެއިން އެންމެ ބޮޑު ހަރަދެއް މުވައްޒަފުންގެ އެލަވަންސަށް މިހާތަނަށް ކޮށްފައި ވަނީ ހެލްތު މިނިސްޓްރީންނެވެ.
މުވައްޒަފުންނަށް އެލަވަންސް ދިނުމަށް ދެ ވަނަ އަށް އެންމެ ބޮޑު ހަރަދެއް ކޮށްފައި ވަނީ އެމްއެންޑީއެފް އިން ނެވެ. އެތަނުން ވަނީ މިހާތަނަށް 48.4 މިލިއަން ރުފިޔާ ހަރަދުކޮށްފަ އެވެ. މިއީ އެމްއެންޑީއެފް އިން ބަލިމަޑުކަމާ ގުޅިގެން ހަރަދުކުރި 67.6 މިލިއަން ރުފިޔާގެ 71 އިންސައްތަ އެވެ.
މީގެ އިތުރުން މުވައްޒަފުންނަށް އެލަވަންސް ދިނުމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން 36 މިލިއަން ރުފިޔާ ހޭދަކުރި އެވެ. އެތަނުން ޖުމްލަ ހޭދަކުރި އަދަދަކީ 868.5 މިލިއަން ރުފިޔާ އެވެ.
އަދި މޯލްޑިވްސް ޕޮލިސް ސާވިސަސް އިން ވެސް ވަނީ 27.4 މިލިއަން ރުފިޔާ ހޭދަކޮށްފަ އެވެ. ހޭދަކުރި އަދަދުގެ ނިސްބަތުން މުވައްޒަފުންގެ އެލަވަންސް އަށް އެންމެ ބޮޑު ހޭދައެއް ކުރީ ޕޮލިހުންނެވެ. އެތަނުން އެލަވަންސް އަށް ހޭދަކުރި 27.4 މިލިއަން ރުފިޔާ އަކީ އެތަނުގެ ޖުމްލަ ހޭދަކަމަށް 31.7 މިލިއަން ރުފިޔާގެ 86.4 އިންސައްތަ އެވެ.
ކޮވިޑާ ގުޅިގެން ސަރުކާރުން ކުރި ހަރަދުގެ ޖުމުލަ މިހާރު އުޅެނީ 3.9 ބިލިއަން ރުފިޔާގަ އެވެ. އެއީ ސިއްހީ އަދި އިޖުތިމާއީ އެކި ކަންކަމަށް ކޮށްފައިވާ 2.1 ބިލިއަން ރުފިޔާ އާއި އިގުތިސާދީ ގޮތުން ލިބުނު ގެއްލުމުން އަރައިގަތުމަށް ވިޔަފާރިތަކަށާއި އާންމު ރައްޔިތުންނަށް އެހީތެރިވުމަށް ހަރަދުކުރި 1.7 ބިލިއަން ރުފިޔާ އެވެ.
